好玩海南島第三日 - (1)

話咁快就第三日嘞，開始有D唔捨得添，由今朝起身開始，我就不斷話要去游水游水游水............
因為我深信，只要講一百次，就算無人答應都係可以成真嘅！

 

今日真係要喺湖畔食早餐嘞，因為入面無晒位吖嘛！都未開始食，你睇我滴汗。

 

為咗要去游水，我要好努力將呢碟野食晒！

 

今日再繼續去視察吓，呢架高爾夫球車幾靚喎，影張相先，原來喺旁邊仲有得租單車同麻雀房架。

 

呢架車停正喺大門口，聽講住客可以租架，好似話600蚊一日喎，幾豪！

 

小休之後再出發，今日豪西餐廳，第一味海南雞飯，麻麻哋好食。

 

呢個係牛𦟌，OK啦！

 

迷你pizza，都係ok啦！不過埋單都要400幾喎，酒店餐廳即係酒店餐廳！

 

偷運一個麵包出嚟餵吓魚先。

 

睇吓佢哋幾熱情！

 

今日再去泳池，我好有信心學識游水架！

 

觀察吓人哋點游先！

 

游吓游吓，我游到去對面岸喎，好野，我識游水lu！

 

游得攰攰哋，喺池邊休息吓先。

 

游水真係好好玩架，返到香港我都要去學游水。