玩極唔厭台北復活節之旅 - 第一天

四月八日〈星期日〉

四大假期之中，我都幾鐘意喺復活節去旅行，

因為無咁多人，而且，喺好多國家復活節都唔係公眾假期，

所以除咗唔會到處人迫人，仲唔會特別加價添。

今次台北之旅，係我近年前所未有咁Relax嘅旅程，

因為......呢次我唔駛做領隊呀！

而且，今次只有我同好友二人，想去邊就去邊，唔駛就嚟就去，

放低領隊支旗仔，個人就超級懶散嘞，真係一個唔負責任嘅團友。

呢個團友有幾過份？其實我連幾點機都無留意，

好彩領隊夜晚通知我啫。

我哋今次搭長榮，9點50分，時間都幾好吖，但係......

我都係要5點幾起身，6點幾出門口嘅？

最後，我都係遲咗15分鐘。

喺飛機上面有幾個旅行團，可能台灣幾抵玩，

所以都有幾多一家大細，其中有一家九口圍住我哋坐，

佢哋仲將兩個大約三歲嘅小表姐妹安排坐埋一齊，

以家長嘅角度，真係幾Cute，但係，以乘客嘅角度......

係好煩、好騷擾囉！

無論啱啱坐低、空姐派玩具、派餐、中場休息、跌嘢......種種情況，

都會有兩對父母攞住四個相機圍住呢兩位公主，不停話：

『望呢邊吖、笑吖、唔好矇眼啦、兩個黐埋啲......』

期間，不斷有對臀部對住我，食唔好又瞓唔到，唉......

各位大人，希望你哋明白：『地球唔係只係圍住自己轉架。』

點玩都好，最好就唔好影響到其他人啦。

發完勞騷，開始睇吓今次個行程嘞。


由於一啲特別原因，我哋訂咗兒童餐。 

到達後，滋滋油油搭國光去台北車站。

搵吓間酒店先，點解個門口好似臨時售樓中心咁嘅？

一點幾，寄存行李後，行一陣就可以check in。




費事周圍走，就喺京站行吓啦。

下面food court好多嘢食，我哋食咗魚丸同九層炊NT105。

啱啱三點，慢慢行返上去Check in，

點知，佢話我哋間房未執好，要等等，

但係，喺我哋前面已經有D香港人喺度嘈緊，

反正佢有櫈俾我坐，我諗無所謂啦，

但係等咗差唔多半個鐘都無人理，唔通真係人善被人欺？

咁點先，門面已經好唔得啦，間房又等等等，好唔專業啫，

領隊發揮本色去問吓，佢就話帶我哋去大堂再等。

原來，呢間酒店式住宅係喺京站上面嘅私人屋苑嚟嘅，

去到屋苑B棟地下，又有一個地方俾人坐低再等，

呢度有提供少少茶點，坐得舒適D，仲有旅遊書可以借，

幾經辛苦，終於等到嘞！見到個門牌我已經超開心嘞，

因為：『係我個生日日期呀！』




入到去，對於頭先嘅不滿都無晒嘞，

首先，帶我哋上嚟嘅職員好有禮貌好親切仲好醒目，

然後，房間裝修好新，又乾淨，

呢間『京站酒店式公寓』，有好幾種房型，

之前我喺網上睇過，最唔想要呢個浪漫紫色房，

點知偏偏就係住呢間，但係住落都OK喎。

同其他酒店式公寓一樣，呢度有個簡單廚房，

不過就一件廚具都無，要自己問服務台借，

我話想煮麵，佢就借咗個煲、兩對筷子同一個湯勺俾我哋，

但係......無碗用，仲有，第一次開爐要打電話俾服務台。





呢個必然係我最鐘意嘅設施啦！

除咗洗衫，仲有乾衣功能架，早知就帶兩件衫就夠啦。





呢個仲勁，如果件衫唔入得乾衣機，

可以洗完後掛喺浴室，按乾燥製，就會喺兩個鐘烘乾件衫嘞！

安置好行李，先去微風廣場食少少嘢先，

牛肉麵NT170，好味。

就係呢間『青蔥』，企硬，唔做套餐，只可單點。

跟住要去西門町，係時候攞張免費悠遊咭出嚟增值先，

呢張咭係台灣觀光協會送嘅，有咗佢真係好方便：

既唔駛排隊買飛，搭巴士同去便利店買嘢都得，

而且搭捷運仲有8折添。





第一站去紅樓，嚟咁多次台灣都係第一次行。

入面賣嘅都係原創精品，不過都幾貴。





行咗一輪，轉戰西門町最旺嘅地方。

買晒要買嘅手信，就去『三兄妹』度，

食個『芒果雪糕雪花冰』先，盛惠NT120。

臨走再去老天祿掃D嘢返酒店食。

鴨舌、鴨腎、脆腸，合共NT320，非常好味呀！

睇吓今日買咗D乜：除咗CD套外，

仲有買俾嘉頤諾怡嘅手信：原創驚驚號書簽。

仲有甘甘甜甜幾好味嘅『皇圃茶飲』。

聽聞之前係要訂先買到嘅『呀舍乾麵』。

買俾呀媽同大佬嘅『黑橋牌肉干』。

最後就係買俾舊同學兼好友兼雀友嘅『整人糖果』。

雨濕濕，唔知聽日會去邊呢？期待呢！