第一天：2017年7月27日
以前......
朋友：今個假期去邊呀？
我：日本。
朋友：又日本？
〈語氣唔係幾好喎！
〉
〉
而家......
朋友：今個假期去邊呀？
我：日本。
朋友：哦，日本邊道？
〈已經接受現實嘞！
〉
〉
咪係囉！日本咁大，有排都玩唔曬啦，
好似今次咁，我就揀咗一個從來未去過嘅地方嘞：
介紹返吖，今次目的地係：四國。
由於我對四國好陌生，佢又好大，初初都無從入手，
〈不過次次都係咁架啦！〉
最後決定先去熱門又交通方便嘅地方，
以高松為中心點，方便寄存行李再去附近玩吖嘛。
首先，去鴨記買張上網咭先，我就用開上面果隻，
$110用8日，OK架，沿途都無斷線用足8日，
朋友用Android機，我唔識setting於是保障啲買櫻花咭，
$80用7日，有人用到第8日都得，但有人第6日已經certify，
所以呢，我明點解佢成人俾人鬧囉！
年紀大咗，去旅行總有個水壺跟身，
上機前先要搵個水機，仲一定要斟熱水，
小心搵，一定搵到嘅！
登機閘口係33，又去台北？係呀！又玩轉機呀！
中華航空機票$2790，
我寧願轉機都唔搭HKE啦而家！
不過今次轉機又學到嘢嘞！〈下回分解〉
點齊人，1、2、3、4、5、6，到齊嘞！開開心心登機嚕！
暑假旅行最怕遇到打風，早幾年去北海道足足delay八個鐘，
好彩，今日天氣好好呀！但係......點解......
我哋喺機艙坐足成粒鐘架機都未郁過嘅？
空姐話因為香港機場空管問題所以delay喎！
吓！咁一陣咪接唔到下一班機？
機組人員無法保證可以幫到我哋一定轉到機，
所以，我喺機上已經諗定幾個解決方案嘞！
降落台北時已經遲到咗，我哋好積極咁排到第一個落機，
一落機就跑呀跑，喺出面已經有地勤舉牌等我哋，
數齊人後，每人派一個貼紙，二話不說，上車！
嘩！我都係第一次喺機場坐車咋，
本來成30分鐘嘅步程，8分鐘就到咗仲登埋機添，
所以呢，我越來越鐘意中華航空呀！
本來應該14:30就起飛，我哋14:45仲check in中，
到真正起飛時，足足遲咗30分鐘有多，
果日全機都係日本人，我哋都覺得唔好意思，
但係空姐們好好，仲拍拍我膊頭話：辛苦曬！
呢次經驗教訓我哋，由香港出發玩轉機的話，
留一個小時係唔夠架！因為我哋嘅出發地係：香港！
去到高松，有個地勤即刻過嚟搵我哋，
其實都可以想像嘅，我哋人搭車轉機都要8分鐘啦，
咁......我哋啲行李梗係仲喺台灣啦！
不過佢哋好好，同我哋商量解決方法調動行程，
又承諾第二日中午可以將行李send去酒店，
仲要，每人可以即時得到3000円賠償買今晚日用品添！
我嘅格言係：人一世物一世，乜都試吓吖嘛！
工作人員好努力幫我哋處理文件，
可能有啲遊客已經發曬爛咋，偏偏遇著我哋6個係傻嘅，
最後大家都開開心心兩手fing fing返酒店嘞，
因為咁，我又再更加愛中華航空嘞！〈或者應該話傳統航空〉
鳴謝中華航空地勤Cindy一直幫我哋處理所有事，
仲送我哋去到巴士站教我哋點搭巴士出市區添。
去到酒店，酒店職員都好奇怪點解我哋六個都無行李，
但係大家又語言溝通唔到喎，總之就一言難盡啦！
返到去大家都未食嘢，但係高松站附近靜過鬼，
好彩酒店老闆〈我估佢係〉介紹我哋去搵食，
夜媽媽，都要行成15至20分鐘至有嘢食架！
終於行到商店街嘞！不過水靜鵝飛呢！
到嘞！嚟到四國梗係要食烏冬啦！
老闆推介呢間「鶴丸」，四國嘅第一餐，我哋嚟嘞！
雖然咁夜，但仲有好多客人，我哋要分開兩檯坐，
至於好唔好食呢？唔......
即係咁，雖然係手打烏冬，
不過，我又唔覺得太特別好食喎，正常囉！
食完又行番去超市，因為今個行程重點之一，
就係：「桃」，我要晚晚都食桃，
嗱！平成咁，點忍得住手呀？
買住今晚嘅飯後桃先，一陣就KO你！
大家好心急，快啲轉燈啦！我哋要返酒店呀！
終於返到酒店嘞！今晚住Takamatsu Terminal Hotel，
酒店細細間，又舊舊哋，但係我好鐘意，
雖然細但係設備齊全；
唔係新不過又乾乾淨淨咁；
而且酒店工作人員好友善，
最緊要係酒店好近JR站，去邊度玩都好方便。
房唔算大，但係床尾有張檯仔，方便我哋食桃吖嘛！
沒有留言:
張貼留言