我又嚟嘞雪雪雪雪......北海道〈第一天〉

我又嚟嘞雪雪雪雪......北海道〈第一天〉

12月21日，星期日

本來今次聖誕節諗住去大阪，其實都無乜特別目標，

總之就係想去日本玩啦，因為易去方便円又便嘛。

點知check吓機票，去大阪搭廉航都要成6千蚊，

搭JAL大阪轉機去北海道都係8千幾，

咁我決定要搭有水飲又有電視睇嘅飛機，

而且8千幾蚊咁貴，一於去到盡，要玩到網走，

仲有玩足14日，可惜朋友假期夾唔到，所以要分兩組玩囉！

由於朋友們同我嘅出發或回程日期唔同，

所以我張機票係自己一個人book嘅，

另外兩位同日出發嘅朋友就夾埋一張單。

由於出發當日我日頭仲返〈仲要做戶外活動，攰死！〉，

所以一早就拉埋行李返公司，諗住放工直接拉行李去機場，

期間都check住可唔可以網上check in同劃位，

點知上網睇睇原來已經幫我劃好位嚕，安樂晒。

再幫另外兩位朋友check埋，點知佢哋無喎！

由於朋友住港島區，佢哋決定喺香港站果邊check in，

話說我到咗機場後，接到朋友來電，

話機位唔夠，叫佢哋轉搭聽日班機，

直航北海道，仲有錢賠，諗吓其實都幾正架！

但係佢哋梗係驚啦！如果同我分開機出發，

好似好無安全感喎，於是就拒絕咗啦！

同一時間喺機場，有個日本領隊喺櫃台鬧到七彩，

因為佢班日本客無機位返日本，

地勤解釋話太多overbook，無辦法。

所以話，唔止廉航有overbook嘅情況，傳統航空都有，

只係佢哋航班多，總會解決到啫。

好啦！出發嘞，零晨0150出發，第二朝0615到大阪，

日本轉機一定要自己攞返行李，再喺大阪check in，

跟手搭0920機到北海道，大把時間去麥記食早餐啦！

其實機上面都有嘢食，仲要係我至愛嘅......維他！ 

話咁快就到，咋咋聲去拎張飛先！ 

都唔算多人，好快就搞掂啲車飛嘞！ 

睇吓幾幽靜？未到假期，都唔係幾覺有遊客。 

JR都好方便搵位坐，行李都唔會阻到人。 

今次住Hotel Route Inn，非常方便，一出JR步行1分鐘即到。

未夠鐘check in，放低行李就去搵食啦！

第一餐食「和幸」，大家都食得好辛苦，

唔係食物好難食，而係大家未適應日本室溫，焗到想死！

純Hea，於是就去北海道神社打個招呼先啦！ 

人影都無隻，無人會年尾入廟嘅！ 

返札幌四圍行行，跟住排隊食豚丼。

今次真係老貓燒鬚，見大家都好有規矩咁沿住條龍坐住排隊，

我哋咪又排囉，排成個鐘終於去到龍頭，點知......

原來要喺龍頭塊板寫名先架！其實之前都試過，

但係今次真係失策，我哋差不多係最後一組入去架！

夠膽獨估一味賣豚丼，一定係好嘢！

雖然只有豚丼，但係都有好多組合可以選擇，

就係要幾多片豚同要幾多飯，

之前喺outlet食過，一試難忘，決定要多豚！

幾十蚊食碗飯？不過好值得！

好啦！食飽飽就返酒店嘞！

我一個人，豪一豪佢book間雙人房。

間房好大喎！仲有小偏廳添！ 

成間卡啦OK咁，好少見咁大間又咁平喎！

雙人8900円，我單人7100円。 

衣櫃裡面有睡衣，可以著住喺酒店範圍內活動。 

浴室對我嚟講係無用嘅，因為我日日都落咗去大浴場啦！ 

Twin嘅好處，就係執行李時可以好放肆，hehe！ 

落去洗完衫乾唔晒，就開著暖氣掛到一房都係衫！ 

無處不在嘅衣服鞋襪......唔駛就住就住，正呀！ 

哈哈，我喺官網book，會有一樽水或茶送，

仲有小禮物任揀：手襪、飲品、暖包、耳罩......

次後喺Agoda book嘅就連水都無嘞！

不過唯一投訴：朋友就話wifi收得好差！〈我住頂樓無問題〉

仲有記住要book別館，之後幾日因為別館無房，

我哋住主樓，已經係貴啲嘅comfort twin，

但係就細好多，即係開唔到行李果隻！