台北台中兩頭遊第四日〈上〉

4月25日〈星期一〉

今日要離開歐風小鎮lu，瞓醒先食個早餐，

係半自助式嘅，飲品自已沖，

然後每人有一份公司三文治，好滿足。

〈個水蜜桃係尋日買架！因為係清境名物嘛！〉

食完嘢要去行吓，5分鐘路程就去到英格蘭莊園嘞！

個藍天加埋個氣勢令人嚮往，可惜我住唔起吖，

仲有，我唔鐘無所不在阻住影相嘅電線。

想嚟呢度high tea，每位NT450，呢張係官方圖片。

玩咗一輪，係時候要走嘞！返去執好行李，

民宿職員立即親自車我哋去下一間民宿，

真係好溫馨啊！再見嘞！我會掛住呢度嘅人與物。

呢度住宿嘅價錢公道，一晚樓中樓房〈可住6人〉，

包下午茶、早餐，費用NT5240，

我哋5人，每位NT1048，兌港元約$290，

下面係蜜月房，有無朋友有興趣？

去到普羅旺斯玫瑰莊園都只係11:30，

如果而家出咗去玩，又要趕時間返嚟食下午茶，

於是我哋就提早食，係手造曲奇配咖啡或者花茶，

呢度環境都好靚，走古堡路線，同尋日完全唔同。

〈第一驚喜：我訂房時只列明包早餐，

點知櫃檯話原來下午茶同晚餐都包埋，正！〉

食完嘢就起程去星巴克廣場，滿心歡喜嚟買手信，

點知，呢度真係好細，我完全買唔落手。

呢度有間香草舖子都幾吸引，團友都買到嘢。

可惜我乜都買唔到......唯有轉戰下一個景點。

好期待嚟呢個紙箱王，入面買嘅嘢好有趣......

無論燈、櫈、擺設、郵箱......都係用紙造架。

我今次買到嘢嘞！有排玩lu！

仲可以喺門口度買張名信片，寄俾親朋好友。

經過蜜蜂館，就會去到另一個主打目的地......

呢間舖頭，工具架同窗簾都用紙造。

鐘、卡位、BB櫈、梳化同餐牌都係用紙造。

無錯，又食，啱啱兩點，開始可以叫下午茶，

有趣嘅杯托、盛意粉嘅碟、餐廳嘅佈置，

全部都好精緻，價錢唔算貴，味道都OK嘅。

大家都好開心，好雀躍周圍走嚟走去影相，

好辛苦先叫齊人，為咗今次旅程~~~乾杯！

今日要寫上下集，因為我哋會遇到第二個驚喜。

〈待續..................................〉