再見了！榴槤布甸！

2012年9月29日至10月2日，
連住星期六、日，再加上中秋同國慶，
一共有3日半假期，可以去個短trip噃，
不過，太多嘢做嘞！不如抖抖啦！
而且，由8月7日起一直病到9月30日，
都係留喺香港好好養病啦！

點知，諾怡話佢哋會返自己屋企過節喎，咦......
咁......呢幾日間屋得我一個，用晒嚟抖真係有d嘥喎，
不如，招呼班朋友返嚟玩吓啦！

為咗令無糊食嘅朋友都唔會唔開心，
於是，我將已經封好晒嘅布甸杯拎番出嚟，
決定整埋今年最後一次嘅榴槤布甸，
今次真係真係收爐嘞。
收爐前，我諗我要寫低個食譜先，費事出年又唔記得，
呢個係一個唔識煮嘅人都會99%成功嘅食譜嚟架：

北海道牛乳1000ml，
淡忌廉400ml，
魚膠粉5 tsp，
沙糖8 tsp。

主角係佢 ~~ 榴槤，份量？豐儉由人啦！




先用300ml牛奶將榴槤肉撈勻。




將淡忌廉、牛奶、糖倒入煲裡面，
再倒入用少少牛奶混和咗嘅魚膠粉，
用慢火邊搞邊煮，唔駛滾，直至有少少煙就OK嘞！




將煮好嘅牛奶用茶隔倒入榴槤肉度然後徹底搞勻。

咁就整到11杯布甸嘞！



過埋中秋，開始有秋意嘞！
親愛嘅榴槤布甸，出年見啦！

愚人節聚會2012

2012年4月1日
本來，諾怡一家四口計劃喺3月31日起北上，
姑姐心諗：Good！一於叫班朋友返屋企花天酒地！
點知，一個無情嘅TSA；一班熱血嘅小學老師；
一張補課通告；姑姐嘅如意算盤就......
無所謂啦！改改個玩法啦！
首先，book兩個鐘室內運動場打場波，
等佢哋消耗咗大部份體力先。


事隔幾年，諾怡都係打唔到個波。

嘉頤有d進步喎，都接到幾嘢，
不過......就手眼四肢唔協調囉！
細姪，要嚟練多d嘞！

妹妹都嚟捧場，幫兩個姐姐打氣啦！

打咗兩個鐘，大家都好開心，
返到屋企，為食妹妹老實不客氣，居然飲檸檬茶。

大家準備就緒，一齊擦餐飽啦！

貪方便嘅姑姐，為求快，買咗幾款刺生，有甜蝦......

榮螺〈我覺得好好味！〉......

帶子〈食唔晒添！〉......

象拔蚝〈Very Good！〉......不過個個朋友都好斯文，
而且又有兩個朋友響應愚人節，甩底唔嚟，所以都食剩。

煙三文魚夾蜜瓜，又食剩......

鹵水雞翼紅腸鴨舌，差唔多清，旁邊嘅勝利牛丸非常搶手。

元朗大大粒雲吞，大過乒乓波，煮咗10粒好快清晒。

派對必食沙律，差不多清。

甜品一：比利時55度朱古力香蕉蛋糕，都受歡迎。

甜品二：自家製北海道3.6牛乳布甸，ok啦！

甜品三：泰式甜品，幾好味，有小朋友喺度幫手，清晒！

好彩食之前記得影番張大合照啫：愚人節快樂！

9歲，生日快樂！

11月27日〈星期日〉

諾怡9歲嘞！

今日約埋嘉頤姐姐一齊去世界排行第四高嘅......天際100。

居高臨下，所有大廈喺我哋腳下，都變到好似積木咁。





兩個人喺度消費，好似睇得好開心咁喎。

遊客生意，周圍都標榜香港特色。

仲有好有質感嘅砵仔糕。

無香味但係好搶眼嘅雞蛋仔。

呢度係唯一有排隊安排嘅影相位。

俾咗咁多錢買飛，點都捱到睇埋日落先。

夜晚食完飯，甜品先至係主菜。

呢個係姑姐嘅......心太軟。

 

 

不經不覺100日

不知不覺間，允怡就100日嘞！
姑姐每日過住非人嘅工作生活，同允怡相處時間唔算多，
但係，有時睇住到嘅變化，真係覺得好神奇同充滿期待。



雖然係好細微嘅事，但係喺父母眼中，都顯得好重要，
呢幾日，佢除咗食手指外，仲發覺咗手指有另一個用處，就係：玩！

除咗有時有DD扭抱之外，允怡都係一個好鍾意玩同好鍾意笑嘅小朋友嚟嘅！

宜家興搞百日宴，我哋都趁吓，同嫲嫲一齊去咗如心酒店食lunch buffet，慶祝一吓！

三姊妹嚟張合照先，允怡表情最蠱蠱惑惑，俾你嬴咗一個回合！

成家人齊齊整整正正經經影相合照先，第時返幼稚園D老師實會叫你交返學校做手工架。

兩個幾月嘞！

各位，你哋好！

兩個幾月嘞！要久唔久亮吓相先，

如果唔係，怕大家唔認得我吖嘛。

今次睇住咁多先，下次再見！