北海道仲夏花之旅第五天

七月二十八日〈星期六〉第五天

嗚嗚.........都未走已經唔捨得嘞！
Dormy Inn，我會返嚟架；魚生飯，我會掛住你哋架！

經過一番雞同鴨講之後，終於完成攞車、
Check車、學用GPS嘅程序，預備~~~出發！



原來呢架車無USB架，咁長長嘅車程，
i-phone入面果七百幾隻歌，就大派用場啦！



喺高速奔馳咗兩個幾鐘，終於要喺7仔停低嘞，
大家都係時候需要放低啲嘢同補給一下。



終於到達美瑛嘞，呢間就係今晚間民宿『丘之宿』......



放低行李後，去最旺最近車站嘅地方行吓先，
呢度就係鼎鼎大名嘅松浦商店嘞！



心思思想租單車，不過真係唔夠時間玩喎！ 

去四季情報館了解一下，攞吓地圖先，
我問入面個職員，邊度有得食蜜瓜雪糕，
佢好詳細解釋，又用地圖指示邊條行車路線風景好，
真係非常幫到手，到達美瑛真係一定要入去攞料。



見到『Roll君』就知道去到四季彩之丘啦！

唔講咁多，以下時間，請大家賞賞花啦！

嚟呢度另一個希望，係想近距離睇睇草泥馬，
但係時近黃昏，仲要俾500円入場，真係有啲唔捨得......



唯有用長鏡遠遠影吓就算啦！當睇咗架嘞！
Hello and Goodbye, dear！ 


記念品都係以草泥馬為主，但係寫明唔准影相噃！



另外仲有一個主主主要目的~~~食蜜瓜雪糕，
係名副其實嘅蜜瓜雪糕喎！盛惠1000円吖。



返到車站，六點幾個天仲係咁靚！



呢間民宿，真係不願多提，完全無民宿feel，
成5間房10個人共一個浴室，
但係另一間浴無人用又唔俾我哋用，
有洗衣機洗衫但係洗完先知乾衣機係壞嘅，
又無貼告示搞到我哋要用風扇吹乾啲衫，
民宿主人隨咗收錢果時郁郁嘴角外，
基本上無同我哋溝通過，
餐廳好似一個火爐咁熱，最慘係~~~呢個晚餐，
係全齋宴，果舊炸物係一堆蔬菜炸埋一齊，
連一粒肉都無呀！係堅難食，仲唔飽添，
搞到我哋要夜媽媽揸車去Lawson補給，
呢個經驗真係難忘，令我愧對所有團友，
點解？點解我會千揀萬揀揀咗呢間架？

好彩只係住一晚，好好醜醜都有個地方落腳囉！

聽日要去富良野，為免浪費時間，今晚做足功課，
我已經攞晒啲地圖出嚟計劃好聽日嘅行程架嘞！