泰國開心黑仔遊@曼谷第四五天

呢度早餐唔算豪華，但係都幾好食吖。

食完早餐，就搭BTS出發去搵『襌』嘞！  

因為係朋友介紹，所以就算唔算好近BTS站，

我哋都膽粗粗去搵吓。
 

一早去Book，已經好full，期間都見到好多人出出入入，

佢哋話要用特惠時段，要早成個月之前就要book架啦！

真係有咁犀利？
 

終於，一個朋友決定做Spa，另一個朋友就決定做泰式按摩，

佢哋做完之後，都一致認為......超正！

Book好後，中午去行吓街，然後去咗food court食嘢。 

然後又再入吓貨啦！呢邊間蝴蝶袋真係人多都嚇死人，

當然，九成都係香港人添，

無辦法啦！拎佢做手信又確係平靚正嘅！
 

送走去做Spa嘅團友，

我同朋友就決定去行吓同幫大家預備今晚餐晚飯嘞！

先去Big C入吓貨先。

 

經過永遠水洩不通嘅市中心，淨係想過對面馬路都好困難架。
 

買完嘢，我同朋友仔是但搵一間餐廳食個Early Dinner先，

因為好想食飛天通菜吖嘛！

 買好朋友仔嘅食物，我哋就試吓搭『篤篤』返去啦，

喺市中心風馳電制，又快又舒服，話咁快就返到酒店嘞！
 

究竟買咗咩嘢要咁緊張返去呢？

就係......各式各樣嘅芒果甜品嘞，朋友，開飯嘞喂！

第二日，要走嘞！呢個組合，等咗好多年嘞！

要就啱假期啱地點啱價錢......真係好難架，

呢次旅程雖然無乜玩新嘢，

但對我嚟講就好難忘未同好有意義嘞！

希望快啲再可以一齊去玩啦！

最後一日嘞，等車期間，一定要影張大合照先。 

玩咗幾日，得到最大嘅手信就係：跛腳一隻，哈哈！

泰國開心黑仔遊第三天@曼谷

約咗架的士，1300bht，4個人4件行李，直接去到曼谷。

又去番Cape House Apartment，

之前住過一次，覺得好正，

有房有廳有廚有廁最緊要係有洗衣機，

咁我之後果9日就唔駛擔心唔夠衫換啦！

唔止我覺得好滿意，連朋友仔都好鐘意，

下次嚟我都會住番呢度架。

今日，好充實咁又過咗一日，

其實中間我哋仲有去過行Big C同埋商場，

不過我就麻麻哋鐘意商場嘞，

不過，我知點都要入啲貨嘅，咁......唯有聽日再出擊啦！

 返到房，可以一邊叉電一邊聽歌，

真係好有嘅渡假心情呀~~~！

  

呢度有我哋最鍾意嘅地方：就係15樓有免費任食茶點，

仲要環境好正好舒服添！

雖然唔係酒店，但係都有泳池，

可惜我今次因為對跛腳，我就只可以好似一個媽媽咁，

好浪漫咁喺池邊睇吓書同埋......看住大家嘅財物。

  

今日嘅目標係去翟道翟，不過我買唔到我自己想買嘅嘢，

又食唔到椰皇雪糕，朋友仔又對於呢個地方無乜興趣，

於是，我哋唯有又去搵個有冷氣嘅地方食雪糕啦！

呢樣，就係我喺翟道翟唯一買到嘅嘢嘞！

次前朋友買到好多不同款式，但係我就搵唔到，

下次真係想一個人行足八粒鐘呀！

夜晚，大家都好攰，所以買嘢返Apartment食，

仲有，大家最鍾意嘅飯後甜品---榴槤。

泰國開心黑仔遊2013第二天@芭堤雅

尋晚折騰一夜，多得酒店出手相助，

令我去醫院都方便好多，

而且，一返到去就見到當值經理出嚟迎接我哋，

仲問我哋有乜嘢幫到手添，

咁我就要求要一個膠袋方便包住隻腳沖涼，

同埋最好有浴缸可以方便將傷口保持廾乾爽，

我都驚自己會唔會要求太多太過份呢？

就係咁，好人嘅經理先生，

就將我哋upgrade去一個有浴缸又向住全海灘景嘅豪華房嘞！

埋嚟睇嘞！可以睇住條街浸浴架！

呢邊窗望出去真係覺得自己居高臨下架。

 

酒店好難搵到包腳嘅膠袋，

於是就俾咗一個全新嘅掛衣袋俾我，

我已經好感激嘞，呢幾日都靠佢至可以沖涼呢！

 露台就係望向海灘嘅。

可以見到啲遊客一批一批排隊上快艇，應該係去玩香蕉船啦！

就係咁，我就坐咗喺露台望咗好耐風景，

嘩！估唔到跌傷腳反而可以享受到渡假feel喎！

跟住，就係時間落樓食早餐嘞，

今次訂房嘅目標之一，就係一定要有自助早餐，

果然......無揀錯，早餐真係幾讚架。

出面仲有得攞香蕉Milk Shake，好濃好好味架！

室外嘅早餐環境真不錯，不過香港人都係怕熱架啦！

所以我哋最後都係揀咗坐喺室內嘆冷氣嘞。

食完早餐，一齊落去海灘行吓，

由酒店去好方便，一過馬路就到嘞，

可惜，小女子呢趟真係唔方便玩水呢，

所以，都係去下一站啦！ 

唔玩水，緊係去Shopping啦，

上咗架「爽條」，每人10Bhat，

一陣間就到嘞！呢一站係「Central Festival」，

入去正在大手掃蝴蝶袋時，

突然間......成個商場停電，嚇得我吖，

以為係咪有咩事？正考慮走唔走，

望吓出面，其他遊人都好悠閒好似無事一樣，

就覺得自己好似太緊張嘞，可能停電已經係家常便飯，

咁，我唯有......繼續買啦！

買飽就去食餐飽啦！

我哋去咗Fuji食日本嘢，叫到成檯都係，

都係2629Bhat，好經濟又好食！

送走朋友去按摩，我無法參與啦！

唯有自己搭爽條返酒店囉！

聽講，搭車前千萬唔好問價錢，

跳上車就得嘞！公價10Bhat，

如果問價，就會收好貴架啦！

自己一個人返酒店Hea一輪，

我就返去Let's Relax接番朋友們，

佢哋都話......一般啦！

然後，我就要去下一個景點：醫院，

因為要去覆診嘛，護士幫我洗洗傷口，

咁就盛惠600港元，我要求聽日起自己洗，

佢唔俾喎，話要我返曼谷後繼續去醫院覆診，

我講到牙血都出埋，

終於，佢都批准我之後可以自己洗傷口嘞！

跟住，Call番尋晚個的士司機，

車我哋去夢亞來食飯，可以話：環境好好，食物一般啦！

雖然受傷，雖然無得去按摩，

但係，今日悠悠閒閒，都過我好開心吖，

自己一個人搭爽條，對我嚟講都幾勇！

唉~~~聽日就要出返曼谷嘞！今日已經唔捨得添！

泰國開心黑仔遊2013第一天@芭堤雅

2013年暑假，好急咁安排咗一個泰國之旅，

因為，今次係第一次，

我哋幾個識咗N年嘅中同學，

居然得閒一齊去旅行喎，

所以，二話不說我就book好所有嘢啦！

雖然泰國己經去過好多次，

但係大家對於呢個旅程，都好......期待架！

7月19日，早機去曼谷，晨早0750，

即係差不多6點就到機場嘞，睇吓個天仲未光架。

雖然純Hea，唔駛做功課，

但點都要帶本書旁吓身嘅。

今次搭港航，機票都幾平，

只係$2158.00，

咁......都唔會好期待個飛機餐有幾正架啦！

無期望，自然又無失望啦！

而且，仲可以喺機上睇埋『桃姐』，

真係開心嘞！

從飛機望向外面，睇嚟，天氣應該好好喎！

去到第一件事就係出番張電話咭先，

呢張咭勁抵，299B，

7日可以無限上網又可以打電話，

朋友仔晚晚打番香港都仲夠，抵呀！

出到去，預約好嘅司機已經到咗嘞，

明明係叫佢寫Gin and friends party架啦，

佢又寫咗Gin and family喎，

都唔知好嬲定好笑呀！

一到埗直去芭堤雅，今次住Holiday Inn，

貪佢地點方便又新淨，

仲好似話戶戶向海灘添！

而且價錢都唔算貴，

喺Agoda訂，每人每晚$532.50，

係中間價位，原本想訂另一間，

但係佢限定最少要連住3晚，所以最後都訂唔到。

呢間酒店都幾靚，見時間尚早，

於是行個圈先，個兒童遊戲室都幾靚喎！

大堂好大好有氣派，

不過Check in果時有啲頂住條氣，

因為佢哋無排隊措施，

咁啱櫃檯個Staff又無乜禮貌，

終於個經理都見到我個不滿樣，

於是親自幫我Check in。

Check in之後出去視察吓環境先，

後面穿過Hotel Ibis，

就已經去到Pattaya 2nd Road，

梗係先去換啲錢先啦！

嘩！對3.93，好抵呀！

可惜附近無乜好食，但係大家都好肚餓，

咁就唯有去Burger King食個漢堡飽先啦！

然後去搵吓網上啲人都高度推介嘅Let's Relax，

確定地點後，就book定聽日過嚟按摩lu。

價錢一覽表，唔算貴又唔算平。

然後，我問大家想唔想去Art in Paradise Museum，

係一間3D藝術館，之前喺北海道都玩過，

大家都無所謂，咁就每人俾200B，

好開心咁玩咗兩個鐘嘞，

啲相太多，反而揀唔到相放上網添！

之後，我哋想去夢亞來，

商場啲Staff同路邊啲人都話好近，

可以行路過去，但係行到火滾都搵唔到，

最後，都係去食杯雪糕降降火啦！

 終於都係決定返去酒店後面啲大排檔食嘢！

啲食物都唔錯架！

後來，我哋諗住出去搵間舖頭按按腳，

點知，小妹中途差錯腳，

搞到要入急症室，大大話話睇咗成千蚊醫生添，

仲要朋友仔擔心，真係唔掂！

呀！仲有，要鳴謝酒店嘅大力幫助，

幫我send資料去酒店，

又幫我用Local價叫的士，真心感謝！

今次呢個旅程，因為我自己唔小心，

搞到影響埋班朋友仔添，真係唔好意思呀，

不過，對我嚟講真係一個難忘嘅經驗，

居然玩到要入急症室，

真係人一世，物一世，乜都試過吓呀！

仲有，第一次坐輪椅添！

好彩有買旅遊保險啫！

如果唔係，要自己俾$1700醫藥費，

我就真係瞓唔著嘞！