北海道仲夏花之旅第二天

七月二十五日〈星期三〉第二日

食完杯麵，無聊拉開窗簾睇吓，
吓！天光嗱？四點幾咋喎！
唔好再me me麼麼嘞！快啲瞓啦！




叉完電起身睇吓天氣報告先......



好啦！我就一定要去北海道神宮架嘞！
團友又話想去動物園，咁順路嘅，就咁決定啦！
懶人貼士，搭車坐邊卡好？睇吓邊卡最近電梯囉！


 出閘後，指示明確。

第一站：北海道神宮。

知唔知點解我一定要嚟呢？

話說2010年聖誕節嚟果時幫朋友買咗個姻緣御守，
舊年至今年，佢就經歷相識、拍拖同結婚lu，
另一個朋友知道，就叫我一定要幫佢買番個。

行咗一陣，就轉戰円山動物園嘞。



去到果度，啱啱有幾個小學生考察梗，
佢哋好有禮貌架，見我望住佢哋仲向我躹躬添。

另一邊有一班幼稚園學生都喺度參觀梗噃。

我覺得人仲好睇過動物啦，呢個動物園真係有啲悶。



一場嚟到，買啲紀念品啦，我想買包米呀！

既然動物唔係幾好睇，不如玩吓影相啦！
呢個腳架真係幫咗唔少忙架。 

就係佢，幫我哋影咗呢個行程中好靚嘅大合照嘞！



大家都好肚餓嘞，但係啲食店乜都無得買，只有呢d......

唯一一樣澱粉質，真係悽涼！

 

四個人就係夾埋食咗咁少嘢咋！不如......



食雪糕囉！好味！Yummy！おいしい！

漫步去地鐵站，好舒服呀！好想秋天再嚟睇紅葉......
去到狸小路，會合喺機上共患難嘅小情侶一齊食飯。


由於今日餐晏食唔飽，決定今晚盡情放肆食餐飽，
無錯，又係老地方：蝦蟹合戰，我哋又嚟嘞！


 喺呢度唔駛識日文？唔駛驚！有中國侍應，
就算唔識講普通話？都唔駛驚，手指指就得嘞。


唔駛驚唔識點KO隻蟹架，有圖解架嘛！

見大家都無意見，於是我就揀咗個4200円嘅餐嘞。

起初大家見到咁大盤蟹，都好開心、好興奮架！


睇吓團友幾細心，真係睇見都流晒口水，
講真，呢度啲蟹真係好味過香港酒店自助餐果啲架！ 

 大家都好努力，食到換咗幾次骨桶架嘞！



 食到最後，大家都好憎或者好怕啲蟹嘞！
睇吓~~好一個杯盤狼藉嘅景象。

真係飽到上心口呀，逛吓藥房就返去瞓lu。

北海道仲夏花之旅第一天

七月廿四日〈星期二〉第一天

經過一輪瘋狂嘅工作，終於等到今日嘞，
雖然對呢個旅程充滿期待，但係......
又因為太忙，無乜做資料搜集就要出發lu，
點知，十幾年無出現過嘅十號風球，居然會喺今晚出現......
都未試過打風會咁唔開心嘅......
即刻有十幾個問題彈出嚟，點算呢？
駛唔駛早一晚去機場瞓呢？趁住仲有機鐵......
如果唔係，聽朝搭乜呢？個風幾時落呢？
雖然知道一定會Delay，但係遲去又會點呢？
唉！乜都唔好諗，數吓d彈藥，瞓醒至算啦！

其實都無乜瞓過，一直check吓班機嘅狀況，雖然已經知道delay，但係都決定早d出發去機場，好彩仲有西鐵同機鐵，我可以順利去到機場，但係住新界東嘅團友就慘嘞！東鐵都停埋，幾經辛苦先可以截到架的士去機場，真係唔好睇少風球嘅威力呀！


好彩早一晚無嚟啫！機場好多人滯留，
連地下都坐滿人，插針都插唔落。

恐怖嘅場面，詢問處條龍長到見唔到龍尾。

原定係9：40機架，幾理想呀！

死好命搵到個位坐，由於登機閘口遲遲無顯示，
我哋只好食完一個餐又一個餐。
點知到後來，我哋先知道，出示張delay登機證，
係可以慳番$75用嚟買嘢食架！

睇吓個天......都幾得人驚......

終於登咗機嘞！以為可以鬆一口氣添......



點知，一坐就坐咗幾個鐘，同機乘客都開始唔耐煩......
但係，d機艙服務員又唔多露面喎，一等就等到六點幾嘞，
就算而家起飛，去到都無JR搭啦！
我唔係想搞事架，但係都忍唔住去問空姐，
風已經停晒，而家唔係天氣問題，等乜先？
原來佢哋呢組人已經過咗民航處規定的工作時間，
而家要等佢哋另一組機組人員接更喎，
吓！咩話？我話：就算師奶都識做好防風措施啦！
你哋咁大間公司，居然無打風應變措施嘅咩？
要一大班乘客焗喺架機入面三個幾鐘等等等等等.....
我哋要搭的士去機場喎！呢條數，點計先，
搞咗一輪，終於，航空公司承諾，
會安排旅遊巴送我哋去札幌JR站或薄野，咁都好ｄ，
至於book咗其他地區酒店同一早租咗車嘅人，
就要慢慢傾嘞！呢個故事令我學識，
落機第一晚都係book市區酒店好啲。
終於，六點半起飛嘞！
起飛後先可以派飛機餐，大家都餓到死。



好唔好食都唔知，總知就食晒啦！

幾經辛苦，終於去到酒店嘞！
原來同車嘅人多數都係住呢度，
大家都係經歷十幾個鐘困機，都算共過患難。
酒店房間細細，細到朋友開到行李喼但係我就開唔到，
不過勝在『近』『平』『乾淨』，咁就夠啦！

放低行李，九秒九落去Lawson買杯麵，
團友為求快，直情喺便利店入面沖埋熱水至上去，
報時：日本時間，三點。


好啦！領隊決定聽日大家可以瞓晏啲！早抖嘞！