再遊新加坡〈第四天〉

7月28日〈星期四〉上集

今日嘅重點行程係環球影城，

由於要有氣有力玩，所以大家去食個飽飽早餐先，

餐廳食物都算ok，但係就太多人排隊嘞，

我哋一早知道會係咁，於是7:30就去食，

好彩住3樓，同餐廳同一層，方便好多。

我哋每房包兩個早餐，其餘團友要另外俾錢，

但係......真係估唔到，大人每個早餐居然要SG28，

『食龍肉咩？』我哋第二朝就無食lu。

酒店行去環球入口非常方便，點都影張代表作先。

第一站睇『電影特效片場』，兩個妹妹居然嚇到喊，

我覺得好值得睇，但係，唉~~~咁仲點玩落去呀？

啱啱先喊到好似豬頭咁，

轉頭見到馬達加斯加個場景，又變番post王。

跟住去玩MUMMY，主要係嘉頤想玩，

呢個時候，又係姑姐出場陪玩嘅環節嘞，

呢個係好似Space Mountain一樣嘅室內過山車，

好玩過Space Mountain，個頭無撞得咁犀利，

講真，雖然我唔驚，但都唔享受呢d咁刺激嘅遊戲。

諾怡當然唔敢玩啦，不過夠膽企埋去影相都好勇lu。

然後，玩呢個大人細路都玩得『旋轉飛盤』，

簡單d嚟講：即係咖啡杯。

然後玩咗呢個超低能、勁白痴嘅揸車探險遊戲：

『尋寶奇兵』，奉勸6歲以上都咪玩。

8歲同12歲嘅朋友：係咪真係咁enjoy呢？

順路去失落的世界，我堅持唔睇未來水世界個show。

我又陪嘉頤同朋友仔玩『天幕飛行』，

雙腳吊吓吊吓幾得意，不過要坐向前先好玩。

呢兩位朋友唔敢玩，於是就去玩『恐龍騎士』，

之後，大家都好似心口掛個勇字咁，

一齊排隊去玩『侏羅紀河流探險』，

我哋早有準備著晒雨褸，但係都有人濕晒。

然後又睇4D：Very Good，又係好睇過迪迪尼，

出嚟後小朋友玩『魔法轉輪』，呢個...無意見，

跟住同驢友傾偈，雖然唔係講東話無咁傳神，

但係工作人員嘅專業態度好過迪迪仔好多。

去到馬達加斯加，尋找人氣設施：木箱飄流記，

換句話嚟講：即係小小世界，嘆冷氣時段。

呢兩位朋友都幾鐘意睇荒失失奇兵嘅。

去對面坐埋『朱利安國王旋轉舞會』，

今日嘅行程就差不多完結嘞。

臨走前，我哋同『亞歷、馬提、邁文、哥利亞』

一齊影張大合照先啦！

短短幾個鐘頭，就玩晒樂園裏面所有嘢嘞！

只有兩個過過山車無玩到，因為個個都怕怕，

相信如果唔係有新嘢，短期內唔會再嚟，

整體上，人唔算多，樣樣都唔係幾駛等，

而且大家排隊都好守秩序，感覺良好，

唔會好似香港迪迪尼咁成日聽到同胞講：

『唔該借借！』甚至一手推開你。