第三天，繼續華欣

12月28日〈星期三〉

其實喺華欣3日，除咗hea之外，有乜好玩呢？

團友見到有d local tour，係去睇瀑布嘅，

問吓酒店職員，佢話最近天氣麻麻，建議我哋唔好去，

都啱嘅，嬉山莫嬉水嘛！

於是，又喺小陽台度拍拍照，眠一眠先！

Shuttle bus時間到嘞！我哋決定去PlearnWan，

呢度好似一個泰國集古村咁，好近酒店，都幾靚架！

好似返咗童年時，我屋企以前都有呢種水壺架！

工廠妹帶飯返工d飯壺，一層一層，好別緻。

懷舊玩具，同而家d扭蛋無得比。

呢個集古村唔駛入場費，大家隨便埋嚟睇埋嚟揀啦！

呢度有拍照區，有嘢食，而且d食物都唔貴，足以消磨幾個鐘，

四圍嘅環境佈置，令人好似置身呀飛正傳嘅年代，

唔知係咪主要係俾泰國人嚟懷舊一吓呢，

呢度所有指示都係用泰文，全無英文翻譯，呢個係美中不足之處。

又係時候開餐嘞！由於無英文指示，我哋只可以搵d有圖片嘅食肆。

沙嗲、炒河、炸魚旦......總共265銖。〈懷舊青蛙伴碟另計〉

離開PlearnWan，我哋要趕住搵車走，因為約咗去按摩，

四圍都無的士，見到有公共小巴就上，總站去到夜市，位位10銖，

落咗車行15分鐘就到嘞！

大家按咗兩個鐘，位位500銖，我覺得一般啦！

行番出去夜市，搵一間人丁旺d嘅舖頭食飯先，

大家都肚仔餓嘞！叫咗六餸兩湯，白飯任裝，

捧住個肚離場，盛惠1070銖。

行到夜市，少不免又食吓小食啦！

見到呢個特色雪糕，一場嚟到梗係要試吓啦！

唔食榴槤嘅朋友，請迴避！

行完夜市，又掃咗一大堆食物返酒店消夜，

好彩多數係水果，呀！芒果糯米飯都好好食，點解香港食唔到嘅？




笑話一則 ~~~

大家顧住玩，有人唔小心將個山竹碌咗落泳池，

我哋費事聽日個池變成血染的風采，於是當事人就去櫃台度借魚網，

但係，山竹嘅英文係乜呢？

人急智生，當事人就話俾對方聽：apple fall in water.

已經笑死我哋！

但係對方仲未明，只係回覆佢：night time, no swimming！

仲不斷耍手擰頭，真係雞同鴨講呀！

         

好彩最後都有個工作人員嚟救番個山竹咋！

第二天〈下〉，行街街

12月27日〈星期二〉下午

上午行晒成間酒店，又出去附近巡視過之後，

距離Shuttle bus開嘅時間仲有成個幾鐘，

於是，大家又再返小陽台，

一邊睇吓書；一邊聽吓商台節目；

一邊享受吓呢兩款泰國特有味道嘅薯片：蟹味同北京填鴨味，

評分：蟹味無乜特別，北京填鴨相當ok，於是佢就成為我哋其中一個掃貨目標嘞！

時間到嘞！搭酒店免費車去市中心行街街，

個個嚟華欣都係行呢個商場架嘞，

入面都幾好行架！

貨品種類都算多，小舖又有；大牌子都有，最開心係有間大型超市。

都有幾多食肆，主要係日本菜同扒餐，

我哋揀嚟揀去揀咗呢間，因為大家想食魚蛋河。

叫到成檯食物，先至640株，每人平均食咗26港紙，

味道唔錯架，大家飲飽食醉，就向超市進攻。

大家喺超市買咗一輪，咁快又肚餓？

見到咁吸引嘅雪糕，有邊個會反對吖，

於是又食，6杯雪糕總共654株~~~仲貴過頭先個正餐，

不過真係好好味！

食飽後，我哋6個人分頭行事，約好一個半鐘頭後喺番雪糕舖門口等。

大家都好準時，齊人之後，又食！

唔知邊本旅遊書介紹過呢間迴轉火鍋，

話經濟實惠所以吸引好多後生仔女幫趁喎，

唔好信旅遊書呀！

我見門口都排晒長龍，諗住應該都有d保證啦！於是決定食佢囉！

點知，佢就得到呢個旅程中嘅『最差食肆特級獎』嘞！

首先，坐位擠迫，侍應又無禮貌，

可能我要求換位，得罪咗佢，於是完全無人過嚟上湯底。

90分鐘放題，等都等咗十幾分鐘啦！不過無所謂，

因為重點係：食物質素差！睇吓，就係食呢d嘞！

無架啦！睇晒啦！十分鐘就可以食完啦！

仲要位位299株喎！十個差！

食完嘢出嚟，d舖頭差不多已經關晒門，

於是我哋喺門口搵Local Taxi返酒店，

成功講價：6個人一車200株。

頭先食唔飽又一肚氣，

咁啱酒店門口有個大男孩賣薄餅，

於是我哋去湊吓熱鬧買返兩件，

盛惠45株，好好味呀！

第二天〈上〉，酒店篇

12月27日〈星期二〉
今日一早起身，要清清楚楚睇吓間酒店先！


酒店就係座落呢條大路嘅旁邊。

酒店大門唔係幾起眼，而且又新，
所以司機一般都唔知點嚟。

好彩佢啱啱喺著名嘅Anantara旁邊，
所以搭的士時同司機講喺Anantara隔離，就肯定識路嘞！




酒店對面有個類似美食中心嘅地方，但係尚未開張。



呢度係入口候車處，雖然唔係幾近市中心，
但係好彩每日有幾班shuttle van到市中心。

小小大堂......

唔知點坐好嘅梳化......

成棟酒店就係靠住呢個泳池而起。



呢3日我就係住喺呢間115嘞，
我book房時講明唔要101同102，
因為太近餐廳，唔可以直接跳落泳池。



房門外走廊，呢度真係好靜好舒服架！

餐廳旁曬太陽嘅躺椅，實有位......

小小健身室，只有3件器材，無教練、無任何staff、
冷氣？電視？自己隨便開啦！
想飲水？喺雪櫃自己攞啦！好free！






我哋總共book咗3間房，大家日日打開度門，
一齊攤喺度~~~~~Hea！

雖然我間房可以直接跳落水，但係由於太凍嘞！
我始終都係~~~~~無落到水，下次要夏天至嚟。

睇咗咁耐，去食個早餐先，
呢度就係每日放早餐嘅地方。




D檯set得好靚，因為我哋6個人，要拍多張檯一齊，
第二朝，D Staff都主動幫我哋預備好呢張特別檯，
不過，每日都有好多蒲公英陪住我哋食早餐。



地方雖小，但係早餐都幾好！

居然有冬瓜粒湯同白飯，Yummy！

食完早餐又hea咗一大輪，
下午出發去市中心逛逛先！

第一日：起飛！

2011年12月26日〈星期一〉

喺物價高昂嘅新加坡之旅之後，一早決定要去泰國吃喝玩樂，

過皇帝式生活......七日，

開始搵package果時，仲未有水災，

D package貴到飛起，

難得揾到學聯，酒店兩晚送一晚，一於扑鎚，自己再book三晚華欣，

一切落實，點知一場水災，身邊朋友不斷嚇我哋，

但係我哋幾個一啲都無受影響，

終於......今日如期起飛嘞！


呢個package唯一唔好，就係下午機，去到都已經4點45分。

好多年無搭過泰航，非常滿意呢！

飛機餐，一般啦！

一落機已經好有渡假feel~~~~我嘅意思係啲海關呀，慢到吖！
個司機喺機場都等咗成粒鐘，但係佢個樣好似已經慣咗咁，
慢 - 應該係呢度嘅文化。
呢次喺網上揾到間公司book咗架van，價錢係咁多燴之中最平，
曼谷至華欣雙程bht5000，
之前喺網上同佢溝通，問佢架車有幾大，佢點都唔答，
我哋6個人，如果佢俾架7人van我就唔掂嘞！
點知原來架車係可以坐11人嘅，仲好新添！大家都好滿意！
曼谷到華欣3個小時車，大家由黃昏6點上車，
到8點都有D餓，司機哥哥喺中途站俾我哋落車，
估唔到，嚟到泰國第一餐居然係~~~家鄉雞。

9點鐘，終於去到酒店嘞，
呢度就係嚟緊3晚我哋會住嘅Best Western Plus Serenity，
點解揀佢？因為平囉，原來華欣book酒店好貴架！
職員英文一般，但係態度好友善，夜涼如水，好舒服。

雖然呢度只係一間細細間嘅渡假酒店，
但係都有送行李嘅服務架。

終於入到房嘞！房間都尚算寬敞，
最大賣點係：前面個露台，點解？聽日自有分曉。