第九天：2017年8月4日
走嚕！行去JR站附迎搭巴士，760円一程。
最鐘意坐機場巴士嘞，舒舒服服就到機場啦！
去到機場，梗係又買啦，呢度都有自製烏冬套裝喎！
仲有好多款烏冬麵，方便送禮。
又見希少糖，機場都平過香港。
呢度都有今治毛巾喎，之前買唔到都可以喺機場買。
好啦！登機嘞！天氣尚好，
但係我哋一走，第二日就打風嘞！
好多人都濟留喺日本走唔到，我哋真係好彩嚕。
第一餐。
台北轉機，見到呢架車，諗起九日前......
等轉機期間，買到我最鐘意嘅手鈪，仲要七折添。
轉機，第二餐。
香港機場如果可以改善一下管理，
唔好成日令航班Delay同行李Delay，
相信排名會更好。
有朋友嚟接機，幫得哋影相。
哈！好搞笑，見到自己推行李出嚟個樣。
團友集合影張全家福啦！
旅程雖然貨不對辨一啲都唔悠閒，
但係就充滿歡樂，你哋認同嗎？
可能大家假期都好難遷就，
但係我相信一定有機會一齊再玩嘅！
今次Best buy，除咗桃之外，就係呢枝柚子蜜嘞，
平過香港好多架，而且好好味！
當然桃係主角啦！今年食桃嘅Quota已經用盡嘞！
睇吓妹妹食得幾招積、幾得戚？
加埋佢身上套浴衣都係今次手信之一，
所以我咪鐘意夏天去日本囉！
應該話，我乜嘢季節都鐘意去日本至真！
第八天：2017年8月3日
今朝食完早餐即走，最後兩天，行程緊密，先搭電車出JR站，
因為尋日視察過，JR站肯定有Locker放大喼。
放好喼又搭返轉頭，去大街道站。
落車見到商店街，但係唔係我哋目標，所以我哋行反方向。
見到個圖，應該估到啦！
我哋呢啲老人家，近年真係好鐘意行城架。
沿住呢條路上去就到車站架嘞。
點知，行行吓我哋俾呀大五郎吸引住。
連門口張櫈都咁靚，點可以抗拒呢？
日本真係一個貓之國，處處都係消費嘅陷阱，
我哋除咗留低30分鐘，仲留低咗好多銀兩添！
睇吓呢個貓店長吖，可愛度爆錶呀！
買完後，終於去到纜車站啦！
乘客可以選擇搭纜車定單人吊車，
搭纜車就留意時間表，仲有10分鐘開車，自己決定等唔等囉，
至於單人吊車呢，就唔駛等，係一直不停咁開嘅。
左邊就係纜車，右邊就係單人吊車。
我哋最終就選擇咗搭單人吊車嘞！好舒服架！
不過要小心啲乖乖哋坐定啦！無安全帶架！
松山城好難就位影架，影個Cute版啦！
松山城，位置喺132公尺嘅勝山山頂，
係擁有位置最高海拔嘅城堡。
佢係日本現存12座天守其中之一，
唔知我哋幾時可以去曬12座呢？
其實松本城都幾大，望過去仲有好多地方未入到去。
山上風景好，真不愧為海拔最高城堡喎！
原來松山城已經415歲？
玩完走嚕，大家有十幾分鐘去便利店買午餐JR上食，
尋日見已經好想買佢，愛媛懸名物喎！
打開裏面有兩個柑，好健康。
跟手去隔離間麵包舖買埋呢個1000円嘅禮盒先。
上到JR，急不及待要即刻開箱嘞！
嘩！Perfect！我呢盒係最後一盒齊款架嘞！
五個人，每人一款，啱啱好！
去四國，又點可以唔食麵包超人麵包呢？
返到高松，今晚最後一夜嘞！
做啲正經嘢先，我要買手信呀！
去返Ace one，仲有貨，但唔多，買咗先啦！
之後，去youme town，等咗好耐車，
原來呢道好值得行，大家都買得好盡慶，
可惜佢交通配套認真差到不得了，
巴士又早停，去搭琴電要摸黑行廿幾分鐘，激死又攰死！
返到高松，我點都要食返餐骨付鳥架嘞！
即係炸雞脾囉！都好好食架！
今晚都係住返老地方Takamatsu Terminal Hotel，
由於有一個朋友返香港先，呢度又無單人房，
所以我今晚一個人住兩張床，
啱曬我執行李啦！
買吓買吓，原來買咗咁多桃喎！
有本事買，都要有本事拎至得架，
Hand carry得7kg咋！
明天的事明天處理，開開心心影張大合照先啦！
