第六天台灣跨年遊

第五天：2013年2月14日〈年初五〉

好少會咁恨回程架，但係我今次我有我嘅期待......

長榮喺自己地方個候機室，果然勁好多！


唔駛點餐，個Buffet已經好多嘢食，睇吓都飽呀！

以下呢啲全部都食到：
燴蕃薯、自製熱狗、中式心點、豆腐花、
蘿蔔糕、熱盤、雪糕、豆漿、沙律、
汽水、咖啡、酒、杯麵、綠豆糕......
恕我見識少，我哋三個真係食得好開心；Hea得好盡情。

飲飽食醉，又係登機嘅時間嘞，先嚟杯凍嘅！唔該！

跟住都係......食！仲有，睇埋嚟果時未睇完果半套電影。



多謝你哋，雖然過程有少少阻滯，但係我玩得好開心呀！
下次再玩過吖，唔知去唔去得成北海道呢？


今次同櫻花無緣，台灣，我仲會再嚟架！

第五天台灣跨年遊

第五天：2013年2月13日〈年初四〉

由於朋友仔已休養多時，今日應該係時候出動嘞！
於是，我哋今日包車一日遊，又係鴨仔團時候啦！
都好，有呠呠車坐，唔駛擔心交通問題，
雖然煙雨濛濛，我哋都可以安心去玩，
首先，第一站，停喺萬里區個海邊。



落嚟睇吓浪，順便，去一下洗手間。

跟住，去野柳，朋友仔一直話要去見識吓，
咁既然有車，入去行吓又何妨呢？

首先入去一定要認識吓呢度嘅大明星『俏皮公主』啦！

聽講就嚟無曬架嘞，都值得嚟睇睇大自然嘅藝術品嘅！

仲有幸可以同公主合個照添！

沿途都見到好多經過千百年嘅侵蝕、風化嘅交互作用下，
逐漸形成嘅地質奇觀，我呢個凡人都覺得好驚嘆喔！

當日風好大、浪好高，為咗安全起見，
購票入場前已指明有啲地方封咗唔準進入架嘞！

中間果個圈嘅叫『燭台石』，係野柳特有嘅海蝕景觀，
燭心係岩層裏面較堅硬嘅石灰質球形結核，
在海水雕蝕下逐漸露出來，切割出圓錐形嘅燭台。
真係好神奇、好神似......

但係都唔夠以下呢個咁勁，一睇就知佢係乜啦，
無錯，佢有一個好好聽嘅名，佢叫仙女鞋，靚喱？

喺到玩咗兩個鐘，我哋就離開嘞，
因為朋友怕跣腳，佢留喺外面等我哋，
咁我哋見識完就出去集合囉！
下一站：黃金瀑布。

係時候要去醫醫肚嘞！咁一定要去九份啦！


呢個餅皮包冰淇淋真係好好食，
但係可以選擇加入香菜，我就有少少接受唔到囉！


呢個天下第一菇都好正！
沿途仲食咗大福、鳳梨酥、茶葉蛋、杏仁茶......



但係縱使幾好食，我都決定要掉頭走嘞！
你睇，多人到都唔係自己行嘅，仲要落住要雨，
成日俾人用把遮啄到個頭喎，哼！我走！
 

下一站去十分放天燈，睇吓呢條車龍......

好彩有包車，司機放低我哋，佢自己要去搵車位。
人山人海，好熱鬧、好有氣氛喎！

最後，六點幾已經完晒所有行程，
司機叔叔介紹我哋嚟呢度快炒一番，
又平又好食，食飽飽就番去執行李lu！

 

 

第三、四天台灣跨年遊

第三天：2013年2月11日〈年初二〉

一早食完個自助早餐之後，又搭捷運出發lu。
我好欣賞台灣鼓勵大家要多做運動嘅低碳生活，
佢哋唔止得個講字，仲要有實際配套至得，
好似捷運咁，每列車都有預留車卡俾自行車架。



今日同尋日個組合相同，
要休息嘅朋友繼續休息；鴨仔團繼續出發，
今日嘅目標係：搭貓空。
由於呢幾日係台灣長假期，新聞都係圍繞住啲交通，
又話啲人為咗行大運，排隊搭貓空都排幾個鐘，
嚇死人咩，我都係排咗30分鐘之嘛，
唔知呢招靠嚇係唔係疏導交通嘅方法之一呢？

上到嚟開始時晴時雨嘞，人唔算多，我哋沿路向山上行，
沿途都見到櫻花，但係唔係我想像嘅景象。

我哋揀咗一間就腳嘅『大茶壺』上去泡泡茶，
好有氣質啊！

其實啲餸菜一啲都唔貴，而且仲好好味添！
只係壺茶貴啫！恕我唔識欣賞嘞！

食完再行多陣，沿途睇吓果少少櫻花，
好舒服，今日唔駛趕行程，好Relax。

知道朋友仔都唔願再出嚟架嘞，
所以，再去夜市出招，剎呀..........

 第四天：2013年2月12日〈年初三〉

今日一心賞櫻，於是搭捷運去淡水再轉公車去天元宮。

條路好奔波，好彩有位坐唧！啲花靚喱~~~
 

埋啲......再埋啲......
 

睇真啲，同尋日警察局門口果啲係唔同架。


睇完嘞！無嘞！係真架！無嘞！
全個天元宮就只係開咗門口果棵咋！
只可以講：我同櫻花無緣份呀！

為咗補償我嘅心理創傷，我同朋友決定去淡水老街食餐飽，
結論係：農曆新年真係唔好去華人聚集嘅地方，
如果唔係，就好似我哋咁，一直俾人推向前，
基本上雙腳都唔駛自己落地行咁濟，
行咗兩粒鐘，一直落雨，
雖然都食咗好多嘢，但係連影相嘅心情都無！

傍晚返到去，見朋友仔都係好辛苦，
咁我哋就決定喺飯店附近搵食啦！
最後決定嚟呢間西餐廳，食物ok啦，
只要同好朋友一齊食，氣氛搭夠！
揀呢度都係因為貪佢升降機直達，咁朋友就唔駛行樓梯啦！
就係咁，傾吓食吓，又一晚lu。