我又嚟嘞雪雪雪雪......北海道〈第十天〉
12月30日，星期二
今朝個早餐，都係喺尋晚間餐廳，
即係話：都係水準之作啦！
仲要望住個咁嘅雪景嚟食！真係無得頂呀！
好彩的話，可以坐到窗口位，真係會坐足成朝唔捨得走架！
酒店裏面有個有水準嘅雪人，比起尋晚見到果個......
食完未夠鐘check out可以四圍再行吓。
其實應該住三日兩夜嘛，阿寒湖應該仲有其他好嘢玩嘅！
就算唔出去，喺酒店坐吓hea吓都好夠嘆啦！
係咪好有藝術氣質呢？
好唔捨得都要走嘞！因為預約咗免費shuttle bus去美幌。
架車總站去北見，我哋喺美幌就落車，咁就唔駛搭番轉頭嘞，
一落車，嘩！又落大雪呀！呢程真係滿足晒啦！
因為唔知雪地路面交通如何，
所以本身劃咗嘅指定席係預鬆咗好多時間嘅，
仲有成個鐘，無謂坐喺度嘥時間啦！呢道方圓十里都無人架，
咁我就決定去改飛啦！就算無位坐都係一陣啫！
呢個係一人車站，即係賣飛、check飛、廣播、開門閂門......
都係同一個站長搞掂晒，仲有仲有，睇吓個鐵閘幾有型！
等到差不多夠鐘先行出去等車，因為實在太凍嘞！
雪地加上咁慌涼嘅古老車站同咁舊嘅列車，個畫面好靚呀！
我哋就係搭呢架Local Train，無指定席，但係就有大把位。
最鐘意呢啲可以睇住駕駛室嘅列車架嘞！
好快就到嚕！網走喎，無人都好正常啫！
其實我對呢個地方無乜槪念，而且網上資料又唔多，
一心諗住嚟到至算，反正都係經過玩玩啫，所以乜都無plan，
出閘後喺車站攞啲資料又喺附近睇吓交通地圖先。
去到酒店，由於佢哋行會員制，做會員就可以3:00 check in，
就算明知酒店都無乜人住，我哋都一定要4:00至可以check in，
咁問吓職員附近嘅旅遊資訊啦，點知原來今日無巴士去監獄，
唯有搭的士啦！呢個時候，有兩個女仔過嚟打招呼，
仲要用廣東話喎，哦！香港人，他鄉遇故知，真係開心晒！
佢哋同我哋兩個一樣，對呢個地方豪無計劃就嚟玩嘞！
於是，我哋四個人，去今日唯一開放嘅景點：「網走監獄」！
喺網上print咗coupon，去買飛果時會有折頭架！
大門口個獄卒......好假喎！
本來想去食個監犯飯架嘛，點知，今日飯堂休息喎！
就算世界停頓，日本嘅手信店都係年中無休嘅，即使喺監獄！
入面都係呢啲「蠟像？」我諗呢個係檢驗食物嘅懲教人員。
呢個係探監房，唉！睇吓你仔細老婆嫩就咪犯事啦！
呢位仁兄見梗律師，咁睇嚟：佢應該有啲家底嘅。
咦！點解監獄有小朋友嘅？其實佢哋係獄卒嘅家人嚟架！
呢道天寒地凍，喺道坐監就係一個要佢哋感受痛苦嘅懲罰，
以前啲犯人就係咁一排排凍冰冰咁瞓架嘞！
以前食飯都係要輪流分組出嚟「立食」架。
閒時梗係要勞役吓做吓啲體力勞動嘅工作啦！
監房有五行，每行兩邊都排滿咁多個倉，真係有咁多犯咩？
呢邊係室內嘅，多人一房證明佢哋只係一般犯啫。
如果係重犯或者喺呢道唔聽話，就要住個人倉架嘞！
同樣都要做嘢嘅，呢個朋友就喺道黐梗信封嘞！
沖涼都有規則架噃，沖果時大家唔準傾偈，
除衫、沖水、入浴、剃鬚，一共不多不少只可以用15分鐘，
而且池水好深，確保大家企好沖，仲要保持舉高手添！
然後，我哋去另一邊參觀：係現代嘅監獄。
入門口有部相機，大家可以喺道影張監犯相留念架！
又可以著吓監犯衫扮吓嘢，都幾搞笑！
呢道有啲現代模擬監房，呢個係共同室，都好企理吓！
現代同樣有獨立室，好過香港啲劏房好多啦！不過無自由呢！
無無聊聊行咗幾個鐘，約番兩個香港女仔搭的士返酒店附近，
無得揀，食牛肉飯啦！食完就可以check in嘞！
由於呢道咁偏僻，就算book大大間房都好平咋！
放低行李後，我哋決定......瞓晏覺！
瞓醒行去超市方向，如果沿途見到有餐廳就順便食飯啦！
朋友，咁環境，有可能有嘢食咩？
終於行到超市嘞，好似見到希望呀！
感動到想喊呀！好似市區嘅超市一樣咁多嘢買喎！
終於，我哋掃咗啲壽司同士多啤利返嚟，又好正喎！
最正係，支汽水特價，港幣3蚊雞咋！
可能好多人都會話我蠢，點會12月嚟網走架？
我都知破冰船未開；我都知「北の新大陸発見」又未開，
但係，我怕且無乜機會喺農曆新年假期嚟北海道〈無腳嘛！〉
所以咪趁今次咁長嘅假期嚟見識吓囉！
