再遊新加坡〈第三天〉上集

7月27日〈星期三〉

今日原定行程係上午去牛車水，然後中午去Hyatt食buffet，下午去wild wild wet，夜晚先至換酒店，
但係，天有不測風雲，朝早落大雨，而且舊烏雲睇嚟有排都唔走，
於是領隊決定立即變陣，決定直接搭車入聖陶沙check in，
天氣好的話先去wild wild wet，各位團友極度合作，立即起程。

去到Harbour Front Station，轉去VivoCity，

記住先攞張hotel voucher俾D職員睇，

咁佢哋就會俾D免費入島車飛俾你，

每位慳番SG3，又可以食多個甜品lu！

雖然兜咗少少路，但係最終都去到我哋嘅目的地：

Festive Hotel：係一間啱晒小朋友嘅酒店。

大堂七彩繽紛，等check in時都唔會悶。

由於太早，未可以攞房，所以我哋去咗玩，

夜晚終於入到房，小朋友最鐘意張碌架床。

張床都幾大，足夠兩個一齊瞓。

旁邊果張雙人床都好大張，另一室友又想瞓梳化，

所以，果晚我就一個人獨佔大床嘞！

個浴室足夠俾佢哋兩個小鬼一齊沖涼，

都好，可以慳D時間，如果唔係，

四個人排隊沖涼都幾麻煩。

仲有個大露台晒衫，我最鐘意呢個設計，

亦都係因為咁，個個瞓晒我仲要幫兩個小鬼洗衫，

明明係去渡假，但係仲辛苦過番工。

我知道家庭房如果有小朋友入住的話，

都會有一份小禮物，但係我見我哋3間房都無，

於是就落去大堂問吓，職員就即刻補番俾我，

雖然唔係乜嘢貴嘢，但係小朋友見到都好開心。

下集會補番下午個重點活動：wild wild wet。