再遊新加坡〈第五天〉

7月29日〈星期五〉

今日要轉酒店嘞，點解要轉？

第一個原因係想住唔同類型嘅酒店，

另一個主要原因係，星期五六住Festive會貴好多，

為咗想盡用設施，今朝一早去游水，

由於Festive個泳池好普通，

所以我哋就執晒嘢去隔離嘅Hard Rock Hotel玩水。

呢度有人造沙灘......

又有滑水梯......

今日太陽伯伯又好勤力......

人都醒神d，唔覺意又擺post嘞。

上午游完水，立即執好行李去轉酒店，

由於人多行李又多，酒店職員建議我哋搭的士，

呢一程真係貴，只係轉個彎上山，就成SGD10，

但係，當去到酒店門口，就已經覺得好值得。

呢度好舒服，大堂唔需要冷氣，全自然風，

入到房，好靚！張床超大，小朋友都有加床。

浴室好大，幾個人游完水一齊沖都得。

海景房比山景房貴$500一晚，值唔值得？

打開窗，露台望向泳池同沙灘，我覺得值！

酒店有免費Shuttle bus直接來回Harbour Front，

真係好方便，我哋去vivo city盡快食lunch，

因為要趕返去玩吖嘛。

搭車返入去後，同另一隻獅影相留念先。

主要係玩Luge & Skyride，由於人多，

可以買家庭套票，平少少。

出發前先戴頭盔，係一個幾有速度感又安全嘅遊戲。

可惜諾怡唔夠力，只好與我同車，

但係搭順風車價錢一樣，無得退架。

小朋友一致讚好，玩完搭吊車上去再玩一次。

玩完後又返酒店泳池游游水，

然後極速去牛車水，因為前兩日落雨，

今晚就補番去啦！去到最主要都係買豬肉乾。

諾怡話鐘意香味多過林志源，

佢有point架，係因為林志源較多油喎，贊成！

買完嘢就去食炒飯，平平哋但係好有鑊氣。

食完飯去食刨冰先，呢個係乜嘢味道呢？

係榴槤味呀！所以今餐又要分檯坐嘞！

呢款又好特別啫，香港應該無得食，係花生味。

椰汁馬豆糕好香好甜，可以安哥。

聽日要走lu，今晚要好好收拾行李

~ ~ 同心情番香港嘞。