我又嚟嘞雪雪雪雪......北海道〈第七天〉

我又嚟嘞雪雪雪雪......北海道〈第七天〉

12月27日，星期六

今次有包自助早餐，我就最鐘意有自助早餐嘅酒店架嘞！

近來好多間酒店都轉用呢種碟，睇嚟可以防止浪費食物喎！

好似咁，想食嘅嘢每種攞一件，好好睇睇又唔會浪費。 

就啱shuttle bus時間就check out嘞！等車時見到個景好靚呀！ 

車未到一定要影返張相啦！ 

嚟果時要去小樽築港等車，回程原來有車直接去小樽，

而且我哋仲係包車添，四個人坐晒成架旅遊巴呀！ 

沿途見到呢個天色，靚到吖！ 

但係點解有啲離愁別緒嘅？因為A組朋友聽朝就走嘞！ 

到小樽後再上激安補補貨，然後立即返札幌。

到札幌放低行李後，我哋就兵分兩路，

因為今日仲有好多嘢要做呀，

我同團友去買之後幾日嘅JR Pass；

我個人覺得北海道嘅服務好過九州少少，

啲員工好似熟手好多，好彩大部份都劃到位，好快搞掂！ 

另一組朋友就去排隊：Encore十勝豚丼！ 

大家飲杯！好好味嘅十勝豚丼，值得再來一次！ 

食完就馬不停蹄去最後衝刺啦！〈A組朋友〉 

第一站去咗大丸，果度啲Agnes b袋平到離晒譜，

跟住再去狸小路一帶，因為想睇吓其他分店啲袋有無特價？ 

原來只有大丸店至咁平，其他都係原價，

於是又去狸小路掃手信，係一箱箱咁掃。 

話說又有小故事發生嘞！大家買呀買，

一箱箱、一袋袋咁拎走，我已經帶個細喼幫手拉架嘞！

買完所有手信後，我哋就由地下街走，

就到地鐵站時，我見到藥房有我想買嘅嘢，

於是大家就停低喺道放血，

喺俾錢果時，呀B組團友突然好緊張咁問我「我個背囊呢？」

我叫佢冷靜啲，成地都係我哋嘅行李，搵吓先啦，

佢二話不說就衝番上狸小路方向，我用盡全力去追啦！

跑到差啲氣絕身亡，終於跑到去之前我哋喺路邊坐過果張櫈，

最神奇嘅係，我哋見證到日本人唔會貪心嘅傳說：

離開咗起碼15分鐘，個背囊依然好堅毅咁喺道等主人返嚟！

其實我一路跑一路諗：點算呢？唔見晒啲錢、證件，點算？

今次真係好彩，之後要小心啲嘞！

經過呢件咁刺激嘅事，我哋都無晒力量嘞，

是但食個牛肉飯就去執行李啦！ 

好彩有帶手提行李磅，執嚟執去，朋友都係超重，

於是，我就幫佢哋哽啲重嘢啦！