台北台中兩頭遊第四日〈下〉

4月25日〈星期一〉

喺紙箱餐廳食完嘢，就去旁邊嘅小瑞士，

呢度係一個人工花園，好似無乜人嘅香港花展一樣，

除咗門口有D睇頭外，入面都好似未整好咁。

途中睇到一群鴨，見到我行近就揾路走，

真係對唔住，最後迫到佢哋投河......哈哈！

返到普羅旺斯攞鎖匙，

工作人員問我想唔想upgrade去Villa，

要加NT1500一晚，我哋要求睇晒兩間先決定，

一睇之下，未試過咁齊心，一齊舉手讚成，

廢話少講，睇相最實際，首先係大廳，

我哋唔係包棟無得用，不過影吓相都得嘅。

包棟4間房，可住10人以上，有超大雪櫃......

知己好友，可以喺度開個派對。

開放式廚房，幾個人一齊落廚都得。

拉個幕落嚟，就可以唱卡拉ok。

終於上到自己房嘞！有個可以用嘅壁爐。

古董電話同優雅燈飾。

唔駛自己煲水，冷水熱水，一按就有。

樓下大廳、大床、大衣櫃，乜都大。

另一個角度再睇，點睇都咁好睇。

仲有樓上，樓上都有電視、浴室同大床。

今晚我哋五個就係一齊住喺呢度嘞！要用盡佢！

哈哈！我哋都愛上樓中樓。

樓下大浴室大浴池同按摩花灑。

大到可以行嚟行去，兩個浴室唔駛爭。

浴室旁有道門出去，有鞦韆玩，浪漫呢！

仲有私人泳池，有按摩架噃！

居高臨下，望住合歡山泳水，真係離晒譜。

呢次真係奇遇，最奇係，連加費都只係NT6725，

5個人每人NT1345即港元$374，

包早餐、下午茶同晚餐，真係超級招積舒適超值！