從前,我每日都喺同一個站等車返工,
有一日,我排第一,後面跟住成村人,
然後,有一個年約二十多歲嘅女子,企咗喺我前面,
我諗:可能佢唔知邊個係龍頭邊個係龍尾呢,
其實,就算我排第二,都肯定有位坐,我可以唔出聲架,
但係,我覺得好似怪怪哋咁......咁樣咪對後面啲人唔公平?
於是,我同佢講:『小姐,龍尾喺果邊。』
自問都算好有禮貌,將尷尬氣氛減到最低,
點知,俾呢位美女狠狠睥咗一眼,個心都有啲寒,
然後佢不情不願咁行咗去龍尾。
最後,佢都上到同一架車,估唔到......
佢故意走過我個位,同我講:『死八婆,慌死無位坐咩?』
然後,一直吟吟尋尋咀咒我,我聽到好多聲:死八婆。
我無回應,同車見證成個過程嘅乘客們都無人有反應,
當然,一大早俾人兜口兜面鬧,果日我都幾唔開心。
幾日後嘅一個早晨,我已經坐喺車上面,
美女又同我一架車,我都好驚佢再嚟鬧我,所以望向窗邊,
落車果時,佢頭昂昂氣沖沖,同司機叔叔又頂咗幾句,
然後就踏住高跟鞋,咯咯咯咯好有氣勢咁落車,
點知......可能佢個頭昂得太高嘞,佢......碌咗落坑渠!
雖然我唔想做一個黑心嘅人,但係,的確,我果日開心番。
而家,我無搭果架車嘞!應該唔會再撞到佢啦,
希望佢學懂禮貌,同埋......日日都上落平安啦!
回覆刪除[版主回覆06/30/2012 09:15:24]Hi, Welcome back.
hello, 路過見到呢篇文章, 睇到最後笑左出黎, 雖然唔應該覺得"抵佢死", 不過呢個女人真係好衰, 自己唔啱仲鬧人死八婆! 仲想讚一讚blog主好好人
回覆刪除[Venus回覆08/24/2012 22:29:24]好多人都要禮貌再培訓、愛心再培訓、品德再培訓 <--完全同意呀, 讚!
[版主回覆08/24/2012 18:22:50]多謝到訪,得閒多d嚟吖。
而家,好似好多人都要禮貌再培訓、愛心再培訓、品德再培訓咁......呢d故事隨時隨地都會遇見,今次我都係一時口痕發吓勞騷啫,同時都想俾三個姪女睇到,希望佢哋除咗會心微笑外,都會引以為鑑,唔想佢哋變港孩吖嘛!