高雄『想』櫻之旅第一天

2013年4月3日〈第一天〉

係呀！無幾耐咋！又係台灣。
鬼叫上次睇唔到櫻花咩？今次好想平平哋睇吓嘛。
話時話吖，嚟過台灣咁多次，原來真係無去過阿里山過喎！

平時我偏向散Book酒店同機票，貪佢選擇多吖嘛，
而且如果一早編好假期，早啲決定就早啲訂，咁就可以平啲添！
但係我都會先睇睇啲Package先，起碼有啲資料先吖嘛，
今次一睇，唔知點解俾新華個Package吸引住，
決定一定要住呢間酒店，
有咗目標，一切就易搞啦！

登機閘口喺70號，我只係唔明白，點解唔係順序嘅呢？


加少少錢，搭港龍，轉早機，出發嘞喂！

咁短機程，只係食點心喞！仲好，我鐘意呀！



我又唔明嘞！資料顯示飛行時間係80分鐘，
但係實際只係飛咗60分鐘，飛機可以超速嘅咩？
喺仲快過我搭車出銅鑼灣同朋友食飯嘅情況底下，我哋到咗嘞！

高雄機場好方便，一出去就可以搭捷運，
不過呢度唔可以用悠遊咭，要買另一種儲值票，
我哋計過呢次可能只係搭兩三次捷運，
所以決定買單程票，呢度同深圳一樣係用籌碼嘅。



入鄉隨俗，先睇吓點用將單程票先，
唔係就咁掉落去架，要先喺旁邊感應一下先。

放大啲睇吓~~~~

大約20分鐘就到目的地嘞，
呢個係大站，係高雄捷運嘅唯一轉乘站，係咪好靚呢？
有名堂架，呢度係由日本建築師高松坤設計，以祈禱為主題象徵。
呢個咁靚嘅天花係車站裏面嘅公共藝術作品『光之穹頂』，
係由意大利藝術家水仙大師（Narcissus Quagliata）親手打造。

聞說呢個站嘅使用率喺高雄捷運站排行第六，算係高用量呢！
但係喺我哋住呢幾日，我覺得好靜好悠閒啊。

但係我覺得佢哋啲指示有少少問題，
好似呢度咁，指住6號出口係南華觀光夜市。

行前兩步，另一個指示牌就話係5號出口，應該信邊個呢？



我一向都信自己，我一早已經喺網上揾好資料，
我哋住嘅酒店喺6號出口，
忘記介紹，呢個咁美麗嘅站就係『美麗島站』嘞！

一出閘右手邊就係手信店，未買完可以最後一日喺度再買。

向前行一分鐘，就到達我哋住嘅飯店，
佢有一個好型嘅名：dua。
以下節錄自酒店官網嘅介紹：
『dùa，是以人為主。
dùa，是旅人移動中的安穩；
是旅行途中的一段開心歲月。
源自閩南語〝住〞諧音的dùa，
希望將台灣以人為主的居住概念，
結合在地人的熱情。
在貼心設想的美好空間中，
讓旅客入住之際就感到身心舒暢，
隨時都感受到心中dùa著一股溫暖。』
就係呢一段文字，令我衝住呢間酒店而束成呢次旅程呢！

酒店只開業一年，一切都好新好干淨，職員亦很有禮盡責。



旁邊有一個休閒嘅好地方，可以隨時落嚟坐坐。

呢度好似餐廳一樣，不過並無餐點。



但係有一個自助餐飲區，
可以自已親手沖杯咖啡奶茶甚至鴛鴦嘆一下！

旁邊放咗一啲圖書，有興趣可以扮吓文化人。



另一邊仲正，係蘋果呀，
出發前可以喺呢度搵搵資料添。

睇埋間房啦！一入去，長長酒廊一啲都唔嘥，
足足可以放兩個打開嘅大喼，唔駛擔心啲行李阻住晒。

我哋呢間係12坪雙人床房，
張床一啲都唔細，只係個枕頭太大太大......



呢個都係特色之一，雪櫃嘅飲料係免費嘅，
各位貴賓，請隨便飲用！



浴室很寬敞，設備齊全。

最抵讚係呢個按摩大花灑，水力十足！10個讚！

除咗企缸，另一邊仲有浴缸。

而令我決定一定要住呢度嘅主要原因，就係呢度......



安頓後第一件事，就係先去7仔交阿里山行程嘅訂金，
仲有，呢部機可以買埋聽日去嘉義嘅高鐵飛添，好方便呢！

下一站，去遠傳出張電話咭，
揀遠傳，係因為上次喺台北經驗良好，
點知，可能高雄同台北真係唔同，
首先，上次我只需NT450就可以5日無限上網加通話，
呢邊就話從來都無呢個Plan，
要上網加通話就一定要NT650，
然後，職員建議將張咭放落我朋友個Pocket Wifi度，
咁咪可以share囉，唯有係咁啦，
點知放好後佢話要等30分鐘後至可以上到網，
點會咁架？喺台北係立即上到架喎，
算啦！我哋先出發去下一個行程啦，
點知，兩個鐘都過去嘞，都上唔到，
咁就嗱嗱聲暫停行程返去問啦！
佢話：係呀！係要自己改IP架，佢幫唔到我哋喎！
都算！用我個電話啦！
點知，同到第五日早上已經完全無訊號嘞！
我唔係踩佢，下次嚟都會用佢，
因為，電訊公司嚟講，低處未算低！



講番中間個行程先，
話說我哋本來先去一個大型商場諗住行吓街嘅，
一出捷運R6凱旋站，喺1號出口，
就有免費Shuttle bus接載遊客到夢時代購物中心嘞。

架接駁車係咪好靚好特別、好易認呢？



商場真係好大，而且到處都會見到Open小將，
呢個廣場幾有創意喎！

本來都想試下呢個Open小將英式下午茶嘅。

係一間以Open小將為主角嘅主題餐廳呢！

經過以往經驗，一般主題餐廳都睇唔好食，
都係去美食廣場算啦！起碼多啲選擇嘛！
復活節去旅行真好，周圍鬼影都無隻！

我個餐，OK啦！

朋友個餐，都係咁啦！

好鐘意呢個設計~~~方便矮人踏腳嘅檯櫈！



另一架接駁車，好醒神喱！



點解要咁早走？咪就係張電話咭囉，怕回程佢閂咗門嘛！
我果張搞掂後，朋友決家要去中華電訊試一試，
點知，等一大輪，俾咗錢，足足坐咗兩個鐘，
pocket wifi同電話都搞唔到上網，失敗！

跟住去行咗一陣南華觀光夜市，不過唔啱行。

都係去番六合夜市啦！咁多嘢食！

我哋最鐘意嘅膠袋餐又出場嘞！



夜嘞！好掛住間酒店呀！
早啲休息，聽日仲要超早起身去阿里山呢！