2016年7月24日至7月27日
是的，今日今時，居然仲有星馬泰七天團，
相信都係Gin's Tour先咁傻。
是咁的，今次趁住兩位小朋友仲未大透，
所以想同佢哋去Legoland水上樂園，
咁由新台幣入可以包車方便吖嘛，咁就已經「星馬」啦，
但係Legoland三日兩夜點都玩晒架嘞！新加坡又玩過唔係幾想再去，
咁見轉飛泰國至五百幾蚊，咁泰國又係一個百去不厭嘅地方，
所以最後咪變咗星馬泰七天團囉！
同諾怡兩個早啲到機場，去Plaza Premium Lounge撐吓檯腳先，
今次揀去抵港層呢間，貪佢人少啲唔駛排隊，
不過我覺得食物種類都係少啲。
每次去機場都有唔同主題，今次係查篤撐，影低留吓念啦！
窮人Airline：廉航Jetstar，10:55飛新加坡，連行李平均每人$1200。
到達機場包車直接去新山，今次試用OKGOJB新山行，整體感覺良好，
好多朋友同網友都介紹過幾間訂車公司俾我，佢都算平，
可能會有啲更加平都未定，但我又唔係想訂只係俾個電話號碼我果啲，
呢間起碼我見到網頁同facebook資料，可以知道有咩服務同顧客意見，
而且每次問嘢都好快回覆，仲要係中文添，
送完我哋去酒店，夜晚仲送咗一袋小禮物去酒店大堂俾我哋，好感動呀！
最後我哋訂咗10人車，由新加坡機場去到Legoland酒店，
平均每人港幣$90，舒舒服服過關都唔駛落車，真心抵喎！
嚟梗會喺呢度住三日兩夜：Legoland Hotel，外型OK喱！
大堂裝修都用咗好多Lego佈置，等check in都等得開心啲。
咭片坐咁細微嘅位，都係Lego嚟架！
大人等check in，小朋友一啲都唔會悶，
因為成個大堂都係Lego，跳入去個Lego池度任砌唔嬲呀！
如果想玩到最後一分鐘，可以申請Late check out架，
不過我哋果日係旺季，佢話全酒店爆滿，所以無得遲退房囉！
房門口個火把都係Lego，幾有心思喎！
我哋訂咗海盜房，酒店嘅洗頭水呀牙膏呀拖鞋呀果啲嘢都幾靚吓，
將佢哋散喺主人雙人大床度影張相先。
門邊呢個大衣櫃，已經包括埋茶水間嘞！因為間房唔算大咋！
進入房裏面個兒童區，小電視下面都有嘢玩，旁邊桶Lego可以隨便砌架！
房裏面有張藏寶圖，解決問題就可以開個櫃鎖，
裏面有份小禮物送俾小朋友架。
小朋友張床，佢哋梗係鐘意啦！樓下果層仲可以拉出嚟變多一張床。
兩個小朋友都想瞓上層，於是佢哋自己解決：每人瞓一晚。
放低行李出去行吓食晚飯，
經過廣場中央放咗啲紙盒做嘅房屋，手工好精細架。
諾怡最鐘意手工藝架啦！去偷吓師先。
行咗一個圈，最後大家決定食個麵啦，每人叫一個餐。
只可以話求其食得飽啦！同好食仲有好遠嘅距離。
由於我哋一行七個人，Legoland果邊一間房一定唔夠住啦！
訂多間又太貴喎，所以我哋喺附近Somerset Medini Nusajaya訂多間房，
其實都好方便，離Legoland都係幾分鐘步程啫，
如果無小朋友，我更建議住呢間，每房每晚都係HKD760左右咋！
俾果邊闊落好多，大大張雙人床，最重要係佢好新淨。
浴室都算大，設備齊全。
屋裏面有小廚房，個雪櫃係家庭式果隻喎！
就算想煮食都可以，雖然我唔知點可以買到餸，哈哈！
床尾有大電視同音響，邊邊個小門係入去書檯同衣帽間嘅，
左邊個落地玻璃窗對正Legoland hotel架，我哋仲用電筒同團友打訊號添。
呢度就係書檯同衣帽間嘞，兩個人住有時覺得太大太靜添！
第二朝落嚟食早餐，係臨時場地，個場認真麻麻地！
啲餐具仲好似一般乾淨添。
食物種類唔算多，不過一定食得飽嘅。
我個豐富早餐，明未？
食完周圍再深入認識吓，有健身室。
有泳池，睇到嘛，個泳池對住Legoland hotel架！
泳池旁邊有個兒童遊戲室。
雖然無Legoland hotel果邊咁吸引，但係已經盡力架嘞！
行過去會合咗團友，買飛入場嘞！係兩日任玩門票。
見個天氣幾好，就決定玩咗水上樂園先啦！
呢個玩咗好多次，可以一班人一齊玩，又唔太刺激，好好玩！
個人滑水梯，都好好玩。
二人水泡，都好快架，而且中間有個大旋渦，幾刺激！
呢個我只敢玩一次，因為佢中間係密封嘅，嚇死我！
雖然天陰陰，但係大家都可以盡興，
有人鐘意玩快速嘢，諾怡就怕死，成日去玩漂流河，
要集齊合一齊影張相都幾難得。
玩咗半日，大家都夠嘞，返酒店沖涼經過參觀吓酒店泳池先。
沖完涼，大家又急不及待入場再現嘞！
先去學揸車，不過大人無份架。
入去間房度上完堂就可以去路面實習一下。
出嚟就可以拎到駕駛執照嘞！
之後去揸船，都幾好玩架！
然後分兩隊比賽，要去鬥快救火呀！
呢個勁嘢......今日唔坐住，聽日再嚟征服你。
今日有啲趕，因為book咗位食buffet，每位都係HKD200左右，算抵。
小朋友元素，自己喺個餅上唧花，不過多數都食唔落架啦！
每個角落都有Lego元素，好似呢度個西瓜啦！
放餐具車？點解有老鼠架？唔駛驚，原來都係Lego。
放碟區旁邊都有Lego。
睇真食物檯上面果盤花都係砌出嚟架！
嘩！你三個都好勤力喎！
隻咕咕雞負責管理呢個食物區架。
大廚召集，小朋友快啲嚟食雪糕啦！
指示牌都有Lego專員拎住架。
有無人想知食譜入面有咩秘密呢？
咁大架機，一個人搞唔搞得掂呀？
由於小弟係七月之星，朋友叫Lego人嚟送蛋糕同唱歌，好開心呢！
好彩尋日玩咗水上樂園啫，今朝落雨呀！
咁就可以盡情玩水啦！
玩咗幾個室內展館仲未停雨，填咗下午啲過關表先。
睇完4D show出嚟，個天好好多，玩個手動跳樓機先。
諾怡無膽鬼，咁都驚到呱呱叫！
處處都有可愛場景，影多幾張相啦！
好可愛嘅小白兔呀！
次後再玩咗過山車呀、激流呀，玩到成身濕曬，好，撇啦！
之後去咗Burger King買定餐，返去酒店大堂等車返去新加坡嚕。
回程都係OKGOJB，不過好塞車，好彩大家都好好瞓。
諗住新加坡只係住一晚，所以book間青年旅社，
網上評分好高架，咁我信咗，
新加坡酒店一向都貴啦！呢個床位，HKD200一晚，
結論係：好似去咗重慶大廈咁，無下次囉！
新加坡酒店一向都貴啦！呢個床位，HKD200一晚，
結論係：好似去咗重慶大廈咁，無下次囉！
沒有留言:
張貼留言