玩極唔厭台北復活節之旅 - 第三天：平溪放天燈

四月十日〈星期二〉

是日早餐：蘋果牛乳。

都幾好飲，好似香港曾經飲過果種蘋果乳酸飲品嘅味遁。

呢三日都會食呢個蛋糕做早餐，今朝食咗朱古力味：好味。

又行去地下街搭台鐵，呢幾日每日行咁多次，都未行熟，

每次都有新發現，今日見到呢一排好靚嘅儲物櫃嘞。

今朝起身好開心，因為太陽伯伯出嚟同我哋玩遊戲呀，

我哋可以成功去平溪放天燈嘞！

去平溪，先要由台北搭台鐵去瑞芳，

車費真係好平，只係NT59，唔駛一小時就到嘞！

雖然不設劃位，但係好彩都有位坐。

去到平溪，得一個出口，出口喺正補票口對面，好混亂。

如果去九份，喺度出咗轉車就可以嘞，

如果好似我哋咁，諗住玩平溪線，就去買張一日劵啦。



NT52全日任搭，不限方向，不限次數。




但係班次較疏，大概一個鐘頭一班車啦，啲班次都好準時，

出發之前喺台北車站旅遊櫃位攞定張時間表，揸喺手較啱時間玩。

轟隆轟隆......火車開到嘞！係好靚嘅彩繪車呀。

今日我哋決定由瑞芳起玩三個站：十分→菁桐→平溪。

去到十分，火車站古色古香，真係好有旅行feel喎。



成條街都好熱鬧，以為只係夜晚先放天燈啫，

原來日光日白都咁多人玩，但係我哋諗住黃昏去平溪先放。


唔係孤寒，不過總係唔識餓咁，所以是日午餐：花枝丸三粒。

食完起程嘞，按住我哋個計劃，諗住先去睇十分大瀑布，

問過老闆娘，佢話行去都只係需要半個鐘咗右，

咁咪決定行囉，沿途人都唔算多，只有少少斜路都算幾易行。


果然，行咗30分鐘左右，過咗吊橋就見聽到瀑布聲嘞，

但係，不過要清清楚楚睇到瀑布係要俾入場費架，旅遊書都無寫嘅！

我見好多人行過都唔願俾錢就番轉頭，可能唔係錢嘅問題，

係覺得咁樣好搵笨，呢個時候我聽到一個香港女仔同佢班朋友講：

『不如入去啦！反正都嚟到咯。』佢班朋友無俾佢勸服，走咗！

反而我聽到後，覺得都啱嘅，一場嚟到，NT80啫，一於入啦！

入到去立即見到大瀑布，真係幾壯觀架，

喺度行吓影吓相盪吓鞦韆都好舒服，其實入面仲有其他設施，

餵魚呀、燒烤呀、餐廳呀咁，不過我哋只係睇完瀑布就走嘞。

喺等候火車期間，食咗是日茶點：七里香，

我好鐘意食架，不過我朋友就接受唔到囉。

下一站：菁桐，話說係少有日本式嘅火車站。

有呢D古早味日式花生雪條，講真唔係好食，不過係幾靚嘅。

都有好多天燈飾物店，個個車站間間舖都價錢相同，

不過款式會有少少唔同啫，我覺得都係十分果D最靚最多款。

呢個站sell鐵路同郵件，到處都有呢D『愛的限時批』。

短短一條街，無論樹上破屋舖前都掛滿呢D竹筒，

就好似許願樹一樣，以遊客區嚟計，真係抵玩架，NT30一個竹筒。

講真呢個站真係去唔去都得，呢度個鐵路博物館，只係一間手信店，

於是，我哋就充滿期待咁搭火車去平溪嘞！點知......

呢度就係平溪嘞！睇旅遊局D單張，都推介嚟呢度放天燈，

而且仲有天燈節添，點知，人影都唔多隻，就係得兩條街。


呢間係成個平溪最旺嘅舖頭，一大班人排隊買大腸包小腸。

我哋最後決定返去最旺嘅十分放天燈，

黃昏時份，時間啱啱好，平溪，再見嘞！

轉轉折折又番嚟嘞！先睇睇天燈顏色代表乜嘢意義先啦！




消費去玩最緊要氣氛好，呢檔個老闆嘈喧巴閉又講爛gag，就你啦！

不過講真，佢都好專業，佢會幫你揸機影相，

四面未點火前各影一張，點火後又四面各影一張，

飛咗上天都keep住影，之後又幫我哋影合照，正選！

紫色代表學業，不過姑姐暫時唔想再讀書嘞，要抖抖先，

嘉頤諾怡允怡，姑姐就將個願望送俾你哋啦！

不過講真，講到尾讀書叻唔叻都好，健康同品行先係最重要。



好啦！我哋嘅願望要飛上天啦，3、2、1起飛！

睇到嘛？有炮杖配合架，幾有氣勢！

四色天燈NT150，再加炮杖NT50，抵玩！

返到台北已經入夜嘞！

先去老地方掃掃貨先，文具精品係我哋嘅必買品。

點知喺光南無乜收獲，隔離間久大好似賣貴嘢咁款，

但係反而仲多嘢賣，而且價錢都係平架。



為咗配合今日嘅行程，我哋決定是日晚餐係鐵路便當。



又嚟睇睇今日嘅收獲啦：文具呀、薑母茶呀咁啦！

希望聽日天氣好似今日咁好啦！因為聽日我想去踩單車呀！