第十二天及第十三天@曼谷朋友團

2017年2月6日及2月7日

其實前日起就已經轉咗場，轉去同一條街住Cape House，

朋友話Cape House靚好多，早餐又好味，咁一於下次再嚟啦！

送E組上的士去機場，拜拜，香港見！

我哋放任去shopping啦！

跟住放任去食啦！

全日買買買，中場返酒店食免費茶點，又食食食啦！

食完咸點再食甜品。

再請職員幫我哋開兩個水果，今晚果餐都唔駛食啦！

有圖有真相，在下個餐，飽呀喱！

我唔客氣嘞！食飽仲有行程呀！

朋友去夜拜四面佛，我又去見識吓。

再行超市，連船麵醬都買到嘞，好嘢！

我嘅收獲，犀利喱！

兩個人嘅行李，都幾壯觀架！加埋真係多過66KG呀！

真心鐘意呢間酒店，下次再嚟泰國都會住番呢道。

13日之旅，順利完成，下次再玩過。

第十一天@曼谷朋友團

2017年2月5日

今朝晨早出發，苛搭BTS去集合點嚕！

剛剛好準時到達，我哋5個香港人，另外仲有5個韓國人，

今日去Silom Thai Cooking School參加咗泰菜烹飪班，首先去行街市。

老師去菜檔教我哋買各式各樣嘅香料同辣椒。

老師係一個年輕人，我覺得佢個樣好面善，諗諗吓叮咗一聲，
啊！係似丁子高，佢聽到話，之前有其他人都講過。

每人一個菜籃，每人都要負責拎少少嘢，
籃入面有一枝好凍嘅水，用嚟冰鎮住啲餸，然後又可以飲。

去到第一件事，先將個人貴重物品鎖落Locker，
每格locker都有唔同鎖匙扣，好靚呀。

跟住去後面洗洗手。

呢個飯廳啲佈置好有心思，啲餐具好似古董咁。

大廳外嘅戶外走廊，打橫排開曬啲煮食爐，喺道炒餸唔會太熱。

大廳旁邊係教室，入到去已經預備好曬啲廚具食材嘞！

第一道菜，有蕃茄、指天椒、南薑、檸檬葉、草菇、魚露......

無錯嘞！係冬蔭功呀！由於玩法係自作自受式，所以自己乾咗佢啦！

第二道菜：Pad Thai，都好好味架！

仲有：清清哋嘅木瓜沙律。

馬沙文咖哩飯〈massaman curry 〉，都唔太辣嘅。

仲有老師整嘅芒果糯米飯，消消滯！
食完咁多道菜，真係飽到震！

多謝老師指教，今日真係學到好多嘢！

自己的事自己做，自己的餸自己食。

玩咗半日，食咗咁多嘢，每位1000銖，好抵玩！

下午去行翟道翟，然後又去T21食飯，
因為其餘三位朋友聽日要返香港，咁今晚就兵分兩路啦！
佢哋去shopping同按摩；我哋就去呢道，洗手先入場。

嘩！貓，全部都係貓，我哋又嚟貓cafe嘞！

泰國貓cafe勁抵玩，並無最低消費又唔限時，真係好親民，
就係咁，我哋玩到關舖，認識咗好多貓貓。

第十天@曼谷朋友團

2017年2月4日

今日又包車，都係娜姐嘅車，

價錢比較平，不過講真架車唔夠尋日果架咁舒服。

團友C今日要返香港嚕，送完我哋車佢就去機場嘞！

今日第一站先去美功鐵道市場。

我哋架車剛到車站附近時，司機突然好緊張，

猛咁叫我哋落車跑過去，原來剛剛好有火車經過。

一落車就見到大家人頭湧湧個個高舉手機。

火車路過之後，軌道又回復平靜囉。

其實呢條火車線路仲係運作緊架，下一班車14:30。

軌道另一邊係街市，真係好多人，收嘢時真係要爽手啲嘞！

有乾貨有濕貨，由於有好多魚賣，空氣中充滿住街市嘅氣味。

水果同蔬菜種類好多，而且價錢好平，
我哋都買咗好多龍眼同芒果返去食呀！

行完要去搵食啦！肥哥哥好叻架，整梗乜呢？

係徒手畫卡通Pancake呀！

雖然今次無去食榮泰，但係都要去食吓魚蛋粉嘅。

我估喺泰國求其一間都好味嘅。

第二站就係去安帕瓦水上市場嘞！

話時話嚟泰國咁多次，我都係第一次行水上市場咋！

我哋六個人，包咗一隻船行一個圈，都好舒服喎！

沿途見到好多高腳屋，好似大澳。

一定唔少得有寺廟啦！

呢間好靚靚，不過我覺得坐喺出面食嘢好似好危險咁嘅！

以前啲旅行社廣告相都會見到類似嘅圖片架。

其實我覺得呢道都幾好行架，好多嘢買。
不過我就唔會喺道食嘢嘞，感覺衛生情況非常麻麻。

今晚最後一站，喺Atelier @ Pullman食Buffet ，
係喺Eatigo訂位，有5折，都算幾抵食啦！

食物種類唔算好多，不過以呢個價錢都算OK啦！