再遊新加坡〈第一天〉

第一天：7月25日〈星期一〉

期待已久嘅新加坡之旅正式開始。

呢日我哋已經預早兩個半鐘去到機場，揀咗去『潮樓』飲茶，
因為方便望住Jetstar個櫃位開始check in未，一見到佢開就由大人落去排隊，
我哋一共12人，分兩條龍排，地勤要求朋友個小朋友都落嚟，
咁朋友就打電話叫小朋友即刻落嚟啦，點知佢又話要俾佢睇埋hand carry上機嘅背囊，
又要跑上去攞多次，我哋喺隔離見到咁情形，就call定D小朋友同帶齊隨身行李，
但係我哋條隊就乜都唔駛睇，淨係問我哋有無帶玩具槍，真係激死！
搞掂後上去埋單就馬不停蹄去登機閘口，去到已經話最後召集，
真係非常趕，由呢一刻開始，知道唔可以睇少12人嘅威力！

為咗平，我哋左揀右揀都係搭Jetstar。

由於無飛機餐，落機後大家都餓嘞，

立即去T2搵亞坤，機場咁大，

大家都行咗幾耐先搵到，多士真係好味架！

喺亞坤對面有呢間Supermarket：FairPrice，

聽講係國營所以價錢會平D，即刻入去行個圈，

見到有叻沙杯麵，諗住買兩個試吓好味就入貨，

點知之後幾日間間超市都無貨，呢個故事教訓我：

見到就要買，唔好諗咁多！

第一個景點係呢個幾層樓高嘅滑梯，

要玩高果個要先消費，矮果個就無限任玩。

於是四個小朋友就好開心咁狂玩，真係易滿足。

帶呢D小朋友去旅行真好，個個都自己照顧自己，

仲會幫我哋做D厭惡性工作，例如：

買地鐵飛同退地鐵飛，Thank you very much！

呢張飛包括SG1按金，好彩其中7人已經有EZ Link，

每次去邊都係只需要買5張飛同退5張飛啫。

呢幾張就係朋友借俾我哋嘅EZ link card，

真係方便不少又平咗，真係唔該晒。

如果唔係，就每次退飛後都淨埋一大堆散銀，

不過都唔駛擔心，呢度消費咁高，好快駛晒！

今次市區住2晚V Hotel，算係新嘢，我哋book 3人房，

聽講網上D人嘅Comment唔太好，

但係我覺得幾OK喎：起碼干淨，超方便，又平，

3人房都算夠大，而且沖涼花灑水力充足，

可能上年住果間經驗太差，呢個價錢算好滿意嘞！

休息一陣後，第一站見到雪糕三文治，

梗係要食啦！好唔好味？睇吓諾怡D戲咪知囉！

Sorry喎兩位姪女，無錢住呢度，都影張相啦！

啱啱落機，見到樣樣嘢都覺得好新鮮。

無錯嘞！正路第一站都係去探吓魚尾獅架啦！

Post王又出場嘞！

影完一輪相，正路都係去老巴剎食嘢啦！

睇落好靚，但係真係唔值得喺呢度食沙嗲，超貴！

今日行程都幾豐富，由朝行到晚，

番到酒店雙腳痛到C，

聽日仲勁，要早D休息吓嘞！