妹妹，其實可以禮貌啲！

從前，我每日都喺同一個站等車返工，

有一日，我排第一，後面跟住成村人，

然後，有一個年約二十多歲嘅女子，企咗喺我前面，

我諗：可能佢唔知邊個係龍頭邊個係龍尾呢，

其實，就算我排第二，都肯定有位坐，我可以唔出聲架，

但係，我覺得好似怪怪哋咁......咁樣咪對後面啲人唔公平？

於是，我同佢講：『小姐，龍尾喺果邊。』

自問都算好有禮貌，將尷尬氣氛減到最低，

點知，俾呢位美女狠狠睥咗一眼，個心都有啲寒，

然後佢不情不願咁行咗去龍尾。

最後，佢都上到同一架車，估唔到......

佢故意走過我個位，同我講：『死八婆，慌死無位坐咩？』

然後，一直吟吟尋尋咀咒我，我聽到好多聲：死八婆。

我無回應，同車見證成個過程嘅乘客們都無人有反應，

當然，一大早俾人兜口兜面鬧，果日我都幾唔開心。

幾日後嘅一個早晨，我已經坐喺車上面，

美女又同我一架車，我都好驚佢再嚟鬧我，所以望向窗邊，

落車果時，佢頭昂昂氣沖沖，同司機叔叔又頂咗幾句，

然後就踏住高跟鞋，咯咯咯咯好有氣勢咁落車，

點知......可能佢個頭昂得太高嘞，佢......碌咗落坑渠！

雖然我唔想做一個黑心嘅人，但係，的確，我果日開心番。

而家，我無搭果架車嘞！應該唔會再撞到佢啦，

希望佢學懂禮貌，同埋......日日都上落平安啦！

第五集：與光同行〈光とともに〉

第五集：與光同行〈光とともに〉

由篠原涼子、小林聰美主演嘅日劇，
講述一個新手媽媽，滿心歡喜咁迎接新生命，
點知，兒子小光三歲都唔識講嘢、
異常固執、時時發脾氣……
原來，兒子患有自閉症。

可以想像，作為自閉兒嘅家長，要面對幾大壓力，
好彩，佢哋遇到由小林聰美飾演嘅里緒秀美老師，
佢用好多方法幫助小光同佢媽媽。

呢套劇本身已經好感人好吸引，
加上工作關係，有時都會遇到自閉症小朋友，
一邊睇一邊會將角色的行為同現實中嘅小朋友比較，
我覺得劇中小朋友真係做得好好呢！
對我嚟講，呢套似係教材多過一套日劇。