台北台中兩頭遊第三日

4月24日〈星期日〉

今日施施然起身，朋友慣咗一定要食早餐，

所以落咗去買豆漿麵包，不過我就唔想食，

10點左右就去退房，諗住預多D時間，

酒店效率快得驚人！事緣係：

我哋交還房咭，工作人員按幾吓電腦，

話我哋團友間房遺留一件衫，前後不消一分鐘，

團友立即飛奔上房，我哋幾個就留喺接待處，

團友落嚟兩手空空，原來喺神不知鬼不覺間，

房務員已將件衫包好交回接待處，真係快！

 

我好鐘意搭高鐵，我哋搭10：54的列車，

準時11：43到達台中，又快又舒服。

為咗想慳時間，我哋選擇食鐵路便當，

我覺得：真係ＯＫ喎！而且仲好平添！

由於唔想咁奔波，所以喺香港已經包定9人車，

直接由台中高鐵站去清境民宿，不過......

我哋準時到達，對方又唔知去咗邊，

包車公司又唔俾我哋司機直接對話，

終於，由11：43等到12：25分先可以成功上車，

白白浪費大好光陰！激死！

終於喺2：10先到達民宿『歐風小鎮』，

嚟到呢度，立即怒氣全消，因為真係好舒服呀！

民宿主人好熱情，立即招呼我哋，

問我哋想休息先定食下午茶先，

我表示想趕去睇 2：30 綿羊 show，

女主人叫我哋先去洗手間，然後立刻車我哋去，

點知呢個時候有 walk in 客人，

民宿主人林先生便立刻親自駕車送我哋過去，

不消五分鐘就到嘞！感激呢！

一去到已經好多人嘞！因為已經開始咗！

去到佢哋正整蠱緊一個女觀眾，

話要賣呢隻羊俾佢，當然係講笑啦！

主角格蘭先生表演剃羊毛，幾分鐘搞掂！

完場後急不及待去影綿羊，好想餵佢哋呀！

不過團友們歸心似箭，所以都無去其他地方就走lu！

途經小市集，睇到呢種水果叫天山雪蓮，

個名咁型，一於試吓啦！味道好似......

雪梨加沙葛，都幾好味吖！

有優惠劵，用嚟食羊奶雪糕，味道可以接受！

回程行嚟行去都行唔完，終於行完條樓梯，

總共 487 級，已經攰到死，但仲有無止境嘅路，

最後返到民宿，原來已經用咗一個鐘。

返去已經 5 點幾，即刻食個 tea 先，

美中不足只可選奶茶或咖啡，想要紅茶都唔得。

呢間民宿真係好 warm ，好舒服，好有人情味。

我真係住到唔係幾捨得走，

我哋5個人住6人樓中樓房，團友都好滿意。

到處都有靚靚小擺設，好有心思呢。

房間望出去係英格蘭古堡，日頭好壯觀。

夜晚都好靚，不過部機唔pro影得麻麻哋！

聽日都好悠閒，點玩法？瞓醒先算啦！

〈後記：由於夜晚無喺民宿訂餐，所以要出去食，

但係諗起條路又長又黑又有狗就煩惱，

趁天未黑就行上去7仔入吓貨，順便睇吓有乜食，

最後都係決定反民宿路口，另一間民宿食一人一鍋，

價錢都OK，每位NT200，同香港食個吉野家差不多，

但係佢哋只可選豬同牛，食完無得加錢加牛肉，

無得買可樂，無得買即食麵，咁點算啊~~~

喺呢個時候，隔離檯台灣人過來放低個麵俾我哋，

仲要係張君雅小妹妹即食麵，好有人情味啊！

我會記住一麵之恩架，有緣再見請你食飯吖！〉