別來無恙？

2010年4月26日，我哋識咗幾個新朋友，佢哋係一對

紅耳鵯夫婦，佢哋仲靜靜地喺學校公園起咗間豪宅，生下四個小寶貝，
由於佢哋唔識字，所以我哋幫佢四個寶貝改名為：『安仔、康仔、Dicky bird 同 Edmond bird。

 

睇吓！我哋四個齊齊整整，仲好有中氣添。

 

第二日，少緊個，雖然得番三個，要團結d呀！手拉手圍個圈先啦！咁樣無咁驚架！

 

得番我哋兩個相依為命，瞓埋d啦！

 

大佬！我透唔到氣呀！俾條生路行吓吖唔該。

 

終於可以吸吓新鮮空氣嘞！

 

最後都係得番我安仔一個。

 

大家睇吓！我d毛好桔手吓，唔好摸我呀！

 

咦！我......睇到嘢嘞！鏡頭喺邊便呀？一號機定二號機呀？

 

今朝我醒呀！Gel番個頭先出嚟見大家，係咪好型仔先！

 

有d道具襯托吓，顯得我有少少神秘感。

 

未介紹，呢個係家母，佢好惡架，如果唔係friend，邊個行埋d我哋間豪宅都會被佢攻擊呀！

 

但係佢都有溫柔嘅一面嘅，我第一次落地，有少少唔慣，媽咪一路都傍實我架。

 

睇吓睇吓！仲驚死我餓親，親自餵我食mum mum添！

 

係friend先俾你掂我咋，其他閒雜人等，早就俾我呀媽啄死，
今次，我要同你哋講bye bye嘞，我都好開心喺度住咗13日，
第時等我大個仔，我會番嚟探你哋架！Bye Bye ~ ~ ~ ~ ~ ~ ~

 

點解今日要講番呢個老朋友嘅故事？因為11個月後嘅今日，有一個疑似安仔嘅朋友番嚟探我哋嘞！
佢有時口中叼住一條草、有時口中叼住一堆棉花，每次飛番嚟都來去匆匆，
因為，我見到佢又喺我哋學校度起緊豪宅嘞！