高雄『想』櫻之旅第三天

2013年4月5日〈第三天〉

晨早五點，我哋就乖乖去大廳集合，車準時嚟接我哋嘞！



我哋無選擇搭小火車上祝山，而選擇咗去玉山睇日出。
因為聽聞玉山可以睇到日出嘅機會率係高一啲嘅。

天漸漸光，先睇一睇呢一棵『神木』先啦！



去到目的地已經知道睇唔到日出架嘞！因為天氣唔係幾好，
但係司機都建議我哋等多一陣，試吓可唔可以睇到雲上日出。

喺呢一刻，好似有啲希望......

點知一陣雲從山下湧上嚟，就開始落雨lu。

司機車返我哋去車站，跟住食個早餐先，
呢個早餐係行程包嘅，當然同酒店無得比啦！

就係只有麵包同粥兩種，自助形式，
天寒地凍，食飽就好，唔好要求咁高啦。

熱粥同熱豆漿，唔算好味，但係好溫暖。

一次過睇晒，15分鐘就可以食完嘅早餐。

返房後，仲有一個鐘，本來都想行吓，
但係又開始落大雨啦，所以......都係返房瞓番覺啦！
12:00，仲係落緊大雨，尋日個司機又番嚟接我哋嘞，
第一站：奮起湖，大家都係時候落車伸一伸腳嘞！

同其他景點一樣，呢道有一條老街，有人選擇買手信；

我哋就選擇喺呢道食個懷舊嘅鐵道便當。

個飯盒係咪好懷舊呢？隔離果個係飲湯用嘅碗，
堂食先有湯飲，但係貴NT20，有得飲有得坐，都抵嘅！

團友選擇買呢款NT500嘅便當，
貴咁多，因為食完可以帶走埋個飯盒嘛！

任飲：筍絲清湯，志在濕吓口啦！

飯盒嘅份量都幾大，旁邊嘅配菜都幾好食架。

逗留喺奮起湖大約1個鐘，又再上車嘞！
話就話天長地久橋係一個景點，其實只係一個停車點。

嚟嘅時候搭咗高鐵，回程我哋就選擇搭台鐵。

其實已經搭過幾次高鐵，台鐵反而搭得比較少，
印象中台鐵會比較落後，但係見到指示都好清晰啊！

指定席，1小時15分鐘車程，又可以瞓一覺LU！
入到車箱，同上次搭去瑞芳嘅車好唔同噃，
車箱光猛又乾淨，感覺同喺日本搭JR好相似喎！

返Dua check in後，先將啲衫放晒入洗衣機先，
然後又出去附近行吓搵吓嘢食嘞！
見到呢啲地道嘅豆漿店，好想試吓喎，
但係大家都肚餓，都係決定食咗正餐先。

嚟到高雄，都有『光南』，一定要嚟掃掃貨先！

越行越夜，又無乜心水，最後，都係去咗食牛肉麵。

高雄『想』櫻之旅第二天

2013年4月4日〈第二天〉

今日要一早起嘉義集合，所以天未光就要去食早餐，
餐廳好好坐好舒服呢！



我哋係第二台客入座，全場都無人，任坐。

如果唔係落毛毛雨，坐外面都好正架！



食物選擇非常多，只係太早，仲未有胃口。

食完早餐就馬不停蹄出發嘞！
因為要搭捷運去左營站轉8:30高鐵去嘉義。

我哋今次參加咗阿里山鐵道旅遊網嘅二日遊行程，
主要係唔想擔心轉轉折折到阿里山嘅交通問題，
因為遇著台灣假期，收費會貴少少，
〈反而早幾日復活節就唔係佢哋假期仲平啲〉，
而家每位NT3700，其實都算抵，
費用包括嘉義至阿里山交通、一晚飯店、早、晚餐、
第二朝觀日出行程、離開時順道遊奮起湖交通等。

我哋準時到達後，見到接待專員蔡先生，
佢將地圖、建議行程同一啲重點交待清楚，
然後我哋交埋尾數，就唔會再見到呢個接待專員架嘞！

之後，就係下面呢架車帶我哋上阿里山嘅，
呢架車一共坐6個遊客，我哋坐最前，
司機哥哥一啲都唔怕凍，初初開大個冷氣，
上到山腰時轉為開大個窗，好彩佢中途落車買檳榔，
咁我至有機會去車尾攞番件行李咋，
因為喺車上我已經要著羽絨嘞。

差不多三個鐘頭車程，終於到達阿里山嘞，
司機哥哥沿路指手劃腳講講附近主要景點，
就將我哋放喺今晚入住嘅『櫻山大飯店』嘞！

行李就放喺大堂地下當眼處，人人都係咁，
老闆娘話有CCTV，唔駛擔心喎！

呢幾日我都好留意天氣，無論電視定係網絡，
都係表示會落大雨，好掃興呢！
本來想趁天氣仲OK，快啲去行吓先，
但係又怕體能不足，而且可能年紀大咗，
喺咁高嘅地方，我只係行快幾步都已經心跳加速嘞，
都係是是但但食個飯先啦！四菜一湯，NT600，OK啦！



食飽後，有力上路嘞，
好彩，雖然係大霧啲，但係都無落雨喔！

車站售票處有建議行程，好好啊！一於就跟啦！

先由阿里山車站出發，搭一個站到沼平車站。



咦！好似見到有啲櫻花喎，
唔知一陣會唔會有好多好多呢？

只係6分鐘車程，就到達沼平車站嘞！
聽講要賞櫻就係呢個站嘞！




嘩！櫻花呀！

係呀！睇晒嘞！全山頭都係得果3棵，影完嘞！
我同櫻花真係無緣呢！2月嚟就未開，叫我4月再嚟，
又話阿里山櫻花有好多種，會開到4月15日，
點知嚟到又話天氣暖咗提早開花，
4月4日已經開完晒。
無辦法啦！唯有下年再睇過啦！
Yeah！我又有目標嘞！
好啦！提起精神，繼續上路！

就算無櫻花，阿里山嘅森林浴都好值回票價架！



經過森林後，嚟到姊妹潭。

呢度有好多奇形怪狀嘅樹木，以下呢個叫金豬報喜。




呢個好似叫心心相印，似嗎？

行吓影吓就90分鐘嘞，好舒服，一啲都唔辛苦，
見到呢條吊橋，就即係就到神木車站嘞。



我哋一直都好好彩，沿途都係天陰陰，
最多都係毛毛雨喞，點知一到神木車站，
等車果時突然落傾盆大雨喎！咁大雨，點算呢？
搭咗7分鐘，又返到阿里山站嘞，
落車果時，雨又停啦！

返酒店休息一下先！可以瞓個回籠覺喎。



喺網上見到其他人對酒店頗有意見，話有霉味、污漕......
我又唔覺喎，可能我已經有心理準備啦，反而覺得ok喎，
一分錢一分貨，對於山上嘅飯店，始終唔可以要求咁多嘅。

浴室，有熱水沖涼就ok啦。

房間窗外正好對住火車路軌，可以睇到火車經過。




飯店古老電梯，好似以前要自己拉閘果種，好懷舊啊！

按照安排，我哋試吓去睇日落，
不過今日咁嘅天氣，最後都係睇唔到！
我無所謂，以前舊屋向西，日日都睇到日落架！

食晚飯前，先去7-11寄張木制明信片俾自己先。
張明信片係行程包埋嘅紀念品嚟嘅。



郵費NT25，寫好地址就可以放入呢個郵箱嘞！



係時候食飯嘞！團餐都係喺呢度食架嘞！

係一個火鍋加幾個小菜，食得飽就得啦！



經過上次喺清境嘅經驗，我今次學精咗嘞！
我自備咗即食麵呢！讚！

雖然睇唔到滿山櫻花嘅景象；
都見唔到阿里山姑娘美如水；
又遇唔到少年壯如山，但係，我覺得今日好開心好開心，吸收咗好多大自然嘅靈氣呀！