我又嚟嘞雪雪雪雪......北海道〈第九天〉

我又嚟嘞雪雪雪雪......北海道〈第九天〉

12月29日，星期一

食個免費早餐先！今日係重點遊，要打醒十二分精神呀！

 出門口影返張酒店相先，呢間都OK架！

 酒店前面馬路左手邊就JR釧路站。

面向右手面就係Super Hotel，前面就係巴士站嘞！ 

 入去買張飛先，今日個行程單程車費1000円。

 我哋要搭鶴居線去探朋友呀！

 到嘞到嘞！落車有間手信舖，不過唔行住，因為......

 要過對面馬路探朋友嘛，呢道叫做鶴見台。

 但係朋友仔係好珍貴架，大家要好好守規則至得！

 我知我無緣同佢影相架嘞，唯有同兩個A貨影住先啦！

 見到嘞見到嘞！好多好多喎！

 喺雪地上見到佢哋，真係襯到絕架！

雖然明知會嚟探佢哋，但係怕重所以都係無帶長鏡。

 影唔到佢哋跳舞，但係一次過見到咁多都已經好滿足嘞！

 企到腳都冰晒，嗱嗱聲去手信舖暖吓先，原來二樓係餐廳噃！

 好有心思嘅Menu同好甜嘅熱朱古力。

 嘩！唔知捕幾耐先可以影到張咁嘅相呢？

搭返鶴居線去釧路JR站，然後行去和商市場見識吓先。

去旅行最鐘意行吓呢啲街市嘞！有大量水果啦......

有唔同種類嘅蟹啦......

時間充足嘅話一定要買返隻返酒店食呀！

呢個街市有個特色，就係周圍都寫住「勝手丼」嘞！

嘩！有咁多選擇，可以每樣食少少，啱晒我呀！

最後我哋揀咗幾樣刺生，但係就無買飯底噃！

我預備好嘞......！真.....係......好......好......味......呀！

食完嘢後就去等車嘞！今晚住阿寒湖鶴雅，酒店服務一流，

有免費shuttle bus接送，只要send email去，好快有回覆，

而且職員英文很好，我中間曾經改過回程shuttle bus路線，

對方都好快回覆，淨係呢樣嘢都高度讚揚啦！

到嘞！今晚我哋住別館，真嘅，既然嚟到阿寒湖，

就算貴啲都要起碼住一晚鶴雅，不過講真都唔算貴吖！

大堂都幾靚，等check in時間都OK，職員英文好好。

我哋今晚book咗湖景房，一入去見到個景，好靚呀！

雖然湖面已結冰唔係好覺佢係湖，但係咁又有另一種美態啫。

房間好寬敞，而且張床非常非常好瞓。

勁鐘意呢個休憩偏廳，可惜根本無乜時間可以坐喺道賞湖吖！

房間啲設施都好齊全好乾淨架。

仲好貼心添！早幾年嚟都唔覺架，老花鏡喎！實用呀！

落去大堂行吓認識吓先，聽講呢道有免費薯仔做茶點架，

但係今次我見到嘅係免費溫泉蛋喎，仲正！

有興趣嘅，自己動手做啦！不過手快有手慢無架！

仲未夠鐘食飯，唔怕，有街行就得嘞！門口就係溫泉街啦！

都幾多嘢買架，我都有喺度買咗啲手信添。

朋友，大家有無見過咁......可憐嘅雪人呢？

今晚個plan包埋dinner buffet，一泊二食每位$950，我覺得好抵喎！

第一眼就俾佢吸引咗啦：好可愛嘅甜品區呀！

Wide Shot！

食物種類有好多，質素都好好。

可惜隨著年紀大咗，戰鬥力已經下降好多嚕！

食完梗係要去浸啦！樣樣都好，就係套衫真係唔靚囉！

好似夜晚去兼職清潔執房咁呀！出發啦！

我哋要去主樓果邊浸溫泉，途中經過嘅地方放有好多藝術品噃！

顯示呢道地方真係好大呀！

主樓都有一個大堂，風格同別館好唔同喎！

浸咗第一輪，我哋上嚟抖抖先，因為要等清潔地方，

然後男女浴場互換，咁就可以浸晒所有唔同嘅浴池啦！

等候期間，可以嚟睇吓魚啦......

可以嚟飲吓泉水啦......

去神社參拜吓啦......

去行吓街買吓嘢食吓雪糕啦......

浸溫泉梗係要飲牛奶啦！香蕉奶又如何？

仲有時間？去洗吓衫囉......

不過比起商務酒店貴少少，要300円一次。

又或者可以去吸吓印仔，好多款式可以揀架！

好啦！終於夠鐘嘞！入去鎖好對鞋先，呢個鎖好待別喎！

可惜溫泉入面唔可以影相啦！呢道個溫泉真係好正！

下次再嚟北海道，我都想試埋其他鶴雅嘅酒店！

極力推介！