上半場 ~~ 抆衫尾遊星加坡

2012年12月22日〈星期六〉第一天

又去星加坡？無錯！今次係抆衫尾跟埋人哋家人去玩，
之前我都講過，我最鐘意有小朋友參加嘅團隊架啦！
今次兩個家庭總共有3個小朋友，我又點可以抗拒呢？
其中一個家庭搭星航，我哋貪平又係搭Jetstar，
好彩大家時間差不多，去到機場就約喺亞坤集合。
由於星加坡已寫咗好多次，所以今次個遊記......一切從簡。

由於今次涉及太多人，未經家長許可下，
我先將所有小朋友嘅相抽起，所以，今次相片會好少啊！

大家食過亞坤之後，都覺相當唔錯喔！
食完後就去V Hotel check in，
休息咗一陣，就搭MRT到金莎參觀吓先，
經過LV旗艦店，行到外面見到人山人海，
我哋都湊湊熱鬧，睇咗一場免費嘅水幕show。

順帶一提，今次到星加坡，試用咗呢種新嘅車飛，
同舊車飛不同，佢只收咗SG0.1嘅按金，但唔可以退番，
第二次再搭嘅時候，可以用呢張咭增值，
搭3次就會退番SG0.1，搭6次會有SG0.1嘅折扣，
每次增值都有啲麻煩，可能有人會覺得，
點解星加坡科技咁發達，但係都搞唔好個百達通系統架？
我覺得佢至係最精，每個站得果幾部機，
增值買飛都係佢，有時都覺得好阻住人，
如果嫌用舊款咭要次次退按金好麻煩，
咁就用新款俾佢硬食一毫囉！
再唔係，買張5年有效期嘅儲值就更方便啦，
但係按金同用唔晒嘅錢，都係攞唔番架嘞！
無論點計，都係佢賺！唔忿氣想改搭的士？
但係的士制度仲差，唯有搭MRT啦！
唉！反正我哋都唔會搭到6次，
所以我後來都係買番舊款車飛嘞。

睇完水幕show，就浩浩蕩蕩行去老巴剎食嘢，真係對唔住各位，由於我唔熟路，搞到大家行咗好耐，
去到果度都好多舖頭都收晒，但係大家太肚餓，
極速買咗食物，仲好快清晒啲食物返酒店嘞！
第一日完！

12月23日〈星期日〉第二天。
我哋呢一團好似唔係幾鐘意睇舊區呀、名勝呀、景物呀果啲，
由於重點以小朋友為主，於是我哋決定今日開始玩聖陶沙，
玩時玩，都要食嘢先，先去牛車水食天天海南雞飯，
嚟咁多次，終於食到嘞！果然唔錯，重點係：平！
隨便睇睇舊街、印度廟、林志源......大家都好似無乜興趣，
於是就搭MRT去聖陶沙啦，點知......
今日係假期，人多到呢......仲要加咗價，入島費SG3.5！
本來想去最新開果個水上樂園玩，但係講真，大人都係陪客，
細蚊仔先係主角，於是最後決定去Port of Lost Wonder，
我哋直接搭Monarail到Beach Station站，步行10分鐘就到達。



呢度主要適合小朋友玩，所以......
小朋友收費SG15〈假日〉，大人免費，
每位小朋友會得到10個金幣，可以用嚟玩遊戲或者換食物。



我哋就用咗嚟玩泡泡池、食唧唧冰、薯片、爆谷......

旁邊就係Siloso Beach，不過我哋無去到，
因為大人搵到個好位，叫到成檯嘢食，
美其名係看管材物，實際上就係咁Hea咗一日。



玩到飽，去Vivo City分頭搵嘢食，
最後喺大食代門口集合，喺戶外搵一個地方，
開一個榴槤派對，以下就係令人回味無窮嘅 ~~~ 貓山王！

仲有榴槤泡芙，仲有仲有....榴槤糯米糍，都好好味！

飲飽食醉，第二天完。


2012年12月24日〈星期一〉，第三天。

今日開始入住聖陶沙酒店，經過尋日嘅經歷，
今日決定搭的士，多謝酒店職員幫我哋搵咗一架大車，
一次過將我哋9個人6件行李車入酒店，都係SG50，抵！
放低行李，我個心情就越來越輕鬆，
因為，今日我嘅行程係：放低團友去USS後，
我就可以自由活動嘞！Yeah！
睇見售票處排滿長長嘅人龍，唔駛擔心，
因為我哋已經喺網上買定飛嘞，而且，
Master Card Promotion仲會送Coupon買手信添！



送晒團友入場後，我就獨自四圍逛逛，
睇吓呢年半有乜改變先......
以下呢個就係號稱世界最大嘅水族館，
入場費成人SG29，小童SG20，嘩！貴！
而且，我諗應該未完全開晒，都係下次再嚟啦！

我都係想認識一下最新嘅水上樂園，
於是沿指示牌一路走......

途中經過一啲古船，歡迎各位登船睇睇！

終於到達嘞，入場費大人SG29，小童SG20，
而家喺網上用中銀咭訂有discount，
我去問過職員，佢話其中有兩個遊戲適合幼齡小朋友，
睇嚟其餘都幾刺激噃，好彩啫！都係下次再嚟啦！

以下係衣著規定，唔好太Sexy啊！

然後，我要開始幫朋友買嘢，於是就出番Vivo City，
睇見商場外面有啲收費小遊戲噃！

原來係坐車仔，都有人幫襯架！
所以話呢，家長錢真係幾易賺。

其實，另一邊係免費嘅區域，
商場旁邊都咁多嘢俾小朋友玩，幾好吖！

有好多小朋友喺個人造草皮度sir落嚟，想玩幾癲都得。

有啲小朋友玩到熱熱哋，仲去咗玩水添！

幫朋友買完咖央醬，自己梗係要食番個set啦！

番入去節慶大道買埋朱古力，已經差不多3點嘞，
不如攞房先啦！由於係聖誕節嘅關係，
除咗小朋友有禮品包外，房間仲有薑餅人迎接我哋添。



高架床，我又番嚟嘞！
〈不過，其實張床唔係抹得幾乾淨架！
要先消毒一下先可以俾小朋友瞓啊！〉

我哋住3樓，打開露台就對正個泳池，正！

可惜中間隔住啲草同石，
如果唔係，就可以直接由房跳落水啦！

等齊人，大家抖一抖，就去搵嘢食嘞！
名勝世界個馬來西亞美食街已經開幕，就一於近近哋啦！



大家分工合作，買到成檯都係食物。

全部都係馬來特色食物，不過不失啦！

食飽散散步，睇埋個仙鶴芭蕾啦，免費！仲幾好睇添！

今日好輕鬆，就係咁，第三日完！


12月25日〈星期二〉，第四天。
為了讓小朋友瞓多啲，有三個偉大嘅團友自告奮勇，
晨早八點搭單軌車到Vivo City買早餐番嚟，
可惜，我哋無諗到新加坡人真係好悠閒，
商場中嘅食肆，差不多都係10點先開門，
諗住先去Supermarket啦，對唔住，都係開10點，
最後，喺我哋苦苦等待後，
終於買到新鮮出爐嘅油炸鬼同豆漿，
講真，堅好食！

食飽飽，大家有能量出發嘞！先去影影魚尾獅先。

然後搭單軌車到Beach Station，再轉1號巴士，
再行一段路，終於到達MegaZip Adventure Park，
各種遊戲都唔平架，玩之前最好先計劃一下呢！

今次行程最最最開心就係玩咗MegaZip嘞，
我哋總共7個人參加，大家都覺得好好玩呢，
真係好值得，我好後悔無帶相機或者i-phone上去，
好好拍低呢個經驗，所以......我決定......
我以後一定會再去玩多次架！

下面呢個就係MegaZip，不過飛梗果個唔係我！

玩完MegaZip之後，大家先食個午餐，
就向下一站出發 ~~~ Luge & Skyride，
其實越多人玩就越抵，我哋就買咗一個Combo G，
再加一個Combo E，就可以每人玩兩次，抵好多！
其實架車好易控制好好玩，一啲都唔危險，
但係回程要搭吊車，反而就唔係個個都頂得住！

最後，其中兩個團員要去玩I-fly，我覺得都幾吸引，
可惜時間太短吖，每人都飛唔到五分鐘。

大家都玩得好滿足，最後我哋都係去大食代搵嘢食，
今早食唔到Butterfly，而家再食過，幾好食喎！

最後一夜，一定要encore海南雞飯啦！

食飽又行行超市，返到酒店已經好夜，
都係早啲休息啦！聽朝早約好去游水架！
就係咁，第四日完！


12月26日〈星期三〉，第五天，
今日要離開嘞！早上作出最後衝刺，
過去 Hard Rock Hotel堆堆沙、玩玩水。

呢邊個泳池真係好好多，
大小朋友都喺度享受咗一個早晨。

12點退房後，我哋再喺名勝世界逗留一下，
四圍影相補番幾個shot，唉！有少少依依不捨呢！
1點正，透過酒店約好嘅車就到咗嘞，
由酒店到機場，9人車，都係SG60，
方便又唔算貴，人多就有呢個好處啦！
30分鐘就到機場lu，就係咁，五天之旅完結嘞！

今次雖然人多，但係唔算辛苦，悠悠閒閒就一日啦，
都係多謝大家俾面，又肯互相配合。

每次去旅行都有唔同嘅組合，但係其實好少會重覆，
各位可愛嘅團友，唔知仲有無機會一齊再玩呢？
期待...................................................喔！