北海道仲夏花之旅第四天

七月二十七日〈星期五〉第四天

之前我猛話好鐘意呢間酒店，最主要原因就係......
呢度每朝個自助早餐，呢個早餐有幾巴閉？
就係有自助任食魚生飯囉！



唔鐘意食飯？咪齋食魚生囉，反正係自助架嘛！



食飽飽去行街，心情好，隨街都見到靚嘢。




手宮線跡地都準備好晒，預備今晚個潮祭。

先去『金融資料館』，睇吓傳聞中嘅2000円。

如果唔小心撕爛咗張銀紙，原來都可以換番錢架，
不過唔同程度嘅爛，張錢嘅價值都有所不同嘅。
下次整爛張銀紙果時，記得要就住就住嘞！



呢度有成一億円，可以試吓伸隻手入去搬吓有幾重架。




跟住去『石原裕次郎記念館』，入場費900円，
呢度之前都無留意過，原來入面都幾得意架！



入到去個個好似影后上身，猛喺個個場景間走嚟走去。

呢個設計好正好體貼！
方便大家影團體相，以後自拍~~可以不求人嘞！

一定要去音樂盒堂走走，先似嚟過小樽架嘛。



雖然啲嘢好靚，但係都無收獲，
梗係啦！我屋企都襯唔到佢啦！

朋友，你哋見過無人嘅『童話十字路口』未呢？

我個人認為，夏天遊小樽，行得比較舒服，
冬天行雪地好快就攰，而且好早天黑閂晒舖。 

嘩！仲可以同所有龍貓家族影大合照添！



個天咁靚，顯得北菓樓同六花亭都份外吸引。



入去食個聞名已久嘅『夢不思議』先。



軟軟滑滑、香香甜甜，終於都如願以嘗嘞！

 行餐飽後，回程！展開掃街之旅啦！

燒帶子，200円一隻，超~~~~~~好味！

夕張蜜瓜，580円一杯，簡直一試難忘，
就係咁，令我哋展開咗尋找蜜瓜之旅嘞！



かわいい呢！和服女孩真係人見人愛；車見車載呀！



戲肉到嘞！巡遊好好玩架，係用一首好簡單嘅歌曲，
配合易學嘅舞步，由街頭一直跳到去街尾。
參加巡遊嘅人都好友善，佢哋仲邀請我哋一齊跳添，
我哋又唔怕醜跟喺隊尾一齊玩，好開心架！
最後淨係記得一句歌詞：『梳呢！梳呢！』


夜晚預備去睇煙花，發現個肚已經打晒鼓！
但係周圍都無乜嘢好食。呢啲大時大節，
梗係要入鄉隨俗，去臨時熟食區買嘢食啦！

食嘢嘅地方好似大排檔，啲食物都ok架！

煙花時間到嘞！我從來都未試過喺香港睇煙花，
點知會喺日本睇，仲兩次添，記得上次係喺九州。
睇吓中間個哈哈笑，好似鬍鬚佬咁，好搞笑！

返到酒店，免費洗晒呢幾日啲衫，
享用免費拉麵同粟米茶，就好滿足咁返房執行李嘞！

聽日要一早離開，展開自駕之旅嘞！