下半場 ~~ 馬來西亞兩頭遊〈第一天〉

2012年12月27日〈星期四〉下半場的第一天

玩完五日，仲有五日，不過今次係唔同嘅團隊，
由於後面五日係馬航假期嘅Package，一定要喺香港出發，
所以，點都要番一番來先，又嘥時間又嘥錢！

第一次，連續玩十日，好博命喔！
第一次，一個人瞓機場，好寂寞啊！
但係真心多謝各方好友嘅關心，紛紛打開大門，
可惜我個人太懶，唔想十個鐘頭內搭車來回機場，
所以唯有婉拒各位好意，再三謝謝！

其實呢幾個鐘都好易過啫，喺T1長椅休息咗一陣，
再whatsapp各方好友報報平安，已經3點幾嘞！


決定去沖個涼先，之前已經網上查過，齋沖$150，
現場再問清楚時間，唔知係唔係我聽錯呢，
我明明聽到對方係話30分鐘架，30分鐘？
我已經覺得蠢咗，點解唔執好晒嘢先問呢？
執一執嘢咁又蝕左幾分鐘啦！
入到去，企缸外嘅空間勉強可以放一個行李喼，
花灑下面寫住「為他人設想，沐浴時間請勿多於20分鐘」。
吓？又少十分鐘？於是我就用最快嘅速度洗頭沖涼啦，
出來後見到件衫有少少濕，咪用個風筒吹吹佢囉，
剛吹好件衫向個頭出發，點知呢個時候......居然......截電！
睇睇個電話，剛好20分鐘，好彩我都係一個算快的人，
如果唔係,沖到成身泡果時截都唔知點算？

喺T2執下行李，再去T1睇睇，馬航櫃位已開咗嘞，
因為有個朋友臨時有事唔可以出發，要問問情況先。
朋友雖然去唔到都專登晨早嚟送機，呢d就係真正嘅朋友！
好可惜三缺一，但係我地仍然如期出發，
馬航D機都幾好坐喎，位置十分寬敞呢！
今次搭正常機，有飛機餐食啊！

到達吉隆坡，要等3點轉機，於是我地悠悠閒四圍睇吓嘢，
從未見過如此安靜嘅機場，四圍靜英英，都無人嘅？
行行吓喺間手信舖見到佢，係我今次行程目標之一嚟架！

旅遊書話最好嚟到先換錢，橫掂有時間，
咁我哋就行勻咁多間兌換店啦，呃人嘅，
香港搵朋友換有39呀，呢度先至36.5，
無法啦，都要換D用住先架，咁就換住HKD1000先啦！

其實吉隆坡機場都幾特別，去之前最好先認識一下，
無論由邊度嚟，都喺由右手邊〈十字型〉個停機屏出發/降落，
Check in離境拎行李就要去左手邊個Main Building，
而兩個building係唔可以行過去嘅，必須搭Aerotrian，
回程果日，就有個日本女遊客好慌張咁望住我求救，
我諗因為佢喺十字型果邊行來行去都搵唔到行李，
又或者佢太心急睇唔明d英文指示牌，見佢就喊出來嘞！

Aerotrain，兩邊方向都相同架！

有時都有d矛盾，搭內陸機好似好快，45分鐘就到，
搭車行高速公路都要4個鐘，而且又可能會塞車，
但係，內陸機又要困係機場等又會delay，
好似我哋今日咁，又delay嘞！

去到已經見到司機哥哥拎住我個名嘅牌接機，
最鐘意呢個情境架嘞！我仲問佢攞咗個接機牌留念添！
出到去見到架車，個心即刻定晒，
其實我之前喺香港問過馬航假期d職員有關車嘅安排，
佢哋話所有接送車都可能會同其他人共用，
但係原來只係我地三個人就咁大架車嘞，
而且司機好好人，沿途介紹新山風景啦、民風啦、發展啦......
佢仲特登兜遠少少話俾我地知夜晚去邊度行街食飯好，
真係一個好嘅開始，大約30分鐘，就到達酒店嘞！

一入到去，大堂有個樂師正在演奏一種好特別嘅樂器，
揀呢度係因為網上見到其他blogger寫，呢度好近夜市同商場，
當我第一眼睇見呢個大堂，都幾大幾豪華喎！應該無揀錯卦？

點知......入到房......除左夠大夠光猛外，唉！
傢俱→又霉又舊，十個插蘇→四個壞，水壺→壞；
電視→雪花多過落雪；浴缸→又舊又污漕又爛；
浴簾→發霉；床單→有血跡......
種種加埋，我覺得就好似鬼屋一樣，
呢兩晚我仲要一個人一間房添，
第一晚，唯一一個中文電視台播梁思浩個怪談；玩咩？
算！我上網開收音機，居然講鬼故？激死！



樓下行過隧道就係呢度最大嘅商場，當然係無乜好買啦！
我哋求其搵d嘢食，去唯一一間小小超市逛兩逛，
就嗱嗱聲返鬼屋啦！今晚要洗洗衫先可以應付嚟梗果幾日呀！

第一天完！聽日要去Legoland嘞！