7月30日，關西遊第七天@大阪市內半天遊→香港，晴天

今日仲有大半日，shop乜都shop夠啦！

有本事買都無本事拎啦！〈唔係話我，係話團友！〉

今日行程就悠悠閒閒同埋用盡身上嘅円食豪啲啲啦！

第一站，寄好行李就喺酒店樓下搭巴士去天保山。

好快就到嘞！呢度有乜好玩呢？

 首先會見到海游館，不過我哋只係路過唧！

 我哋嘅目標係：帆船型觀光船聖瑪麗亞號，去換飛先！

 大約坐45分鐘，原價1600円，周遊咭又係免費架！

我哋坐第一班船：11點啟航。 

 仲未有耐開船，又係window shopping嘅時間嘞！

 登船前先影吓佢個靚樣先！

 如果拉起帆果時係咁樣架！

 唔駛劃位，自己隨便揀坐窗口位定餐廳位啦！

 安頓好又計好呢幾日條數之後，出去舺板吹吓海風先！

 坐完帆船，就去坐大觀覽車啦！即係摩天輪呀！

所有旅遊區都會有摩天輪，而且一般都會收得好貴，

姑姐又點會坐呢？呢次原價600円，有周遊咭免費，

咁，姑姐又點會放過呢個機會呢？

大熱天時，唔知會唔會熱得濟呢？

唔怕，原來每一格都有冷氣架！ 

 玩完天保山，係時間等巴士返去嘞！

呢架巴士裏面有好清楚顯示站名架，唔會落錯車啦！

 咁心急返嚟，係要去搵佢 → 蟹道樂吖嘛！

 今日專程嚟食佢個午餐架，聽講午餐比晚餐平好多喎！

我哋點咗「明日香」，每位4000円，

已經係午餐之中最貴嘅餐嚟架嘞！

 真係識做生意，先每人派把扇降降火先！

 先上煲蟹肉鍋飯，好心急呀！

 跟住逐樣登場，個賣相都唔錯噃！

蟹肉冷盤、蟹腳刺生、蟹肉燒賣、蟹肉天婦羅......

 佢哋都應該好多中國遊客光顧喎，食法都有中文指示架。

 跟住佢個指示，食埋呢個美味嘅蟹肉鍋飯先！

 最後要上甜品嘞！原來個綠茶雪糕係即製架。

 製成品，都幾有誠意吖！食得好飽呀！

 臨走仲送粒蟹糖添！〈相信只係包裝，其他同蟹無關嘅。〉

 門口有大量同蟹有關嘅精品、食品同手信。

 都話識做生意架啦！如果你班朋友唔肯陪你入去食餐宴，

仲可以喺門口買隻燒蟹鉗頂住先，700円一隻咋！

依依不捨咁行番去難波站，終於都要攞齊行李返香港lu！ 

 9號月台，搭rapi:t去機場。

 架車幾型！

 上車嘞！好想拉住車門唔走呀！嗚嗚......

好快，好準時架，38分鐘就到達機架啦！ 

 國際線好簡單，就係得呢幾班，香港21:15出發。

 前面係自助check in機，全部都要自助架。

閘內閘外，總共就係得呢幾間舖嘞！

無事無幹真係唔好咁早到機場呀，會悶死架！ 

 入去等住返香港lu，下次再玩過吖！

今次玩得好開心，係一個新組合，大家又鐘意食嘢，

仲有識日文嘅團友，真係方便咗好多，

雖然玩足七日，但係多得各種Pass，都玩得幾平架，

全程機票住宿交通膳食加埋只係用咗$8515咋喎！

咁好玩，下次再玩過吖！

7月29日，關西遊第六天@大阪市內一天遊，晴、雨、陰天

今日起，我哋又用新Pass，就係呢張「大阪周遊卡」嘞！

佢分一日劵同二日劵，由於聽日黃昏機，上午仲有大半日，

所以我就揀咗二日劵，咁聽日去邊都無所謂啦！

呢張乘車咭可以兩日內任意乘搭大阪市之內嘅地鐵同巴士，

2日劵盛惠2700円，仲有28個景點免費入場添，

適合我呢啲唔愛Shopping，鐘意四圍行吓睇吓影吓相嘅人，

好！起程啦！

第一站，嚟到谷町四丁目駅，呢度有連環三個景點架！

一落車就落毛毛雨嘞！嗱嗱聲搵個室內地方行吓先。

第一站去歷史博物館，呢道原價600円入場費，

而家用周遊卡就免費嘞！

呢啲咁有文化嘅景點，我一定唔會買入場劵入嚟架，

因為唔識日文吖嘛，都睇唔明啦！

好啦，開始認識大阪歷史先，順路係由頂樓睇番落嚟，

每層都有啲模型、圖片、文字介紹大阪由古至今歷史時期。

先上10樓，呢度係奈良時代難波宮嘅太極殿。

呢層嘅模型，重現大阪古時嘅房屋，做得好仔細架！

去到7樓，呢度展現嘅係大正未期至昭和初期嘅心齋橋，

道頓堀等地方嘅熱鬧景象，有街市學校屋企商店嘅模型，

好似睇梗阿信的故事咁。〈雖然我知阿信嘅故鄉唔係大阪！〉

離開博物館，就行去對面NHK大阪放送會館玩吓先。

1/F呢層同埋9/F果層都係免費入場架，

不過我哋淨係參觀咗1/F唧！

入面啲遊戲角好似香港啲幼稚園咁！

點解小朋友喺塊藍色板面前跳舞跳得咁開心？

原來經過電視制作，佢就可以同班卡通人物一齊跳舞架嘞！

另一邊有兩個姐妹好認真咁喺度練習讀稿。

原來佢哋係喺度體驗報告新聞，雖然只有短短幾分鐘，

但係製作都好認真喎！完成後仲會燒番隻碟俾佢哋留念添！

怕唔識念對白？唔緊要！呢個只要跁喺度郁手郁腳就得嘞！

唔駛識飛，都可以喺大阪市上空飛來飛去啦！

離開NHK電視台，就向大阪城進發嘞！

由大手門入城，呢個時候，天色已經好轉嘞！

嚟過咁多次都未試過入天守閣，

今次有周遊卡，慳番600円，咁一於上啦！

而且由8樓一直睇番到地下，

我好努力咁喺7樓睇晒豐臣秀吉嘅一生架！

地下正在展出武士頭盔，仲可以親身體驗一下添！

多數都會係小朋友會試，啱啱就有三姐弟試梗嘞！

今日人流唔多，可以影得好完整，

影完呢張標準相之後，又開始落雨lu！

跟住搭中央線到堺筋本町站，

再轉堺筋線到天神橋筋六丁目站，

係時候食飯嘞！先去一間平民飯堂食個lunch先！

嘩！平民喎！幾豐富？不過真係唔算貴架，

四個餐加埋先至3253円，香港快餐店價錢啫！

然後就去對面嘅大阪生活今昔館，

入場費原價600円，持周遊卡就免費。

呢度最特別嘅地方係和服體驗，200円可以著30分鐘。

好多小朋友、情侶、少女、中女......都喺度排隊換衫架！

館裏面嘅設計就係日本人嘅強項：將一層小小嘅室內展館，

利用模型同場景，展現出大阪人過去嘅生活。

見到著住和服嘅人穿梭於大阪古老街道之中，好得意！

另外一邊，仲有啲手工精細嘅模型。

參觀完，分兩組，第一組去行街shopping，

shopping我唔啱，我係第二組，你估我去邊？

行咗10分鐘，到嘞！係天然溫泉浪速之湯。

個入口都好難搵吓，終於搵到嘞！係8樓，上！

先放好對鞋，就可以入場任浸嘞！

好多太太婆婆都喺度浸，好似一個消閒活動咁，

大家一齊聚埋傾傾偈，好舒服呀！

跟住就搭地鐵去惠美須町站，見到兒時偶像「筋肉人」呀！

我記得佢最鐘意唱：

「牛肉麵，頂瓜瓜，味道確唔同，營養又唔差，

我足足食咗三百年，食到慶慶哋，最好就用手嗱！」

行咗三分鐘就到嘞！係通天閣。

 日光日白，睇唔到通天閣上面盞燈係咩色添，

話說每晚燈顯示嘅顏色係代表聽日嘅天氣架！

原本入場費600円，持周遊咭又係免費。

等我同大家介紹一下，大門口呢位，

係筋肉人入面嘅人氣超人「Robin Mask」。

搭lift顯示只有五層，其實第五層已經係91米高架嘞！

五樓展望台可以360度俯瞰大阪市嘅景色。

四處都見到呢個頭尖尖、笑咪咪、伸出腳板底嘅像，

佢係來自美國嘅幸運之神Billiken，

如果想得到祝福，只要摸吓佢腳板底誠心許願就得架嘞！

捐入Pocky個盒度，伸個頭出嚟影相都係指定動作之一嚟。

時間啱啱好，睇埋日落就留去搵食嘞！

梗係走唔甩要經過手信舖架啦！

臨搭lift前都要見到咁大排扭蛋機喎！真係震撼呀！

2/F係筋肉人博物館，話說呢層四圍都滿佈男人的浪漫，

就係有好多筋肉人精品喔！〈乜唔係豆腐火腩飯咩？〉

再見嘞！筋肉人先生！好開心今次喺日本見到你喔！

等lift位都設計得好靚架，好似列車車箱咁！

喺大阪最後一夜，食個日式定食啦！四個餐，6258円。

哈哈，完全忍手之旅，

我諗鐘意去日本shopping嘅人一定好睇唔起我嘞！

呢度已經係所有手信同埋仲要起碼有一半嘢係幫人買架！