最開心嘅工作 ~ 預備篇

唔知點解，唔知點解會咁決定，

總知，今年暑假，我哋決定組團去關西。

我去旅行一般都極早決定架，

今年1月，我已經下定決心架嘞，

不過點都要等埋啲朋友覆我先可以開工嘅，

都係果啲未知攞唔攞到假呀、

又或者證件過期嘅問題啦！

今年已經三單嘞！點解會咁架？

唔該各位要留意證件日期呀！

因為，張機票真係日日都賬價架！

終於，3月1日成團嘞，

今次四個人，其中一個係新成員，

呢個新成員識日文架，正！

呢個組合都幾新鮮喎，期待呢！

3月1日即刻訂機票，

唉！張機票已經比1月貴咗$560嘞！

但係都仲係算平，因為我哋搭Peach吖嘛，

搭廉航，樣樣都拆開計，真係豐儉由人架，

以今次為例，以下以單人計：

雙程機票：HKD2580；

香港離境稅：HKD120；

機場保安稅：HKD33；

日本機場稅：HKD160；

想坐埋一齊就俾揀位費啦！

雙程窗口位：HKD64；雙程中間位：HKD32；

一件寄艙行李雙程：HKD320，

就係咁，每位盛惠HKD3309啦！

其實都唔算貴，話晒都係暑假喎！

話說四月初，有朋友想加入，

我諗住幫佢 check一check有無機位啦！

點知張機票又升咗差不多HKD2000嘞！


跟住就去搵酒店嘞！咁就要先初步定吓要去邊先，

我諗，我最想去京都，所以，決定頭三日都會留喺京都，

既然住喺京都，梗係要搵間和式旅館體驗吓啦！

有時好得意架，當我喺Agoda逐頁睇果時，

唔知點解就俾佢吸引住嘞~~~平新旅館！


佢外貌好普通，但係感覺好舒服，

於是就立即book咗嘞，每人每晚淨房價5775円，

其實佢一間房最多可以住四個人，

但係無論住幾多人都係以人頭計收費，

所以我咪book兩間房囉，住得舒服啲吖嘛！

呀！我唔係喺酒店網book架，

係直接喺官網book，因為聞說啲Yen會跌，

咁到時去到先俾就更平啦！

至於返到大阪，其實選擇真係多不勝數，

我又誤打誤撞睇中咗佢~~~一榮飯店。

佢地點適中，喺正難波，又唔貴，

用埋Agoda啲分，四晚每人HKD1600。



可能你會話，HKD400一晚都唔算平喎！

問題係，佢係鬧市中嘅和式旅館吖嘛！

瞓Tatami架！每間房都有36平方米，唔算細啦！



交通安排就係令我最頭痛嘅地方。

之前去北海道明明好方便格，

點解今次就遲遲落唔到手開工呢？

問題係，佢太多選擇嘞，

用咗成個月爬文，了解清楚啲pass點用至抵，

最後決定用以下幾種：

1. Kansai Area Pass 1 day，2000円，

第一日由機場到京都，再沿JR沿線任搭，極抵！

2. Kansai Thru Pass 3 day，5000円，

可以分開3日用，除JR外，大部份車都啱用。

3. 大阪周遊パス，兩日劵，2700円，連續兩日任搭地下鐵同巴士，

最抵嘅係，入面有28個景點完全免費入場架，

去到3個以上都賺番啦！

呢排啲円跌一跌，搞到我又有鬥志plan行程嘞。

搞咗成個月，終於搞掂個行程lu！

而家我已經收拾定心情等去玩嘞。

高雄『想』櫻之旅第五天

2013年4月7日〈第五天〉

我最怕計劃最後一天嘅行程嘞！
又唔去得遠，又無心情買嘢，於是，近近哋去SOGO啦！

好彩見到『光南』，就喺道消磨咗兩個鐘頸嘞！

行飽買飽去食個晏先，搵間人流旺啲嘅就安全啲啦！

好平嘅一餐，味道都唔錯。

返酒店執執行李再Hea一陣就去機場嘞！
呢個機場都幾得意，每一個候機室都有主題，
以下呢個七彩繽紛，係代表美食嘅。

呢個一睇就知係啱晒細路仔啦！

仲有得做手工，小朋友最鐘意啦！

呢個有保健作用，因為連接按摩小站，我記得要收費嘅。

呢個主題係電影，果日播放梗『愛的麵包魂』。

呢個主題係大自然，呢邊介紹蝴蝶；

另一邊介紹鳥類。

呢個主打閱讀，提供圖書俾大家消磨時間。

機場設施好細心，祈禱室都有三個，
請按照自己嘅宗教，搵適個自己嘅祈禱室啦！

同台中一樣，都有手機充電站，讚！

呢邊人山人海，原來係飛機Delay，
只要攞住登機證，可以換到漢堡包同果汁，可憐！

我哋順利登機，趕住睇埋電視節目下半場，
仲有要快啲食飛機餐啦，因為好快就到香港架嘞！

今次買咗麝香木珠，放喺櫃筒香噴噴呢！

叉電線又平又靚，『光南』收獲，後悔無買多兩條呢！

呢兩枝筆特價，香港又無貨，買到真係好開心！

今次又睇唔到櫻花嘞！
即係話，我要再儲多啲錢，
下次去韓國或者日本睇餐飽至得！

高雄『想』櫻之旅第四天

2013年4月6日〈第四天〉

今日好悠閒，乜都唔駛諗，
因為朋友喺台灣嘅親友特登嚟帶我哋去玩，
真係要特別鳴謝呢！
一落車，見到一片青蔥，
我係一個典型嘅香港人，所以......大大力吸口氣先！

第一站係：美濃民俗村，一齊入去睇睇啦！


鎖匙扣係好多人鐘意買嘅旅遊紀念品，
但係我從來都唔會買，連睇都唔會睇，
但係呢個檳榔，雖然我無買，但係我真心覺得幾得意。

經過一個檔攤賣『狀元糕』，我立刻就被吸引住嘞，
主要唔係個糕，而係一個年紀小男孩熟練嘅手法。

朋友請我哋飲『客家擂茶』，都幾好飲。
話時話我覺得自己真係幾失禮，
因為我身為客家人，但係入到嚟呢個客家民化村，
好多嘢都係第一次見，包括呢杯『擂茶』。

呢度只要俾NT100，可以學整『彩繪雨傘』啊！

文化村裡而介紹客家文化，仲有好多童玩，
我哋都忍唔住發揮貪玩本性，喺度玩咗一陣。

大家估吓，呢架機係乜東東呢？

就係投幣式嘅賣魚餌機，真係入型入格喎。

企喺魚餌機旁邊，一直聽到憂憂嘅音樂聲，
原來係雜貨店中嘅伯伯，用鋸同掃把演奏出嚟架！

參觀完民化村，就去附近嘅『美濃老牌粄條』搵食。

就係坐喺呢道食嘢，好有地道風味呢，
講真，唔係有當地人帶住，我哋都唔識得嚟啦！

嘩！正宗客家菜，真係好好味呀！

食完午餐，去食個甜品先，咁去糖廠就啱晒啦！

米糕、酸梅、花生、杏仁蛋黃、仲有......清水味？
真係好特別呢，可惜我仲咳梗，所以要忍忍口嘞！

我唔係幾鐘意買嘢，但係去到邊都鐘意睇吓啲手信舖，
呢間賣嘅係絲瓜水，話係美容喎，我都係第一次見。

仲有呢個：混蛋，話一蛋三味喎，唔知真定假呢？

下一站就去旗山，我哋主要去旗山老街，
見到呢啲路牌，應該都估到呢道賣乜啦！

無錯，呢道街頭巷尾都係賣香蕉產品嘅！

仲有一啲用瓦通紙做嘅童玩，
大家都好守規矩，自己投幣後攞一份，
做好後係一個波子機，睇吓小朋友玩得幾開心？ 

之後坐咗二十分鐘車，去一條綠色隧道走走，
今日真係好悠閒呢，而且有人帶路真好啊！

夜晚，朋友親友一家請我哋食咗一餐名貴嘅日本菜，
真係好滿足，今日真不好意思呢！
希望日後你哋嚟香港玩果時，我可以請返你哋食飯啦！