九州の夏2014第十一天〈博多shopping篇〉

九州の夏2014第十一天〈博多shopping篇〉

七月二十八日〈星期一〉

平時喺香港從來唔食早餐嘅我，每次去旅行都好似黐咗！

食完早餐行走博多城門口等巴士。

哈！日本啲巴士真係好鬼死準時架，上車。

今日要去嘅outlet係「福岡瑪麗諾亞城Marinoa City Fukuoka」。

呢道佔地都幾大，以前仲有「無印良品」添，可惜而家無咗呢！

另一間我想睇嘅係「Uniqlo」，點知價錢同市區一樣，無買，

行outlet係團友提出嘅活動，我都期望唔大，

但係一向都好少喺outlet買到嘢嘅，今次居然買到對波鞋同民族服喎！

各自搵完心頭好之後，就搵地方食飯啦！

記住，如果喺餐廳門口見到類似嘅表格，自己行埋去寫名就得嘞！

今日食呢間食半Buffet，最吸引係門口有不斷新鮮出爐手工麵包。

Main Dish未到，大家唔好客氣，自己去拎麵包飲品沙律甜品......啦！

行到攰晒，有個地方抖抖已經好好，仲要食物質素都OK，唔錯！

最開心係：3個人先至4287円，即係每人大約一舊水，抵啦！

返到酒店執吓嘢，大家已經唔想再出去，於是：買定杯麵啦！

噢！聽日要走嘞，你三個仲望住我笑？

喺九州最後一夜，show show啲戰利品先啦！

每次嚟日本都買番個或扭番個「杯緣子」，Kawaii呢！

最後一夜喺九州嘞！有乜仲未做？

日日返酒店都經過對面八百治溫泉，今晚終於有時間去浸浸嘞，

仲一浸浸到人哋打烊添，消除疲勞之後，

今晚瞓好啲，聽日返香港嘞！

九州の夏2014第十天〈由布院下篇〉

九州の夏2014第十天〈由布院下篇〉

7月27日〈星期日〉

一早起身又嚟一個豪華早餐先，Yummy！

鳴謝環環幫我煎咗隻咁靚咁精神嘅蛋！

要告別嘞！從大門口開始再望清楚先，其實個門口都幾隱蔽架！

由大門口要通過呢條小路去溫泉架。

溫泉外有一個小小嘅休憩地方。

女湯入口......

男湯入口......雖然咁近房間，但係都有Locker喎！

房間有一個落地窗，面向住旅館嘅庭園。

仲有時間可以再出外逛逛，唔想兜大圈，就由呢道行小路啦！

睇吓shopping完嘅百厭朋友抄小路幾開心！

回程嘞！請大家放低行李喺車站，我會看住架嘞！

仲有時間，你哋再去Shopping多一陣啦！

嘩！又一架特色列車呀，佢就係由布院之森。

頭先放低大家一陣，佢哋已經抵受唔住誘惑，買到心頭好嘞！

收集骷髏骨嘅朋友，呢勻開心到爆炸啦！

睇番架車先，車頭呢個有寬闊視野嘅駕駛室，係列車賣點之一。

車上有手製小書，介紹列車嘅歷史，好靚啊！

旁邊掛咗童裝車長制服，小朋友可以自由拎嚟著住影相。

小食部大排長龍，聞說列車上都有售B-Speak蛋糕架！

我哋買果時好多食物已經賣晒，於是買咗呢個便當，都OK架。

返到博多拎番行李，B組朋友又要先走嘞！

由於佢哋實在太多行李，於是我決定獻出第一次：去送機！

Wakakakakakakaka................................

搞咗一大輪，佢哋終於順利上機嘞！

HK Express都幾嚴格，佢哋3個人寄艙行李合共67Kg，

地勤即刻話佢哋超重喎，好彩佢哋加咗$100加大10Kg啫，

最後啱啱好順利寄艙然後將3箱桃hand carry上機。

送完機，今次試吓唔搭地鐵，改搭巴士返博多車站。

喺車上遇到一個日本女人，佢英文好好，

見我一個人又知我係遊客，所以一直好緊張照顧我，

佢又驚我唔識落車成日幫我吼到實，出外遇貴人呢！

順利到達仲未到A組約定時間，唔想shopping嘞，

上去見識吓博多城頂樓嘅鐵道神社先。

由於已近黃昏，小小商店街都已經關門，

所以，早啲匯合A組團友食晚餐啦！

食咗咁多日定食，不如食番個漢堡喱，讚成！

返房lu，呢兩晚都會住3人房，都幾大間架。

因為B組朋友假期唔同，令我哋唔可以共同進退，很可惜呢！

呢幾日嘅相處，令到佢哋一走我就開始掛住佢哋嘞！

我成日都覺得，去邊道玩唔係最重要，

同邊個玩先係影響你玩得開唔開心最大嘅因素，

B組有新朋友環環，有舊朋友Ivy同呀妮，

大家都鐘意食鐘意玩又唔計較，真係一班難得嘅好腳呀！

真心希望日後我哋再有機會一齊再玩過啦！

九州の夏2014第九天〈湯布院上篇〉

九州の夏2014第九天〈湯布院上篇〉

7月26日〈星期六〉

今日非常非常早起，因為劃唔到位搭由布院之森，

但係湯布院係必去景點嚟架，唯一解決辦法就係早啲囉，

講梗嘅早啲，係朝早7:45嘅列車呀，

即係唔駛食早餐啦！好彩酒店都幾近JR站啫！

車程2小時16分，反正大家都唔夠瞓，車上眠一眠都好嘅，

去到湯布院10:01分，一出嚟已經感受到呢道同市區好唔同啦，

居然馬路上真係有馬車嘅，駛唔駛咁Relax呀！

大家拖住行李好有目標咁向前行而唔截的士去旅館，

因為要嚟搵佢吖嘛：「人氣No. 1蛋糕B-Speak」。

舖頭喺由布市湯布院町川嘅分差位，唔係好起眼咋。

聞說呢間舖頭嘅P-Roll Plain好搶手，要排隊買，

如果遲咗分分鐘買唔到添，由於呢道10:00開舖，

我哋10:01落車行過嚟啱啱好，計啱時間，

真係買到喎，太好嘞，真係不枉此行呀！

原條1420円，講真我哋只係一心好想食到，無諗價錢，

而家先醒起，計落其實都成舊水一條，都算貴喎！

就喺門口，急不及待切開大家分，六個餓鬼即係KO佢，

嘩！清香嘅蛋味，柔軟嘅質地，好耐未食過咁好味嘅蛋糕啦！

食過番尋味，再去買多一條P-Roll Chocolate，都係1420円，

比較起嚟，原味好味啲，形容佢「簡簡單單」就最貼切嘞！

滿足晒，截的士去旅館啦！今晚住呢道：ほたるの宿「仙洞」。
一泊二食，喺官網book嘅，每位18320円。

放低行李後第一站先去金鱗湖，

呢道以冬天早上能夠欣賞到晨霧彌漫的夢幻般景色而聞名，

雖然我哋夏天嚟到，但係都覺得呢道幾靚吖！

然後開始重點項目：去行街街啦！呢道真係好好行架。

好難形容點解咁鐘意行呢道，總之成條街都好有味道啦！

行咗好耐，買咗好多，又遲咗食午餐啦！

行行吓，見到我哋最最最鐘意嘅地方：超級市場呀！

大家隨咗喺道狂掃手信之外，我哋仲掃咗四箱桃添。

又截的士嘞！今次旅程係我搭最多的士嘅一次，

司機叔叔超好人，不但唔嫌我哋上車慢吞吞，

仲唔介意做埋Model同我哋合照添。

返到旅館，係傳統日式，團友都好鐘意呀，乜都試吓吖嘛。

除咗有戶外溫泉，仲有家庭風呂，怕醜嘅朋友可以入嚟浸浸。

入去家庭風呂前，要先睇清楚門口有無著燈，唔好入錯呀！

今晚呢餐勁囉！大家都食唔晒，真係飽都震，

最開心係張Menu仲有我個名添！哈哈！

唯一美中不足係餐廳太熱，無冷氣又無抽氣，要改善呢！

返到房，大家休息吓再去浸浸，

然後又要食嘞！

而家啲溫泉旅館多數提供獨立包裝和果子，呢道居然係飯團喎！

今日買咗四箱桃，三箱係B組團友聽日帶番香港嘅，

而第四箱......我哋就決定今晚解決咗佢！

之前已經聽到好多人講過，湯布院呢個地方好特別，

今次去完返嚟，我都非常非常認同，

我無法用文字形容點解佢咁吸引我，

可能係佢嘅溫泉；可能係佢嘅寧靜；

更加可能係我呢班可愛團友，

我哋大家都認為，住一晚，太少嘞，

下次再嚟，住兩日三夜啦！