我又嚟嘞雪雪雪雪......北海道〈第六天〉

我又嚟嘞雪雪雪雪......北海道〈第六天〉

12 月26日，星期五

一瞓醒打開窗，嘩！仲勁過尋日喎！

睇嚟要過對面馬路都有啲難度喎！

食早餐大過天，乜都唔好理，食個勁豐富嘅早餐先！

嚟個close up先！好正架！
其實今次都住得好抵，我喺Agoda訂，用盡積分，
唔計早餐，每位都係$137，反而個早餐，就要每位$110喎！
不過算啦！個早餐咁豪華，都係值得嘅！

食完早餐就要出發嘞！

今次有咁多時間，於是就book咗去滑雪場玩吓啦！

一般滑雪場都幾難去，咁我就搵個近近哋架啦！

滑雪場喺小樽築港有免費shuttle bus接送，

但係網上顯示嘅地點唔係幾詳細，

見有好多人唔係排隊咁等車，又唔係預約制，又無任何指示，

都幾無助吓，於是我就冒著大雪出去視察一下，

好彩，終於都見到我哋架車嘞！而且唔客滿，有位坐。

坐咗大約一個鐘，終於到達今次嘅滑雪渡假村：Kiroro Resort嘞！

前幾日都住商務酒店或者舊式溫泉旅館，相比之下呢道好豪華喎！

今晚住4人房，每人一張床，
比較起韓國嘅滑雪屋，房間唔算好大又無廚房，
但係起碼地方都算寬敞開行李絕對無問題啦！
住一晚包早餐，每位$872，都算OK啦！

搭果一陣車，朋友你有無咁攰呀？

咁大個窗台，我就豪無目的咁坐咗好耐嘞！渡假嘛~~~

出發去玩吓先，由於樓與樓之間要經過戶外，
所以酒店喺通道出口提供大衣，都幾貼心吖！
期間發生小故事一則，話說我著咗其中一件大衣出外，
指定動作係：「伸手入袋」，居然摸到條鎖匙喎！
我諗一定係之前個住客唔小心留低啦！
唔見鎖匙都好麻煩喎，所以我哋咪好心拎去最近嘅櫃台囉！
但係對方英語非常有限，雞同鴨講一大餐，唉~~有待改善呢！



嗱！呢道兩旁有商店、遊戲機店同餐廳，
不過都係果句啦：靜過鬼！

我哋又唔識滑雪，諗住玩雪上電單車但又要就shuttle bus時間，
於是，我哋決定先去玩一個最受歡迎嘅設施~~~

登登登櫈：就係呢個兒童玩雪區嘞！每位600円全日任玩。

哈哈，對於我哋呢啲長者，呢個程度啱架嘞！

仲有必玩嘅滑水泡呢！

睇吓大家幾咁開心！

雖然話任玩，但係佢一定唔會蝕，因為大家都唔玩得耐，

點解？鬼咩，衝落去係好開心，但要自己拖返啲器材上去呢！

之後又見到香蕉船，好想玩呀！

不過又要另外收費，好貴呀，唯有放棄啦！

呢個就係香蕉船嘅場地嘞，一個圈大約幾分鐘咋！

一眼望去，周圍都好似細個收到果啲聖誕咭嘅風景咁。

沿途返去搵嘢食啦！又係一個好Delay嘅Lunch！

唉~~~成個渡假村有好多間食肆，但係只有呢間正常啲，

起碼有選擇，而且價錢算OK，呢道都食咗成4850円架！

價錢都唔係最大問題，食物水準至係關鍵，

經過呢餐，我哋直情唔駛擔心今晚食乜，

因為我哋已經決定：返去Resort Market買杯麵！

返房各自活動，我四圍逛逛，認識吓個Resort；
有人瞓吓覺；有人去雪地影吓相；然後又一齊玩啤牌；
集合後一齊清晒檯面啲食物先。

最後，我哋又約埋去浸溫泉，每位900円，
溫泉都幾大，有好多種泉水，室內室外都有，幾好玩。
呢道仲個大浴場係免費嘅，聽朝一於望住雪景浸浸先！