今日終於有自助早餐嘞！好開心呀！都好多嘢食呀！
日本酒店餐廳真係好體貼，除咗BB櫈外，仲有BB床添。
食完早餐就去今日最重要嘅行程嘞！吓？去學校？
係咩學校呢？音樂學校？嚟學唱歌跳舞？
五個人，五舊麵粉，梗係整嘢食啦！
著起圍裙，預備開工嘞！
先將麵粉團搓平，對摺一層又一層，重覆幾次。
將一層一層嘅粉團砌條，去到呢個地步，應該知係乜啦！
係我自家制嘅烏冬呀！
每人都可以做一碗，咁就完？未呀！
而家至返轉頭做番之前嘅步驟，麵粉，居然用腳踩？
係喎！咁至均勻吖嘛！配埋音樂，大家都玩得好開心呀！
體驗活動每位1766円，玩吓啫，居然仲有畢業證書添，抵呀！
預約網址：https://www.nakanoya.net/school/
做完烏冬落樓下預備吓先，好趕時間，要快啲。
嘩！快啲啦，開始煮嘞，自作自受吖嘛。
至於唔好味？唔記得嘞，時間太趕食咗咩都唔記得。
好點解咁趕？因為今日book咗麵包超人列車，唔想錯過吖嘛！
天氣真係熱到癲，所以連便利店都賣全冰飲品，正！
呢次四國之旅，我哋一早劃好曬位，
不過可能四國真係人少，所以每程指定席都有大把坐位，
不過，對於最期待嘅呢一程，就一定要劃位啦，
因為呢架係麵包超人列車吖嘛，話曬嚟到四國，點都要試啦！
呢架予讚線8000系列車，車身以彩虹的橋樑作為概念，
所以車卡外同車上天花板都有彩虹圖案貫穿住，
不過只有第一卡車箱啲桌椅先有麵包超人圖案咋，
我哋坐普通卡，唯有偷偷去第一卡影相啦！
如果唔想偷偷摸摸又想見到麵包超人，就只有影吓洗手間囉！
差不多兩個鐘，就去到松山站嘞！
松山站，外型一啲都唔起眼，但有少少古樸風，
車站細細，但佢居然係四國繁忙車站嘅第三位喎。
由JR站望出去對面車站真係好近，但係......
無馬路，一定要行隧道，但係......
條隧道係要行樓梯架，抽住行李嘅朋友，加油呀！
大汗疊細汗，終於行到對面車站，我哋要喺度搭市內電車。
到啦！車頭寫住道後溫泉架，啱嘞！
只係短短車程，就由現代城市去到古代，道後溫泉站到著。
站對面就係溫泉街，好方便喎！
不過我哋要先放好行李先，今晚住道後溫泉松山Mielparque，
拎住行李上去都幾辛苦吓，我覺得有少少後悔添，
其實再行上少少就已經係湯快道後彩朝樂，早知就訂佢啦！
其實我哋間酒店都好新淨吓，不過除咗新之外就無乜特色囉！
今晚都係五人一房，一泊二食9500円。
放低行李嗱嗱聲出去行溫泉街啦！首先會見到少爺機關鐘，
呢個鐘係1994年為咗紀念道後溫泉本館100周年而放喺道嘅，
每個小時會響一次，隨著音樂響起，
夏目漱石嘅著作「少爺」裏面嘅人物會逐一出場，
好多遊客都會預啱時間嚟睇架。
呢條溫泉街好似好有氣氛咁喎！
唔知係咩特別活動，成條街都有呢啲攤位，
出售120円一份嘅食物或者遊戲，大家都好歡樂呀！
附近有好多酒店，有啲仲有特色shuttle送各位到溫泉街。
呢道係溫泉街嘅盡頭，都係道後溫泉最旺嘅地方。
除咗呢道有好幾個影相位。
仲因為我哋身後嘅就係道後溫泉本館嘞！
道後溫泉本館，好駕勢堂架，有3000年歷史，
係日本第一個國家重要財產嘅公共澡堂嚟！
呢道咁出名，首先係因為佢係日本第一個溫泉，
另外，當年夏目漱石喺呢道住咗多年，
佢仲以呢個經驗創作咗著名小說「少爺」，
而呢本小說，簡直就帶旺曬為個松山啦！
但係，對於遊客嚟講，最吸引我哋嘅應該唔係佢嘅歷史，
而係宮崎駿嘅千與千尋，話說宮崎駿係見過道後溫泉本館後，
就激發佢創作千與千尋裏面湯婆婆招待所有鬼神果間油屋架！
好多人都會嚟幫襯吓呢個公共澡堂，
可選擇「神之湯」或「靈之湯」，收費由410至1250円不等。
不過嚟到旅程最後兩日，我哋已浸咗幾晚溫泉，
似乎大家都提唔起興趣入去，而且又要就時間返酒店晚飯，
所以最終都係過門而不入，而家諗返都覺得有啲可惜呀！
不過我都有收獲嘅，因為我喺度買到今治毛巾呀！
點解要買咁貴嘅毛巾？因為要對自己好啲吖嘛！
好嘞啩！最後今次，又食呢啲，大家都有啲厭啦！
唔好意思，我下次會編排得好一啲架啦！
晚餐唔啱食，一於食消夜啦！
成條溫泉街都係柑，一於食個柑味啫喱啦！都係青檸好味啲！
仲有大熱嘅莞茜百力滋，朋友都話好食，我就覺得幾味精囉！
香蕉朱古力雪糕，係我鐘意嘅配搭，都幾好味吖！
沒有留言:
張貼留言