......GiN's BLoG......: 4月 2012

四月十二日〈星期四〉

話咁快又要回程嘞！最後一日通常最難安排，

去遠啲又唔得，一早啲舖頭又未開，

於是，我哋就決定去番附近嘅地下街行吓，

順便見識吓條批發街，順便搵定一條最易行嘅路搭機場巴士。

果然，大部份舖頭都係11點先開門，冷冷清清......

行到Y13，就係批發街出口嘞！

行咗一個圈都係覺得無乜好買。

哈哈......喺度見到山寨版Macaron。 (rolling on the floor)

零收獲，於是返去京站下面個foodcourt食少少嘢，

因為唔肚餓，所以朋友只係食咗個飛碟。

我就比較誇少少，食咗個蜆泡飯，Yummy！ (drooling)

食完飯後，兩個人帶住六件行李，用最快路徑行去搭巴士，

千辛萬苦終於去到機場，早咗好多噃，咁多時間剩，

緊係去Hello Kitty自助check in counter影吓相先啦！

就係要寄你哋嘞！雖然未夠鐘check in，

但係問準空姐，借個磅我磅磅先，嘩！大件事！

我兩件行李加埋26KG呀！加埋朋友果件就44KG，好彩！

個心定晒，唔駛執番啲重嘢出嚟，

朋友二號，乖乖地掛個牌上機嘞！

我哋咁大個人，都未試過排第一架，

人哋唔知仲以為我係KT Fans添呀，我聲明：我唔係。

攞到登機證嘞，一樣價錢嘅機票，又係幾𠱁死人嘅！

入閘前，食個機場午餐先，好開心仲可以食到花枝呀！

呢個飛閱候機室真係正，臨上機前人同電話都可以叉足電。

見到佢，就知道嚟到候機室嘞！

靚嘛？不過講真無乜人使用咋！

落去下面個候機室前，每人會獲派一本KT Passport，

用嚟儲KT boarding pass嘅，唔知有無人會儲呢？

想影張靚靚KT機嘅相，但係所有玻璃都係綠色，好難影。

我鐘意搭長榮，覺得都幾舒服，而且，仲有D細心位，

睇吓，有USB位喎，可以幫個電話叉電呀！

入到去，乜嘢都係KT，望住你，點捨得嘔呀？

仲有，洗手間嘅清潔用品、廁紙、紙杯、啤牌、

沙糖、奶、牙籤、乜乜物物都係KT。

以上都係其次，其實我哋最主要都係為咗呢個兒童餐啫，

講真，唔止好睇，仲好好食架，份量仲多過李大人餐。

順利返到香港嘞！今次偷咗懶，真正hea遊，

下次，夏の北海道，我會認真啲架嘞！

四月十一日〈星期三〉

一早起身，房間電話響起，我同朋友都感都奇怪，邊個會打嚟呢？

一時唔醒起，係我哋託酒店代收嘅『王媽媽鳳凰酥』呀，

其實我哋都係預訂今日嘅，不過估唔到一早八點幾已經送到啫。

以為佢會幫我Pack好箱，但係去到大堂一睇，我爭啲暈低，

18盒鳳凰酥就係咁用膠袋綁住，而且......仲非常有份量吓。 (surprise)

係朋友極力推介嘅指定手信，而且有Blog友都大讚好味，

我一早已經喺網上訂購，佢會按日期送到酒店。

打開一睇，真係好精緻喲，呢款係三色，有鳳凰、抺凰同鳳梨，

我個人最鐘意食抺凰，朋友就鐘意鳳凰，

開心過後，問題就嚟嘞！咁多，點攞走呀？

於是，我哋就用30分鐘時間，將所有包裝盒拆咗壓平入喼，掂！ (applause)

是日早餐：綠豆沙牛乳，有綠豆味，但係無沙嘅。

好啦！一切搞掂，向動物園站出發，點解要去動物園？

因為我決定要去踩單車囉！

而家台灣遊興踩單車，全國劃咗好多條線俾大家參考，

而台北呢便，最方便就係動物園呢條線嘞，

一出捷運站就見到租車嘅舖頭架嘞。

喺正動物園正門出面馬路，租車後可以沿住河邊踩過去。

而且價錢真係好......平，港幣十幾蚊一個鐘咋，

去到果時十一點幾，曬到頭暈暈，

我見佢夜晚九點至關門，諗住晏d嚟啦！

老闆話：不如先去貓空或者動物園先，四點幾嚟太陽落山仲舒服！

有道理，橫豎我次次嚟都會錯過呢兩個地方，

咁我哋就決定先去貓空一遊啦！

搭貓空，可以入錢買飛，亦可以直接拍悠遊咭。

因為咭裏面已經無乜錢，所以我哋選擇入錢買飛。

我哋計劃由動物園站〈山腳〉搭到最高嘅貓空站〈山頂〉，NT50，

再由貓空站搭去動物園內站〈即山腰〉，NT40，好抵搭呀！

我唔怕高，覺得搭邊度嘅吊車都差唔多，但係呢架車真係搭咗幾耐吓。

上到貓空站，空氣清新，今日遊客唔多，好寧靜。

對面有個小小美食廣場，除此之外，無乜其他景點。

決定喺度搵食，呢度D食物同市區夜市價錢相同，不設遊客價，抵讚！

是日午餐：炒米粉、炸雞同埋朋友唔吼嘅炸豆腐，

一場嚟到，我點都要試吓架嘞！食後感：我好掛住甜辣醬兩溝呀！

回程，我哋預約咗貓纜之眼，即係玻璃底車箱，

佢同一般車箱車費相同，只需喺唔同入口等車就得嘞！

認住佢啦！車身印住『貓纜之眼』架，反正唔駛加錢，咪試吓囉！

車箱內嘅玻璃底，畏高嘅人可能坐唔到，

一般車箱可以坐八個人；而貓纜之眼就只可以坐五個人。

去到動物園內站，可以拍咭入園，連shuttle bus車費一共NT65，

我張咭本來有NT66，而家得番一蚊，好險！

一落到去，換番支長鏡先，點知，影得唔夠三分鐘，居然落雨喎！

淋濕我唔緊要，點都要保住支鏡頭，

於是，我就去咗一個最近而又最恐怖嘅地方避雨。

令人毛骨悚然嘅：爬~~~蟲~~~館~~~。

如果有得揀，我寧願揀鬼屋，嘉頤，呢D你啱睇啦！

好彩，行出嚟之後個天又光番，可以睇吓呢D動物親子SHOW。

又有D個樣氹死人嘅朋友仔。

仲有啲香港無得睇嘅森林動物。

買埋手信，四點半，時間啱啱好，好心急去租單車呀，點知......

外面傾盆大雨，等到五點關園嘞，都無停雨嘅跡象， (crying)

無得踩嘞！我知，係俾個藉口我再嚟吖嘛。

於是，我哋又著住果件NT35嘅雨褸搭捷運返去嘞！

日日都經過呢間雪糕店，朋友話一定要食，咁今日就啱時晨嘞！

我哋喺日本食過呢個品牌，日本人會一邊整雪糕一邊唱兒歌，

佢哋夾得好好，唱得好專業，重有二重唱，好有氣氛架，

而台灣人就會好友善咁問你今日去過邊度玩呀......好唔好玩呀......