北海道仲夏花之旅第八天

七月三十一日〈星期二〉第八天


又係時候要講bye bye啦！點解又要去狸小路呢？



因為要嚟呢度 ~~ 二条市場吖嘛！

好多人都會喺度最後衝刺，寄番隻長腳蟹番香港，
不過我哋只係嚟見識見識都係無買到。

一樽樽三文魚籽真係吸引死人，忍住~~！

兜兜轉轉都係想嚟呢度食個豪華早餐啫！

海膽飯做早餐要3000円一碗架！

睇見都仲回味無窮，
不過講真呢個價錢喺香港可以食個平平哋嘅buffet架嘞！

慶祝今次個旅程順利完成乾杯！

今次好方便，一大一小行李咋！真係從未如此瀟灑過！

話咁快又到機場嘞！今日人流好旺喎，
睇吓幾多人參加多啦A夢親子手工室！

呢邊遊樂場仲多人，到處都聽到小朋友嘅笑聲。

靜香都換咗套浴衣迎接夏天，約大雄去撈金魚囉！

撈完金魚仲可以去捉獨角仙喎！

近年嘅購物慾已經越來越低，
但係見到呢個食蜜食專用嘅叉都好想買番個架！

終於番到嚟嘞！玩得好開心呀！下次再玩過啦！

以下已經係呢八日內所有收獲，幾忍得手！

分類一：Hello Kitty篇，Best buy係三色原子筆，
勝在用完可以喺香港換芯吖嘛！

分類二：藥房篇，Best buy係撒隆適，
因為近年好需要佢吖嘛！哈哈！

分類三：精品文具篇，Best buy係麵包超人散子包......啩！

分類四：御守篇，都話幫身邊朋友入貨架啦！

分類五：食物篇，Best buy梗係富良野蜜瓜啦！
不過個LeTao芝士蛋糕就麻麻地，下次都係買番原味好啲。

佢就係今次行程嘅主角之一嘞！好想打開佢嚟睇吓呀！
不過仲要等多十日先食得呀！唯有耐心等候啦！

 

姑姐又發噏瘋

八日嘅旅程，眨吓眼就過咗嘞，但係返嚟寫個blog，
就要用番八個禮拜先夠嘞！無辦法啦，假期去玩，放完假要還架！

以前同朋友們去旅行，我會負責搵團報名然後通知各位集合時間，
已經功德無量，所以去親玩都有我份架！

近十零廿次，無端端不知不覺間唔知點解我成為咗領隊同團長，
包埋搵地點行程機票酒店飲食娛樂……初初好都有挑戰性同成功感嘅，
但係有時都會遇到失敗嘅經驗架，
例如訂貴咗酒店啦、酒店質素差啦、計錯時間啦、搭錯車啦……但係多謝各位團友都一直包涵，無乜投訴，仲可以保住個飯碗。

我鐘意多人嘅旅程，覺得人多啲好玩啲喎！
尤其是最鐘意有小朋友嘅團隊，
因為見到小朋友開心，姑姐就開心架嘞！

有啲朋友話好怕人多意見雜，有道理！
但係大家都係成年人，有乜嘢講出嚟研究吓，
有時各有所好，甚至我唔介意有啲行程分開玩喎。

我反而最怕人話『無所謂』，但係其實係『有所謂』，
然後希望我估到佢哋個心諗乜，
食貴d唔鐘意、太平又唔好、
行街時間有人要多啲、有人要少啲……唉！有時……人......真係......好麻煩！

無論家庭、朋友、工作，我都堅守原則，我係唔會氹人架！
又或者，我需要再換換模式，試吓一個人出遊，
去一啲唔駛就人又唔駛等人哋就我嘅行程啦！

各位參加過Gin's Tour嘅團友，以上只係有感而發，
大家千祈唔好自己對號入座。 

朋友們成日話四大假期果啲旅行先係我份正職，
其餘果三百日只係兼職，
點解要做兼職？因為份正職係無人工架嘛，
為咗要賺錢去玩，其餘三百日我真係踩行Turbo做嘢架！

下一站，同一個全新配搭去新加坡，
返嚟後再同老拍檔們去馬來西亞玩Legoland，
雖然偶有勞騷，但係我仍然會搞好Gin’s Tour嘅！

北海道仲夏花之旅第七天〈下〉

七月三十日〈星期一〉第七天

連續揸咗兩個幾鐘，大家都忍唔住要搵間便利店醫醫肚嘞！

點解要咁辛苦？因為要嚟北竜町睇向日葵吖嘛！
仲有仲有，就係我恨咗好耐嘅單車之旅呀！
聞說以前呢度借單車唔駛錢架，雖然而家要100円，
但係我都覺得值得，見大家喺度搞呢搞路都未起程，
我一早已經忍唔住出發踩住單車睇花lu。



好耐無踩單車lu，好玩好玩！

自己一個踩咁遠，無人幫我揸機添！

終於追上嚟嘞！仲帶埋三個充當導遊嘅日本中學生添，
雖然佢哋同我哋嘅語言溝通唔到，
但係都好多謝佢哋咁熱心努力嘅介紹。



唔鐘意踩單車的話，可以搭觀光車賞花都得。

最有活力嘅花~~向日葵，終於出場啦！

 睇吓佢幾有理想？


多到都唔知點影好，連續幾個山頭喎！

全程第一次"級"印，好清楚又多墨，我會記住呢個地方架。



最後一擊，行完狸小路，要去食餐好嘅！

又係蟹？無錯！就係蟹嘞！

今晚唔食放題，要去豪一豪~~蟹將軍！

都好好睇睇喎！同蝦蟹合戰係完全兩種感受。



只要有得食，兩種我都鐘意，Yummy！

行咁耐，對腳已經唔多掂，買包"湯"浸浸先，
呢包好搞笑，叫做"肌荒"，團友見到就愛不釋手。

紫色湯，好似薰衣草咁嘅顏色，睇吓都開心啦！

 聽日要去啦！而家去執好行李先。

 

北海道仲夏花之旅第七天〈上〉

七月三十日〈星期一〉第七天

今日個早餐，淨係睇隻蛋都吸引死啦！

每人都有一支日本版益力多架。




成set食晒的話，真係飽都無朋友呀！

佢哋就係好好人嘅民宿主人同佢太太嘞！
真係多謝晒你哋嘅招待呀！ありがとう！

依依不捨咁離開『新白銀莊』，
就即刻去今日第一個景點：『麵包超人館』嘞！
咁早已經有香港遊客，仲主動幫我哋影大合照添，唔該晒！

門口有個小小噴水池，放咗好多玩水玩具任小朋友玩，
雖然我一把年紀，但係我都好想玩埋一份呀！



團友見到咁多扭蛋機，又忍唔到手嘞！



一入門口已經眼花花，麵包超人迷真係不容錯過。

成個家族排好晒隊影張大合照先！



門口呢有特價區，有d只係個盒爛少少，但係差不多半價喎！




睇吓幾精緻？差啲想買晒佢哋返屋企呀！

帶小朋友嚟，仲有呢個活動區 ~ ~ 免費開放中。

不過當日就無乜人幫襯嘞！

喺麵包超人館隔離，會見到呢個笑咪咪嘅婆婆向你揮手......


其實呢度就係『果醬工房』嘞！

無限試食，果醬都OK嘅，麵包仲好食呀！

除咗麵包之外，仲有魚仔餅添！

離開果醬工房，停車場指示推薦去麓鄉展望台，
我哋見反正有時間，咪一於上去睇吓囉！

上到去先見到一片麥田，軟綿綿咁，一陣風吹過嚟，
整片金黃色嘅麥田好似玩人浪咁，好想瞓落去呀！







再行前啲，有一排排七色花田喎！

梗係要有呢區嘅代表人物『麵包超人』啦！

離開呢度，要開幾個鐘頭車架，去入入油先！
呢度係自助嘅，自助？我又點識呢？
於是職員就出嚟指示我哋嘞！

半自助，我負責入錢，然後揸住條喉，
感覺入完就叫職員過嚟，最後負責找錢，完！

入滿油，出發去睇向日葵lu，Go Go Go！