今日又返嚟高松食早餐,好有親切感呀!
為Cindy送行,飲杯!
分開後,我哋要搭JR嘞!首先買兩個麵包超人便當同膠杯先。
早咗到高松站,見有車,咪搭早一班囉,
諗住早啲去到多度津等,點知......
呢個站完全無嘢行,無冷氣候車室,去廁所要行樓梯......
好彩喺乙台上見到呢架咁獨特嘅列車「四國千年物語」,
列車以四季為概念,一共有三卡,
分別以「春萌之章」「夏清之章」同「秋彩之章」為主題。
而列車另一大賣點就係特色美食嘞!
聞說車上食物都係用四國香川縣當地嘅特色食材,
例如係香川縣嘅名牌橄欖豬咁啦!
列車終點係大步危,雖然我哋目的地相同,
但係我哋無預訂,下次有機會再去要預訂嘞!
由多度津到大步危車費3740円,食餐就再加5500円。
http://www.jr-shikoku.co.jp/sennenmonogatari/concept/index.html
四國沿線都有麵包超人印仔給吓。
終於到咗大步危站嘞!
喺乙台上有一座迷你嘅祖谷蔓橋,好的式!
呢張情侶坐個設計幾搞笑,兩個人被迫黐埋一齊。
車站代表人物:兒啼爺,
佢係三好市傳說嘅妖怪,喺鬼太郎漫畫中都有出現過架。
話說大步危係一個無人車站,但係果日我哋好好彩,
有站長叔叔喺道,佢仲教我哋點搭車添,
因為有站長叔叔當值,我哋就可以入休憩空間等車,
反正仲有排等,眠一眠先啦朋友!
若然站長唔喺道,就要喺外邊嘅候車室等嘞,無冷氣架!
如果諗住玩完沿路走,可以喺道寄存行李架。
巴士未到,去附近逛逛先,如果條橋唔係維修梗就好啦!
站嘅對面好似係一個小社區,有幾間小舖。
剛巧有電視台嚟拍飲食節目,呢道都有好嘢食?
搭巴士去坐大歩危峡観光遊覧船。
見到呢啲車,好可愛,唔知有乜作用呢?
買飛搭船前,要填表先架。
每位1080円,我哋每人一件大行李,
買飛後工作人員就幫我哋Keep好行李,免費架!
買完飛望落去乘船處,嘩!好高喎!
仲要行一段路先去到搭船嘅地方架!
終於行到嘞!多數都係旅行團,好少散客噃!
一百円一袋魚糧,呢道有得餵魚?
唔係呀!原來係餵鴨呀〈我估係鴨啦!〉
佢哋個個都有名架,
個日本姨姨一叫佢哋就搖搖擺擺走上嚟,好打耳!
等咗一輪,招呼完團隊,終於到我哋呢啲散客上船嘞!
上船前,姨姨問我哋係乜嘢國家,話佢知係香港後,
佢就大聲向上嗌:「香港」,之後就有人揮動香港區旗嘞!
著好救生衣,出發嘞!
悠悠閒閒30分鐘,沿途欣賞結晶片岩被水浸蝕形成嘅溪谷。
細時唔識欣賞呢啲大自然景色,
而家年紀大就越來越鐘意編排呢啲行程嘞!
坐完遊覽船,上面有間都幾大嘅餐廳,一於食午飯先啦!
嘩!果然係一個妖怪之都,餐廳主題都係妖怪。
成班妖怪齊齊整整一齊開飯嘞!
佢哋啲樣搞笑多過恐怖,可惜都係非賣品吖!
食完飯,就啱巴士班次時間,就上巴士返酒店嚕,
今晚住「新祖谷温泉ホテルかずら橋」。
咁多晚之中,呢間酒店係最貴嘅一間,
一泊二食每位港幣1175,佢個露天風呂係原因之一。
話說奧祖谷有一條稻草人村,成條村得三十幾人,
村民綾野月美為咗想條村熱鬧啲,就做咗三百幾個人偶,
所以祖谷好多地方甚至我哋個酒店大堂都會見到呢啲人偶架!
親切嘅女將帶我哋入房細心介紹設施,
雖然一直都係雞同鴨講,但係笑容就係最好嘅溝通啦!
今日上午曬到甩皮,而家又忽然落傾盆大雨,
天氣真係變幻莫測呀!
大家就有個藉口Hea吓酒店睇吓雨景啦!
見啲雨咗啲,係時候要出去行吓啦!門外已經有按摩椅,正!
女湯同我哋同一層,超級方便!
原來呢道都有我嘅最愛!
等到停雨係因為一心要去參觀露天風呂架嘛!
登登登櫈!呢個就係特色之處喇,
露天溫泉喺山上,要上山就要坐呢架登山纜車,
而且,係要乘客自己控制架,真係好好玩,好特別!
登山條路好靚,都係果句,如果秋天嚟就好啦!
上到嚟會先經過天空足湯。
五個人一齊浸,啱啱好包場,哈哈!
山上有楓葉再加上少少霧,真係一個好似仙景嘅地方呀!
唔識用文字形容,只好睇相啦!
露天風呂,男湯,雲海之湯。
旁邊就係女湯,樹海之湯。
無人,可以影啦!
仲有更精彩嘅係:混浴,男女共浴喎!
返房已經開好床,今晚五人一房,好熱鬧呀!
今晚食呢啲,鄉土料理,都幾好食架!
仲有圍爐燒魚,適合鐘意影相呃like嘅香港人。
食完飯可以參加酒店免費活動,搭呢架車去睇蔓橋夜晚亮燈。
原來亮曬就係咁嘞!唯有聽日嚟過啦!
最大收獲反而係第一次睇到螢火蟲呀!
今晚宵夜,食好好味嘅青檸啫喱。
沒有留言:
張貼留言