第七天，回程，是下一個開始。

2012年1月1日〈星期日〉

今日要走嘞！有d唔捨得，

唔捨得個假期；唔捨得咁平嘅消費；唔捨我呢個組合......

約咗司機下午嚟，今朝仲有時間，分頭行事。



我行咗去Central，呢度特價，本來一盒185銖嘅DVD，而家99銖一盒。

除咗吉蒂，仲有史諾比。

行完返去酒店集合，大家又多多少少都買咗d嘢，

司機叔叔又好準時到咗嘞！今次呢架係package包埋嘅！

一路順通無塞車，好快去到機場，

我要再食芒果糯米飯，好多間都有得買，格過價都係呢間最好！

一盒120銖，比市區貴少少，但係好新鮮又有好多芒果。

再見嘞！芒果糯米飯！幾時可以再見呀？

想食少少咸點，就食綠色燒賣啦！

入到機場，又搞退稅d嘢，經過八吓先，

呢度係幫人用膠mon住個行李架，好似係200銖一次。

山長水遠，終於搵到退稅counter嘞！

原來每一張單計，要收100銖手續費架，早知大家一齊買嘢用同一張單啦，

而家排餐懵先退68.4銖，即係港紙16.9咋，笑死！

返到屋企，睇吓買咗邊樣嘢係最鐘意嘅先，係呢兩個鎖匙扣，

但係呢兩個都唔係我買架喎！係團友送架，哈哈！

第六天，血拼翟道翟。

12月31日〈星期六〉

終於嚟到星期六嘞！終於等到翟道翟開門嘞！

我想買T shirt、公仔匙扣、筆插、總之就係要平嘢、

仲有，我好想好想食椰皇雪糕.......



之前一日先喺網上見到有人著呢d T恤，坐佢隔離真係俾佢搵笨都唔知。

就係佢哋嘞！幾可愛？仲要平到震 ~~~

靚仔！

今日都唔算好多人，又唔係好熱，行得都好舒服。

其實如果度啱尺寸，呢度d窗簾真係幾靚吓，下次諗諗佢先！

雖然唔算熱，但係見到呢個街頭藝術者都有少少不安......

左搵右搵，終於搵到椰皇雪糕個舖位，點知，佢今日休息呀！

有無搞錯！一個禮拜先開果兩日，仲要有其中一日休息，激死！

大家各有各行，講好時間上去bts站等，

15分鐘唔到，即係表示仲想繼續行，不見即散，最後等到4個人，

見橫豎喺chit lom站，索性去big C走多轉掃埋薯片同Counter paint先返去啦！

極速返到去，其他兩位團存已恭候多時，大家又急不及待攞晒d戰利品出嚟。

玩咗一陣，有人提議去酒店附近間特色法國餐廳，今日除夕，大家都估計應該好貴，

行咗半個鐘，唔見咗個門牌嘅？問吓路人，係呢度嘞 ~~~

早排執咗嘞！有錢都無得食呀！

最後決定食住家飯，兵分兩路，一組人搭tuk tuk出去買水門海南雞；另一組人去超市買餸。

負責出去買雞嘅朋友，趣事多籮籮，未出發先興奮，未返嚟已忍唔住立食沙嗲！

話買4盒嘢，返到嚟變六盒，唔通係除夕大贈送？泰國食嘢真係抵到爛！

另一邊超市組都預備好嘞！不過有人問我嘢，差d燒咗人哋個廚房！

開飯嘞！雖然唔係乜嘢豪華美食，不過，講吓食吓又幾個鐘嘞！好玩過去餐廳食！

食完飯，大家都唔放過個洗衣機，呢個團友好有智慧，用盡間屋每一寸地方。

食飽飽，其中4個團友出去湊熱鬧，因為除夕嘅關係，d車路都封晒成為行人專用區。

又有煙花睇，好熱鬧好有氣氛呀！

仲買手信返嚟俾我添，多謝晒，呢d公仔，又係笑料一大籮！

究竟，呢度邊個係Tammy呢？〈朋友，自己對號入座啦！〉

我無出去呀！一來年紀大，唔行得咁多；

二來我要執嘢吖嘛，呢幾日唔駛轉酒店，幾方便呀！

買乜嘢返嚟都係咪埋眼打開個櫃隨手掉入去，

但係聽日都走嘞！而家緊係要收拾殘局啦！

排好d嘢影張指定動作照片先！

第五天，市區四圍遊。

12月30日〈星期五〉

其實去曼谷都唔駛點plan行程架啦！因為多數人都係為咗食同買，

偏偏頑皮嘅團友仔話要去遊覽，要坐船、要去大皇宮玩......

其實大家都無乜所謂，於是咪浩浩蕩蕩出發囉！




先落去樓下食個早餐先，係package包埋嘅，

d食物款式都幾ok架，但係d職員態度就好差嘞！

食完嘢就搭車去碼頭，朋友借咗4張儲值飛俾我哋，真係方便好多。

出閘後有間旅遊公司主動出嚟兜生意，d local tour都幾貴吓，

我哋都係去番官方嘢，貪平吖嘛，每位150銖全日任搭。

Shuttle bus就見得多，Shuttle boat你見過未？

傳統收錢機，個職員成人將個鐵罐開開合合發出啪啪聲，提你俾錢。

奇景一：

無錯，呢度真係市區其中一個碼頭；

無錯，碼頭邊真係企咗好幾個人；

你無睇錯，喺碼頭邊努力爬吓爬吓果條，

真係一條鱷魚，
呢個應該係泰國水災後，我見到最明顯嘅影響！

奇景二：

見到d燈籠咁靚，點都攝一攝啦！

再望真d，以為自己老花，原來，燈柱上嘅吊飾，

真係四個榴槤嚟架！

我哋買嘅係遊客飛，應該坐1至13嘅遊客站，

但係我哋就坐埋人哋居民d站，終於俾個查票員夾開張飛！

呢個充滿垃圾嘅沿海Apartment，你會唔會住？

去其中一個站上岸先，一上去就有人同我哋用廣東話兜生意。

頑皮嘅團友仔話想睇臥佛，個個耍手扭頭，咁......我唯有......

俾50銖入場啦！跟團果時去到呢d地方寧願唔落車，而家居然自己俾錢入場......

睇完匯合其他朋友，佢哋已經搵定一間有冷氣同洗手間嘅餐廳坐低等我哋，

是日午餐：炒河〈good！〉

炒麵〈都好好！〉

炒雜菜，大家都讚好！

小食拼盤，可能食得太多炸物，呢個覺得一般啦！

仲有個炒飯，個個都有叫飲品，埋單都係940銖，大家都讚！






食完再上番船，去唐人街買林真香，由碼頭行過去都要15分鐘，又迫......

最後沿路掃甜品同水果番房，無錯，又係食！

旅遊書介紹Siam Discovery有好多古靈精怪嘢買，於是我哋就去啦！

點知去到都不外如是啫，又俾旅遊書點多一次！

無乜好食，搭BTS返Chit Lom間Central食飯，途經Paragon，好繁榮呀！

Central係老牌百貨公司，賣d嘢都幾多樣化，仲好近我哋酒店添！

去Food Loft食嘢就係靠呢張咭，食飽出門口再check吓張咭食咗幾多錢。

個個自己顧自己，睇住就嚟夠鐘閂門，但係偏偏唔知食乜好 ~~~

因為呢度d嘢食都算貴夾唔飽 ~~~

5個餐，798銖，無飲品，加唔好食 ~~~

聽日預告：血拼翟道翟。