今時今日居然仲有人去星馬泰七天團之泰國

7月27日至7月30日
今日轉場去泰國，搭AA連行李每位大約HKD500-550，抵搭。

去到新加坡機場，巡例食個亞坤之後，就同大細路去瀡滑梯嚕！

諾怡已經好似大人咁嘅身高嘞！瀡埋今次都無得再玩嘞！

呢兩個戲王之王一碰埋就自動波埋位架嘞！

去到泰國，包咗架車去民宿，但係塞車塞到爆，
而且搵屋又一波好多折，雖然有咁大個裝飾品，但係間屋都好難搵，
今次係透過Airbnb訂嘅，日本都有訂過，但係泰就第一次嘞，
個屋主啲規則好手鬆，話俾佢知加多一個朋友叫佢計番錢，
佢都話無所謂唔駛計，只要開心就好喎。
由於去到天已經黑齊，所以以下啲相係之後影嘅。
呢度好似高尚住宅區，而間屋唔算近BTS，要行十幾分鐘。

呢隻大King Kong係屋前面個一大特色，睇得出屋主都應該係幾鬼馬嘅。

門外有個小花園，不過太多雜草，怕有蚊，
而且啲檯櫈都已經爛咗，覺得都幾嘥！

個大廳真係幾大架，呢隻好似粵語長片嘅佈置係我至愛。

另外一邊係個開放式廚房，不過我哋都無點用過，
最可惜係水煲已壞、Wifi又壞、乒乓波檯爛咗，最激氣係洗衣機都係壞嘅！

Book間別墅式嘅Apartment都係貪佢可以一大班人一齊玩啫，
所以我哋夜晚都聚喺度傾吓偈玩吓有口難言架！

樓下有一間房，有一張雙人床，不過朋友話唔係幾好瞓喎！

樓下間房有自己嘅浴室同洗手間架！

小朋友揀呢度都係因為佢單棟有自己樓梯可以跑上跑落咋！

樓上，另個係樓梯口嘅休息區，攤喺度睇吓書都好寫意吓！

示範吓先，俾啲戲再嘆啲添啦！

樓上其中一間房，係兩張單人床，不過好似小朋友尺碼喎！

呢個套廁都好大吓，不過沖完涼就會周地都係水囉！

我呢就同兩個小朋友瞓呢間主人房。

個浴室超級大，不過，個熱水爐係壞嘅！

其實瞓主人房都唔係咩嘢福利，我每朝起床都見到兩位小朋友瞓成咁。

但係，右邊個空位唔係我架，我係瞓左邊果一尺位置咋！

一般嚟講，啲小朋友都唔願起床架，但係今日一講去水上樂園，
大家就好積極嘞！好快趣，所有人已經預備好出發嘞！
搭BTS去到Udomsuk，喺巴士站等一陣，見到呢架車就上啦！
係Central Bangna嘅免費Shuttle bus，搭到總站就得啦！

商場地庫有food court，食飽就可以去玩啦！
個水上樂園喺商場天台，叫Pororo Aqua Park。

買飛入場，每人會有條手帶，用嚟喺入面消費嘅，
入場費都唔算貴，小朋友280bht；大人400bht，算抵玩。
入到去更衣室有大量儲物櫃，大中細碼任揀。

入面有大量更衣室，唔駛同人爭。

仲有好多沖涼房，玩完沖涼都好方便。

啲洗頭水同沐浴露都好小朋友口味，最讚係有熱水沖涼噃！

呢邊係租水泡嘅地方，其實都係幾需要嘅，
因為好多設施都係要用水泡嘅，好似漂流河呀、滑水梯呀咁。

先去呢邊同條手帶增值先，如果唔係租唔到水泡架。

 小朋友戲水區已經再唔可以滿足呢位小朋友嘞！

我哋大部份時間都係玩漂流河，因為位置唔曬，真係好舒服，
最好笑係，好多人租咗水泡用完都唔會還，
我哋原本租咗3個，玩吓玩吓7個人都有水泡啦，
之後又玩咗好多次好似會飛出去嘅滑水梯，
玩咗大半日，終於盡興而歸啦！

出返T21食個飯，之後去after you排隊食埋個人氣甜品先。

兩個人細鬼大嘅朋友，唔單止霸曬張床，仲用曬我嘅面膜同休足時間。

佢哋話呢個造型係「瑪加列與大衛」張海報喎！

一早起身，撇低班爛瞓豬，行咗二十分鐘，去邊呢？

又係去食人氣店呀！之唔係FB群組個個都推嘅「榮泰」囉。

真係好平，都好食，不過未至於念念不忙咁誇張囉！

返去梗要補償無食魚蛋粉嘅朋友啦，去食......榴槤？

其實係雪糕至真，呢間Icedea喺National Stadium站。

呢個係招牌菜：榴槤雪糕，好味，而且整得好靚。

除咗果肉部份好香榴槤味外，連果核都食得架。

而且，連個殼都係雪糕嚟架，貴都要試吓。

好啦！話咁快就到最後一日嘞！兩姑姪同間屋影張相先，
話時話，每次去旅行你都高一啲，而家已經高過我嘞！
今次住後感：間屋係夠大又有特色而且又唔貴，但係，下次唔會再租嘞，
首先，太多嘢係壞嘅，加上地點都唔就腳，
泰國租酒店式住宅都唔算貴，而且會更有信心保證，最緊要有早餐。

最後一日出到機場，食個菠蘿炒飯先。

行程完滿結束，泰國，後會有期。