2016年4月2日及4月3日
雖然上次已經去過一次野柳，但係上次係包車，今次搭巴士，
講真有少少擔心，不過好彩最後都成功到達啫。
好耐無見嘞！俏皮公主殿下，你好嗎？
今日陽光普照，係一個大好天，非常適合郊遊。
一舊一舊好似磨菇形狀嘅化石，大家都爭相去影相喎！
舊舊化石形態都唔同，配落海景真係好靚呀！
我記得上次都有見到佢，仙女鞋吖嘛。
仲有呢啲叫燭台。
加啲想像力啦！佢係一隻猛獸嚟架！
玩咗一個上午就預備離開啦，睇落好多車可以搭，
但係原來好難上到巴士，而且班次都唔算密，
後來有的士司機兜搭，最初我哋都唔理，但係真係好難離開呢道，
咁啱有一對星加坡情侶同我哋情況一樣，咁我哋就夾埋一齊包的士囉！
一齊包車平好多，舒舒服服就到咗十分嘞！
我哋請的士司機停喺十分大瀑布，咁就可以行少啲啦！
之前我嚟到，呢道係私人地方，要收入場費，
今次嚟到，呢道已經全面開放俾大眾免費入場，真係好呀！
返到十分火車站，朋友們都唔係幾想放天燈，於是我哋就決定返台北嘞。
返到台北又急急買吓手信，臨返酒店前買個鬍鬚叔叔芝士蛋糕返去宵夜先。
最後一日，為咗陪朋友，我將上午機改埋黃昏機一齊走，
咁今日又多半日啦！去台北101影張到此一遊先啦！
其實目的地係佢至啱：幾米月亮公車。
後面又要影......
前面梗係要影啦......
上車喇喂，Bear Bear司機要開車嘞！
唔駛客氣，大家隨便搵位坐，或者去圖書櫃攞本書睇吓先啦！
企穩啲，扶好呀！
如要落車，記得要㩒鐘呀！
咦！果邊有個小男孩抱住個月亮，好似好寂寞咁嘅。
其實景點就只有呢架巴士，影極15分鐘都走得啦！
如果話今次旅程第一個主題係幾米，咁第二位應該係line friend啦！
呢間大好多，貨品種類都多好多，呢個話係best buy喎！
呢啲又好似幾靚，啲質地好似以前嘅嗽口杯噃。
嘩！好閃呀！係名貴首飾呀！
返到酒店附近，食埋個Lunch先至去機場，
呢個台北宜蘭之旅就完滿結束嘞！
沒有留言:
張貼留言