下半場 ~~ 馬來西亞兩頭遊〈第五天回程〉

12月31日〈星期一〉第五天

好啦！準備好晒，點解，嚟馬拉都咁多行李架？



一早食個豆漿油條早餐先，一個字：差。

尋日玩得咁開心，今日又『安哥』。

玩完次後，本來想去食榴槤，
但係經過投票決定，都係留喺商場食甜品啦！

回程唔再搭Monarail，喺酒店約咗架的士直接去機場。

馬來西亞真係要搞搞個旅遊業，邊有機場聖誕節咁靜架？

起飛前先食埋個蝦麵先，都係一個字：劣！

Kopi即係Coffee，可能喺度應該飲咖啡好啲。

今次收獲？照舊，美味米。

呢個抵，民俗錶，RM10一隻。



好香好滑嘅榴槤朱古力，不過價錢就貴咗啲。

行餐死至搵到嘅『林明記』，主要係買蒜蓉辣椒醬，
但係試過佢啲肉干及幾好味喎，最鐘意佢幫你逐塊真空吖嘛。

十天之旅已順行完成，講到玩，都係新加坡好啲，
而且，始終新加坡治安都好好多。
啲人成日話馬來西亞消費好低，其實都唔係差好遠咋，
Legoland，我覺得值得一去，要去玩，就計劃一下啦！

下半場 ~~ 馬來西亞兩頭遊〈第四天吉隆坡〉

2012年12月30日〈星期日〉第四天

都未試過寫一個行程會相隔成個月嘅，
再唔寫就乜都唔記得晒架嘞！

之前已經講過，酒店樓下係大型商場，當然有兌換店啦！

其實喺度換錢比機場仲抵，可以嚟到先換。

呢度有一個大型室內遊樂場，帶小朋友嚟就啱晒。

穿過商場，先去Killiney食個咖央早餐先，Yummy！

一定要食飽啲啊！因為我哋決定要玩啲體能活動→保齡！

喺一個宗教國家，年輕人仍然會玩年輕人嘅玩意，
這個畫面有點弔詭吧......



三個門外漢，好開心咁消磨咗一個上午。

樓下就有台灣美食街，好似好多嘢食咁喎......

下午，決家去做一個普通嘅遊客，買手信去！

感覺好似以前去旅行團咁，門口有人派貼，
記低邊一團買嘢，方便記賬回佣，咁......我有無得抽佣呢？

呢度有好多古靈精怪嘅口味，有無人敢買呢？
以下呢啲都唔係我飛佛，我主要係嚟買榴槤朱古力咋！

中午去食『家嫂魚湯米線』，去到啱啱趕得切落單，
做埋我哋呢單就落場休息嘞，所以只有我哋一台客。

我哋已無多餘時間慢慢揀，所以就叫招牌菜啦！

我哋都一致認為：好好味！

食完番去手信舖，買埋榴槤咖啡先，好香架！

回程番酒店放低行李，然後分頭喺商場Shopping，
約好時間番房集合，大家都各有小小收獲呢！
今日大家都行到好攰，就留喺商場食晚飯啦！


好明顯，呢間係食雞嘅連鎖餐廳。



食物，都OK啦！即係好似去咗大家樂咁囉！


今日又完結嘞！聽日番香港，今晚執執行李先。

下半場 ~~ 馬來西亞兩頭遊〈第三天吉隆坡〉

2012年12月29日〈星期六〉第三天

旅行社原本安排上午九點有車嚟接我哋去機場，
但係飛機係十二點四十分，咁長時間點捱呀？
於是我哋就同司機更改為十點半，
今日個司機好好人，一切順利十一點十分到達機場。

千算萬算，無辦法預計嘅係：航機delay！
你睇，機師都係同我哋一齊企喺度等機，好公道吖。

馬來西亞有個好處，就係機場都有免費wifi，
內陸線呢啲細機場有30分鐘；國際大機場有3小時。

機場細細，過咗安檢後，候機室都好乾淨下！

就係佢，認住佢，起碼遲咗30分鐘！

出市區，就試吓搭最快到達嘅KLIA Express啦！

好似一般機鐵一樣，都算乾淨舒適。
車費唔平啊！每位要收RM35，
去到KL Sentral仲要轉KL Monorail，
唔好信旅遊書呀，旅遊書個地圖顯示兩個站係相連嘅，
咁我諗就好似喺青衣轉地鐵一樣，最多都係上落電梯啩？
誰不知，一出閘根本無任何指示牌去KL Monorail，
於是每行一個路口就問一個人，途中要經過爛路，
仲要拎住個喼行樓梯迫車，係唔止一條樓梯啊！
都怪自己無做足功課，連累兩位團友行餐死呢！

幾經波折終於到達酒店嘞！雖然辛苦，但係非常值得！
有房有廳有廚房，廁所浴室分開兩間，58平方米，
雙人房，每晚先至HKD792.6，真抵住。

酒店設施好好，有泳池、蒸汽浴、桑拿、乒乓球、籃球、
壁球、健身室......以上我都麻麻，最正都係樓下個商場。

房間正正向住雙子塔，以下係雙子塔嘅日與夜，靚嗎？

商場好大，樓下有啲大牌子，越向上賣嘅越平。

放低行李又視察完環境，就向賣手信嘅街道進發，
行過去大約10分鐘左右，都好方便。

團友話要去返呢間舖頭買「香脆蝦米辣椒」〈醬〉，
點知跟住地圖行嚟行去，搵成半粒鐘都搵唔到，
都話唔好信旅遊書架啦！好彩最後有高人指點先嚟到咋！

對面就係夜市，食嘢都幾平，
我哋想向住雙子塔慢慢食，於是就買好多外賣嘞！

樓下商場有兌換店，都好方便，而且睇嚟都幾可靠添。

睇吓個價位先，嘩！有38.5呀！所以，千祈唔好喺機場換。

今晚間房，58平方平，又係我一個人獨佔lu！

下半場 ~~ 馬來西亞兩頭遊〈第二天重點項目Legoland〉Part 2

12月28日〈星期五〉第二天

有時路邊都有驚喜架，欄柵裏面居然有野狼？

好奇埋去睇吓，原來都係Lego做嘅，問你服未？

本來想睇路牌搵搵路嘅，點知反而俾個路牌吸引住添。

路邊會有鸚鵡同你拍照留念，不收費喔！

轉個彎，居然有呢啲懷舊遊戲玩喎！

一般遊客就算免費都唔玩啦！一個唔覺意中大獎都唔知點算？

其實Legoland就好似USS, Disneyland咁，
將樂園分開5個遊戲區：Lego City, Land of Adventure,
 Imagination, Lego Kingdoms同Lego Technic，
比較特別嘅，係中間包圍住Miniland，
係一個世界各地嘅微縮景區，真係精緻到不得了，
淨係睇呢道都值回票價啦！

 

細微部份更加不容錯過................. 

同場加映，我哋中間其實出去一趟，記住吸個印，
再入場除咗睇手印，都要再次出示張飛，千祈唔好唔見呀！

一出去有好多嘢食，價錢比入面平得多，
舉例講：入面一支可樂賣RM5，一閘之隔就賣RM2.5。

呢間手信店啲貨都幾多，而且價錢唔貴架，榴槤咖啡好讚呢！

大門口唔準停車，所以會有的士司機會過嚟搵客，
最緊要問清楚係咪照標收錢，成交後就跟住司機起勢行行行...

原來的士都停喺大型停車場，究竟我哋搭的士去邊呢？

登登登......櫈！就係呢道嘞 ~~ Hello Kitty Town。

都好多本地人聞風而至，我諗新山真係無乜娛樂呢！

門票一啲都唔平，差不多港幣169元呢！而且係大小同價！

可能太新，買飛時連地圖都無，呢張都係網上官網下載咋！
睇到就會明白點解唔派地圖？如果買飛前睇見咁細地方，
我諗我可能會立即離開！



Hello Kitty Town入口，就喺大樓扶手電梯上二樓。

入去睇吓，呢度就係咁大，一眼望晒，細過冒險樂園！

裏面用好靚嘅Sanrio人物做裝潢，我諗Fans應該會鐘意。

小朋友可以去玩玩波波池。

或者迷你咖啡杯......

或者排隊同Kitty and Daniel拍拍照..........

又或者睇吓佢兩個跳跳舞............

最值得玩就係以下呢個遊戲，其實一d都唔恐怖，
只係要以智力解題過關，喺唔同關卡收集5個英文字母，
最後喺出口將英文字母組成一個字彙，都幾好玩！

就係咁，完成後會得到證書一張。

第二個最花時間嘅地方就係：Hello Kitty的家，
首先，先帶大家睇睇Kitty嘅浴室......


非常夢幻嘅Kitty廚房.........

以白色做背景嘅Kitty客廳，觀迎大家來坐坐......

最後，係Kitty最秘密嘅睡房。

完嘞！HKD169玩完嘞！在電梯往外睇，到處都係地盤，
新山開始發展旅遊業呢！司機話好多政府大廈都搬到呢附近嘞！

樓上係The Big Club，我諗都係一樣架啦！我唔會再上當架！

落嚟離開前必經之路：手信精品店，最後都要你留低啲！

旁邊仲有一間餐廳，遊客們，消費吧！



我要講有一個小故事：
話說回程時我哋準時6點喺車站等司機，
見到啲車要排長龍嚟上客，我哋就直接行出去路口，
費事司機要排隊入嚟嘥時間，出到去真係見到我哋架車，
上到車係6點05分，司機好嬲話已經嚟兩次，
講真！我哋無遲到，係你早，但係，我哋都無駁嘴，
因為，佢已經嬲到喺一條開70嘅路開到120，
仲喺兩線行車嘅兩架車中間爬頭，爬頭果時都係120，
終於，原本30分鐘嘅路程佢用咗19分鐘就到達嘞！嚇死！


呢度時時會見到呢種豆奶，好好好好好味！

返到去行吓夜市搵嘢食，喺路旁嘅兩邊，
一邊係印度食物；另一邊係中國嘅夜市。

中國人呢邊好旺，好多嘢食。

我哋見到唯一一檔賣榴槤嘅，食咗一個金邦一個D24。

兩個人，一陣間就KO晒！

就係呢間舖，我應承咗老闆要將呢張相擺上網架。


買晒好多嘢，返酒店再慢慢邊傾邊食。


就係咁，新山Legoland之旅就完結嘞，
Legoland係一個好值去嘅主題樂園，
我最欣賞佢哋用Lego拼砌嘅裝飾，
尤其是Miniland，真係嘆為觀止，
另外，樂園嘅遊戲有顧及各個年齡層，
特別係有啲親子參與嘅活動，好讚呢！
但係，如果唔係想去吉隆坡或檳城等其他城市，
我會建議由星加坡去，可以免卻咗長途車或內陸機之苦，
而且新山嘅旅遊業暫時仍在發展中，
玩唔到三日，咁不如就順便玩埋新加坡啦！
聽日，又要搭內陸機返新加坡嘞！