玩極唔厭台北復活節之旅 - 第二天：竹子湖賞海芋

四月九日〈星期一〉


是日早餐。

平時唔食早餐嘅我，呢幾日都買啲古怪飲品上午飲，

今日係木瓜牛奶，而旁邊個糙米漿領隊朋友話好好飲喎。 

喺酒店樓下係台北轉運站，原來已經有黑橋牌，

早知尋晚喺西門町唔駛買肉干啦，點都好，食串腸仔先。



由於尋晚太攰，今朝實在無法早起，

原定去十份，怕搭唔到車，所以改咗去竹子湖。

呢個時期，係竹子湖嘅海芋花季：伊索芋言，

成個山頭，每一戶都種滿海芋，

有興趣的話可以試吓採花，逐枝計錢，好平。

雖然啲雨無停過，但係我哋都堅持四圍去影相。

雨天影花啲光好平均，但係相信晴天又會好靚啫。


雨越落越大，我已經著長袖衫加短袖衫加風褸加雨褸，

但係仍然無法保護相機，而且山上真係好凍......

行咗一陣，發現都係入口第一間『苗榜』啲花最大最靚，

原因係呢間不設採花活動，要賞花就要去餐廳消費，

咁反正都要搵地方食飯，咁緊係搵間就腳又有靚花架啦！

就係咁，我哋兩個女流之輩叫咗三餸兩飯嘞！

唉......又點會食得晒吖？最後要打包帶走。


原定返酒店放低外賣後就去光南買嘢，

點知，沿途經過地下街，諗住不如行一圈啦，

點知，呢一圈就咁行咗兩個鐘，因為條街真係好長。

呢度賣D嘢比較普通，但係都難唔到我哋嘅，又有收獲。



行到最後，有一間好靚嘅舖頭，大家可以隨便拍照，

係無人睇舖架，只係寫住：閉路電視拍攝中，請微笑。

呢幾日我哋喺地下街都會見到好多學生聚集，

多數都係喺度跳舞，但係感覺佢哋都好乖好健康好守規則。

行完Y地下街，又見到誠品K地下街，剎呀！

最後又返到微風，入去呢度真係好開心呀！

除咗有好多手信外，仲可以由街頭試食到街尾，飽飽。

路經呢間餅店，好勁架佢！呢度賣即製芝士蛋糕，

每人限買一個，大家就乖乖喺五尺以外排好隊。

我哋得兩個人，實在無乜Quota，

縱使有時間排隊又好想食，都無本事食啦，唯有下次再嚟過。

順便參觀一下台北轉運站啦！用圓形設計幾新又寬敞，

喺度集中買長途車飛，咁近台北車站，去邊都好方便。



返去京站間Market Place，見到門口個locker雪櫃，真周到。


是日晚餐：就係剩菜〈雞〉同黑橋牌腸？


仲有呀舍乾麵同青菜，所以呢，有煮食爐真係好。

仲有買定兩日飯後果：布冧同柑。

又不如睇吓今日買咗啲乜吖？

係老人家行街必備鎮痛膠布，如果唔係呢幾日點頂呀？

地下街買到嘅林嬸嘢。

希望聽日唔好落雨啦！唔係邊度都唔駛去嘞。