我又嚟嘞雪雪雪雪......北海道〈第八天〉

我又嚟嘞雪雪雪雪......北海道〈第八天〉

12月28日，星期日

今日要進入行程嘅另一階段嘞：
A組朋友要返香港；而我哋就會向道東進發嚕！
之前幾次出去，都可以將大件行李寄存喺酒店，
但係今次，突然個經理話唔得喎，搞到我當堂失晒預算，
從未如此咁死纏爛打過，終於講到牙血都出埋，
佢終於應承俾我放低一件行李嘞〈當然態度唔係幾好啦！〉

因為A組朋友太多行李嘞，所以同佢補張指定席去機場先！
好啦！今朝去釧路架車劃唔到位，要早啲去排隊先，
A組，拜拜嘞！香港再見！

好好彩上車有位坐，好少搭咁長途車，食番個鐵路便當先。 

北海道三味冬御膳，純粹貪得意，兩個人Share就得啦！ 

連個便當都咁認真，有好詳細介紹喎！〈不過我唔識睇。〉 

賣相都唔差喎！味道都OK架！ 

便當可share，但係雪糕就no way！我要獨食！Wakakaka...... 

搭成四粒鐘，終於到達釧路嘞！

人生路不熟，都係Book番Hotel Route Inn啦！就喺JR站對面咋！ 

抖一陣，出去探吓路先，嘩！乜都無做過就天黑黑嘞！ 

出去搵定聽日嘅交通先！原來就喺對面Super Hotel隔離咋！ 

Super Hotel旁邊有間巴士中心，入面可以查到釧路嘅交通資訊架！ 

仲可以自助買車飛，睇啱路線同價錢就自己搞掂啦！ 

確定路線之後，我哋就去搵嘢食嘞！

但係......點解......條街......無人嘅？ 

又無舖頭，唔係慘到要去Lawson呀嘛？ 

行咗好耐，終於見到間食肆嘞！剎呀！ 

係一間喺日本好多分店嘅「山內農場」。 

裝修又幾靚噃！會唔會有咩好嘢食呢？ 

我曾經一度懷疑：釧路究竟有無人住架？ 包場？

真係唔識形容佢好唔好食...... 

唯有，好食食多啲，唔好食就食飽啲囉！

無乜好做，唯有沿路返酒店大浴場浸吓洗吓衫啦！

以為道東會好凍，原來都唔係啫，都有1.6度吖，好暖喎！