第一天台灣跨年遊

第一天：2013年2月9日〈年廿九〉

每次去旅行，梗係有某啲期待嘅，
可能係花田；
可能係白雪；
可能係一間好好嘅酒店；
可能係一個新開嘅樂園；
又可能係一班志同道合嘅團友......
而今次，我期待嘅係第一次嘅獨行俠之旅。

過農曆年係一個好時機，
因為根據以往嘅經驗，
我班朋友都唔會去跨年旅行嘅，
台北係一個好地方，
語言溝通無障礙，交通方便，
又多嘢食又多電視睇，
好啦！決定！
11月份就訂齊機票酒店，預備出發。

點知，世事往往就係咁奇妙架嘞，
有一日，同兩個朋友傾偈時，
佢哋一個好耐無去台灣；
另一個從來未去過台灣，
都想搵時間去玩吓，
咁我唯有將我個行程講出嚟啦，
大家一拍即合，好，咁我改機票就吓佢哋啦！

早機，大家一早喺機場集合，
怕假期人多，寧願早啲過關。
入去快啲去候機室坐坐先。
個候機室係咪好靚呢？
係呀！由於咁遲先改機票，選擇已唔多，
而且價錢仲好貴添，試吓Check商務，
時間好不突止，仲要只係同經濟艙相差200蚊咋。

嘆吓三文治、豬排包、水果盤同果汁先。
香港呢邊個長榮候機室有少量自助食物，
如果想食其他就可以再Order，質素都唔錯架。

唔鐘意入面咁暗咁靜，坐出面都得。



今次係我第二次坐商務，
唉！咁舒服，下次坐返經濟果時，我會好懷念你架。

人未坐定已經嚟兩杯Welcome drink嘞。

最開心當然係坐喺闊坐位啦。



我已經喺網上Order咗特別餐，但係空姐仍然送上餐牌。

基本餐係『腰果雞丁』，啱晒今日團年食啦！



而我呢，就Order咗海鮮餐，相當唔錯呢！

90分鐘就到嘞！真係想坐耐啲呀！
唱完錢後，就去出張電話咭先，
出境大廳右手面係車站；左手面就係電訊公司嘞，
中華、大哥大、遠傳都喺度，
大哥大最多人排，但我喺網上做過資料搜集，
有C Hing話其實遠傳最抵用，而且接收都唔錯，
去到啱啱無人排隊，咪即刻去出番張咭先囉。

大約港幣$120，就可以有5日上網同通話嘞，抵！
今日12點開咭，張咭可以用到第六日12點，
果日中午都到機場啦，到時又有免費wifi嘞！
揀個5日plan就夠啦，事實證明，呢5日都接收良好，讚！

由於我哋咁遲決定，台北車站一帶嘅飯店都好滿吓，
而有啲飯店有房但係就比平時貴一倍有多，
於是，我就訂咗離台北車站遠少少嘅『慶泰大飯店』嘞！

今次我哋三人行，我鐘意呢度有套房，而且唔算貴。

房間有兩張床，空間都幾寬敞，再喺廳加一張就夠晒瞓啦！

浴室喺房入面，有浴缸有企缸，都好大吓架。

房入面另有小雪櫃同洗手盆，
睇吓，我已經帶齊呢幾日嘅食具同飲品嘞！

窗外係望住無處不在嘅101。

放低行李，第一站先去西門町先啦！
由於今晚係小年夜，好多商舖都休息，紅樓都唔例外。

邊行邊掃小食，行到街尾食番個雞蛋糕先，即係放大版雞蛋仔。

最後決定食火鍋，NT580食個飽，兩位團友都好滿意呢餐喎！