台北台中兩頭遊第五日

4月26日〈星期二〉

今日要走嘞！但係行程一d都唔Hea！

今日，我零晨3:30就起身梳洗，

因為約咗4:25上合歡山睇日出，

朝早好凍，我已經著住兩件長袖Tee加風褸，

上車前司機摸摸我哋手臂話：『不夠！』

叫我哋上車時喺車上借一件厚褸，

第一站係7-11，唔係俾大家去買嘢，只係影張相。

呢間7-11有幾巴閉？因為佢喺海拔2050公尺囉！

好彩有得借褸，呢度只得4.5度，而且好大好大風。

司機話今日太陽伯伯怕醜，所以我哋睇唔到日出，

無辨法啦！自然景象嘅嘢，唔通叫回水咩？

但係短短時間，我哋就見識到天色幻變無常。

7:50返到普羅旺斯，食個自助早餐先，

一般嘅食物，不過有我好鐘意嘅粟米湯，

係日本罐裝果隻味道，仲要多粟米粒，好味！

今日約咗司機9:00喺大堂等，司機早咗8:45已到，

係嚟果日同一間包車公司，經歷一樣麻麻，

司機嘅態度好好，只係包車公司建議我哋去日月潭，

我哋喺電話同電郵都已經拒絕咗，

但係今日司機個order仍然仲係日月潭，

講咗一輪，終於取消日月潭改番去集集，

但係喺集集之前，佢安排咗2個都幾無聊嘅景點，

18C朱古力工場，完全唔知做乜，

唔好諗住好似白之戀人咁呀，

第二站埔里酒廠，求求其其行個圈就走嘞！

酒廠對面馬路有間餅舖，有少少收獲。

係無所不在利用各種形式出現嘅~~~鳳梨酥。

然後司機車我哋去一福堂買太陽餅，

呢個行程係我哋要求嘅，要交貨嘛，

舖頭喺一條公路邊，自己一定唔會嚟，

都係做旅行團生意，有好多款式，仲有D特價添，

俾機場嘅平D新鮮D，大家都買得好開心。

10:45到達集集，呢度係一個好細好靜嘅小鎮。

火車暫時停駛，鐘意影相嘅朋友一定會影得好開心。

呢度出名香蕉，但係卻未能出產特色手信，

只有香蕉蛋卷同火車票餅，本來想買蛋卷，

因為自己好鐘意香蕉味嘅食物，點知一試食......

3間都無香蕉味，好失望.....

最後只好買黑糖棒棒糖、海燕窩同車票餅啦！

買完嘢一齊食餐飯，司機約咗我哋12:30集合，

呢餐好地道，有牛肉麵、排骨麵、花枝丸等，

好抵食，NT373，每人唔駛NT90。

第二件包車唔滿意事件：我一早講明6:10機，

要4:00去到機場，但係司機完成集集行程，

就車我哋嚟機場嘞！嚟到都未夠3點，點算呀？

台中機場好似錦上路西鐵站一樣，

四野無舖頭，機場裏面只係得一間極細手信舖，

航空公司又唔俾咁早check in，上網又要攞密碼，

終於無無聊聊坐咗喺機場成個鐘，將D行李執完又執，

D相睇完又睇，終於喺5點鐘可以入閘嘞，

終於去到一個現代化有duty free嘅候機室嘞！

走嘅時候都見到貼心服務，反正要等，

各位可放心將電子用品放入櫃裏面差差電。

呢個係朋友個 I POD，放咗入去自己Keep好條匙，

唔駛看住佢架，最緊要記得攞返就得嘞！

5日4夜行程完結嘞！今次係個新組合，

團友來自唔同年齡層，唔同背景，

有些是新相識，有緣一齊玩咗幾日，

大家都要學習遷就體諒同互相幫助，

大家嘅經歷為我呢個網誌加咗一個故事，多謝晒！

呢張係我哋少有人齊嘅大合照，

下次，有機會一齊再去玩吖。