重新認識新加坡第五天

7月30日〈第五天〉

今日要走lu，通常都係咁架啦，最後一日都無晒心機影相架嘞！
所以我今日都唔例外，今朝一早將行李寄存喺櫃檯，然後搭車去烏節路，
一早乜都未開門，就喺條街度行嚟行去，因為我哋約咗11：00去Hyaat食lunch buffet，
但係顧住食又無影到相嘞！呢餐係咁多日之中最好食嘅，可惜午餐食量有限，下次要嚟食晚餐。

有人話星加坡日日都會落場雨，我哋真係好好彩，今日係最後一日先至遇到下雨天。

食完buffet就攞番行李去機場lu，Jetstar，我哋又嚟嘞！

睇吓！個天都唔捨得我哋走，流眼淚呢！

比較一下：回程無得坐longleg room，真係窄好多架！

總括嚟講，今次都好好玩，好悠閒，又食咗好多嘢，雖然係熱帶城市但係一D都唔辛苦。

要多謝各位團友咁合作同信任，多謝朋友個朋友熱情嘅款待，多謝個天俾咗好好嘅天氣我哋......
星加坡，可以再去架，下次最好可以帶埋大細姪女去，或者可以去埋民丹島添。

重新認識新加坡第四天

 7月29日〈第四天〉

今日嘅主要行程係聖陶沙，搭Sentosa express入去真係好方便。

一入到去就見到隻魚尾獅，雖然無去同真果隻地標影相，同呢隻影補留數啦！

今次主要係想嚟玩呢個Skyride Luge，係新嘢，好似紐西蘭滑草車咁，
然後有架吊車吊番你上山頂再玩過，$95玩2次，OK抵！

玩完之後去海豚館，$840可以落水同海豚游水，我哋呢班死窮鬼緊係唔會啦！
有一個洋人家庭一家6口參加咗，感激！我哋可以影相lu。

幾可愛？做海豚訓練員真係好勁呀！

正面都係咁可愛！我覺得佢好似係粉紅色架！

然後開始超近距離睇海獅表演！

離開聖陶沙之後，我哋去foodcourt食咗D嘢，然後......

又係shopping嘅時間lu，呢個vivo city都幾大吓，漫無目的四圍行，其實已經好攰......

點解唔返酒店休息？因為要就番時間會合朋友食晚飯，
朋友好客氣，請我哋嚟老巴剎食嘢，呢度真係好有氣氛，食物都唔錯。

平實但好好味嘅燒雞翼。

喺香港好耐無食過螄蛤，諗住試吓啦，不過都係麻麻哋，唔係幾新鮮。

蠔餅都OK！

燒蝦好好味！仲有其他食物不能盡錄，今晚又係飲飽食醉盡興而歸，因為，聽日要走lu。

重新認識新加坡第三天

7月28日〈第三天〉

今朝一早先去超市掃手信，呢度d人好悠閒，換句話嚟講就係做嘢真係好慢，
等收錢過機等咗好耐，最搞笑係後來check吓單，有好幾件貨品都無收錢，真係求其到不得了。

買完手信又再去小印度逛逛，第一晚嚟到都收得七七八八，日頭嚟到氣氛又唔同d。

係一個好典型嘅遊客區，買嘢開天剎價。

離開後去搵嘢食，途中經過各種寺廟，喺觀音去隔離就係印度廟。

喺觀音廟對面有個呀伯〈Albert〉市場，我哋就喺呢度食午餐，呢個蒸粿幾好味。

好睇唔好食，完全無味嘅芒果汁，係成個行程中最失敗嘅食物。

都排幾長龍嘅椰漿飯，好唔好味？真係唔係幾識形容。

第二次喺新加坡食海南雞飯。

D飯，都係咁啦！

魚蛋麵都OK！勝在夠平，平到笑！

食完就出去車仔檔食真正嘅雪糕三文治，呢個先係戲肉，好味！不過我又被隔離嘞！無錯，係榴槤雪糕。

食完嘢返朋友屋企執好行李離開lu，再次多謝朋友招呼我哋住咗兩日，又帶我哋周圍去玩，
真係唔好意思打搞人哋咁耐，所以第三日同第四日我哋book咗酒店，係好近Dhoby Ghaut嘅YWCA，
以呢個價錢，呢間酒店真係唔係幾掂，裝修舊不特止，最嬲係沖涼水時冷時熱，
唯一好處係交通方便，而且附近有間Carrefour，買唔夠手信夜晚可以落嚟再買過。

放低行李後先去烏節路行咗一陣，忍唔住再食多一次亞坤，然後就直接搭的士去動物園，
星加坡動物園就喺夜間動物園對面，趁佢未閂門，朋友就唔放過任何買手信嘅機會，
入咗去手信店逛逛，我就先去買夜間動物園嘅入場劵，又check吓d show嘅時間。

呢度就係我哋嘅目標嘞，我之前已經嚟過兩次，其實我想去日間果個多D，但係團友就想去夜間，所以最後決定嚟呢度。

喺呢度食晚餐無乜選擇，就食碗叻沙〈Laksa〉先，不過不失。

跟住又Order咗D沙爹〈Satay〉，不過等咗好耐，都係......不過不失。

呢個場，佢好嘢！一D都無變，好悶！我真係唔會再嚟架嘞！

重新認識新加坡第二天

7月27日〈第二天〉

呢間係我喺星加坡食到最最好味難忘嘅餐廳，亞坤咖央，點解香港無咁好味嘅多士嘅？

呢碟係加咗黑豉油同胡椒粉食嘅生熟蛋，yummy！我最鐘意食半生熟蛋架嘞！但係佢都俾咖央多士搶晒風頭。

超好味多士，睇吓佢脆到？值10個Yummy呀！4塊啱啱好，多一塊都會太膩。

聞說咖啡好好飲，可惜我無福消受。

食飽飽就向USS進發，四個人去旅行真係好，搭的士最經濟，入USS之前先經過Casino，連麵包都同『賭』都關。

由於就嚟國慶，周圍都有慶祝活動。

一入去有架大大爆谷車，都幾吸引！

成11點先入場，但係周圍都無乜人。

已經過咗星加坡學校假期，所以去到邊都唔駛排隊，入去呢度玩Mummy，
都幾刺激，好似Space Mountain，過多2年都玩唔到囉！

不知不覺去咗水世界。

睇咗一個同華僑城差不多一模一樣嘅show，悶！最憎睇show！

都係去睇4D啦！好睇過廸廸尼果個架！

開咗無幾耐就停駛嘅過山車，唔係我杯茶，停唔停都對我無乜影響。

周圍都係同電影有關嘅紀念品，不防買番個俾自己個最佳男主角同最佳女主角吖！

呢個科學怪人好戔鬼，以為佢係石像？錯！其實係真人嚟架，佢仲周街行嚟行去嚇人添！

登登登櫈......姑姐又登場嘞！梗係啦！難得喺招牌地球前面一個遊客都無，
呢張相事係值得留念！ Bye bye USS，我可能唔會再嚟架嘞！

玩飽就去河畔食海鮮，呢個好好味，係我最鐘意嘅奶油蝦。

好出名嘅胡椒蟹，唔......我就麻麻啦！

呢個辣椒蟹都好好味，個汁好正，返到香港我都有煮嚟食。

食咗咁多濃味食物，食番個饅頭啱啱好！