等咗咁多日都未有小鳥出世，我就喺無所不能嘅網絡世界度search一下啦，
原來，佢要孵成十幾日架，唯有繼續等啦，喺等嘅期間，大家先睇睇偉大嘅鳥媽媽先啦！去片！
其實哺蛋真係好悶架...... 哺咗8日都仲未出世。 有時都要出嚟伸吓腳。 但係同時又要時時刻刻四圍盯住有無敵人。 終於有機會做吓運動嘞！伸伸條尾先。 3點鐘方向，有人走近個巢...... 唔駛驚，走咗嘞！咪番轉頭呀！我仲一路望住架！ 我嘅嗜好係鐘意扮吓啄木鳥，幾Cute？ 邊個偷影？ 扮鎮定先，可能係自己多心啫！ 我知你影緊架，其實......我都幾鐘意影相嘅， 所以，唔駛客氣，隨便影啦！
悶悶哋，幫鳥媽媽影吓寫真都幾好玩吖！
今年小小安嘅新居，就喺呢棵平平無奇嘅矮樹入面。
睇唔清楚？圈住果忽就係嘞！
再埋d，呢間屋係2011年3月17日〈星期四〉起嘅，一日就完工嘞，今次好似係一隻單親紅耳鵯自已一手一腳攪掂晒，真係犀利。
睇埋裏面，好實淨架，可惜佢一直都無嚟入伙，點解呢？係因為知道有人類發現咗？定係到生蛋嗰日至嚟住呢？
到咗3月22日〈星期二〉，終於有答案嘞！上午9點30分我哋去探佢，仍然豪無動靜，直至上午10點30分，發現巢入面有一隻蛋呀！好開心，但係，上次明明有4隻過喎，點解今次咁孤單嘅？
到咗3月23日〈星期三〉，巢入面有第二隻蛋嘞！咁都定d。
如此類推......如果無估錯......今日3月24日〈星期四〉應該......無錯，第三隻蛋出現嘞！我哋大家都覺得好得意，一日生一隻咁有規律嘅？
今日見到小鳥媽媽比較多時間留喺個巢度，唔知係繼續生蛋定係開始孵蛋呢？我會喺盡量唔騷擾佢嘅情況下繼續密切留意架啦！
2010年4月26日，我哋識咗幾個新朋友，佢哋係一對
紅耳鵯夫婦，佢哋仲靜靜地喺學校公園起咗間豪宅，生下四個小寶貝，
由於佢哋唔識字，所以我哋幫佢四個寶貝改名為：『安仔、康仔、Dicky bird 同 Edmond bird。
睇吓！我哋四個齊齊整整，仲好有中氣添。
第二日，少緊個，雖然得番三個，要團結d呀！手拉手圍個圈先啦！咁樣無咁驚架！
得番我哋兩個相依為命，瞓埋d啦！
大佬！我透唔到氣呀！俾條生路行吓吖唔該。
終於可以吸吓新鮮空氣嘞！
最後都係得番我安仔一個。
大家睇吓！我d毛好桔手吓，唔好摸我呀！
咦！我......睇到嘢嘞！鏡頭喺邊便呀？一號機定二號機呀？
今朝我醒呀！Gel番個頭先出嚟見大家，係咪好型仔先！
有d道具襯托吓，顯得我有少少神秘感。
未介紹，呢個係家母，佢好惡架，如果唔係friend，邊個行埋d我哋間豪宅都會被佢攻擊呀！
但係佢都有溫柔嘅一面嘅，我第一次落地，有少少唔慣，媽咪一路都傍實我架。
睇吓睇吓！仲驚死我餓親，親自餵我食mum mum添！
係friend先俾你掂我咋，其他閒雜人等，早就俾我呀媽啄死，
今次，我要同你哋講bye bye嘞，我都好開心喺度住咗13日，
第時等我大個仔，我會番嚟探你哋架！Bye Bye ~ ~ ~ ~ ~ ~ ~
點解今日要講番呢個老朋友嘅故事？因為11個月後嘅今日，有一個疑似安仔嘅朋友番嚟探我哋嘞！
佢有時口中叼住一條草、有時口中叼住一堆棉花，每次飛番嚟都來去匆匆，
因為，我見到佢又喺我哋學校度起緊豪宅嘞！
